କୋଲକାତା: ବିଜେପିକୁ ଟାର୍ଗେଟ କରିବାକୁ ଯାଇ ଭୁଲ ଐତିହାସିକ ବ୍ୟାଖ୍ୟା କରି ଟ୍ରୋଲ ହେଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ବିଜେପି ଦେଶର ଇତିହାସ ପରିବର୍ତ୍ତନ କରିବାକୁ ଚାହୁଁଛି ବୋଲି କହି ସମାଲୋଚନା କରିବା ବେଳେ ଦିଦି କହିଥିଲେ, ମହମ୍ମଦ ବିନ ତୋଗଲକ ଦିଲ୍ଲୀରୁ କୋଲକାତାକୁ ରାଜଧାନୀ ସ୍ଥାନାନ୍ତର କରିଥିଲେ । ଏପରି ତ୍ରୁଟି ଦିଦିଙ୍କର ଐତିହାସିକ ଜ୍ଞାନକୁ ସମାଲୋଚନା ମଧ୍ୟକୁ ଠେଲି ଦେଇଛି ।
ଆଜି ନିଜର କାଳିଘାଟ ସ୍ଥିତ ସରକାରୀ ବାସଭବନରେ ଏକ ପ୍ରେସମିଟ କରି ବିଜେପି ଉପରେ ବର୍ଷିଥିଲେ ମମତା । କହିଥିଲେ ସେ ଶୁଣିଛନ୍ତି, ଶାସକ ମହମ୍ମଦ ବିନ ତୋଗଲକ ତାଙ୍କ ଶାସନ କାଳରେ ନିଜ ରାଜଧାନୀ ଦିଲ୍ଲୀରୁ କୋଲକାତାକୁ ସ୍ଥାନାନ୍ତରିତ କରିଥିଲେ । ଭାରତୀୟ ଜନତା ପାର୍ଟି ଏବେ ଦେଶର ଇତିହାସ ପରିବର୍ତ୍ତନ କରିବାକୁ ଚାହୁଁଛି । ଯଦି କୌଣସି ଅନୁଷ୍ଠାନର ନାମ କୌଣସି ବିପ୍ଳବୀଙ୍କ ନାମରେ ନାମିତ ହେଉଛି, ତାହା ଠିକ ଅଛି । ଅନ୍ୟଥା କଣ ଆବଶ୍ୟକତା ବୋଲି ସେ ପ୍ରଶ୍ନ କରିଥିଲେ ।
ସେହିପରି ଏକାଧିକ ପ୍ରସଙ୍ଗରେ ସେ ଭାରତୀୟ ଜନତା ପାର୍ଟିର ନିଷ୍ପତ୍ତିକୁ ସମାଲୋଚନା କରିଥିଲେ । ଏନସିଆରଟି ପୁସ୍ତକରେ ଦେଶର ନାମ ପରିବର୍ତ୍ତନକୁ ମଧ୍ଯ ସେ ଟାର୍ଗେଟ କରିଥିଲେ । 2 ହଜାର ଟଙ୍କିଆ ପ୍ରଚଳନକୁ ବାଦ ଦେବା, ଜିଏସଟି ପ୍ରସଙ୍ଗରେ ମଧ୍ୟ ସେ ବିଜେପିକୁ ଟାର୍ଗେଟ କରିଥିଲେ । ଏହି ନୀତି ତୋଗଲଗଙ୍କ ଶାସନ ପରି କହିବାକୁ ଚେଷ୍ଟା କରିଥିଲେ ମମତା । ହେଲେ ଇତିହାସର ଉଦାହରଣ ଦେଇ ସମାଲୋଚନା କରିବା ବେଳେ ଏପରି ଭୁଲ ବ୍ୟାଖାନ ତାଙ୍କୁ ଅଡୁଆରେ ପକାଇଛି ।
ତେବେ ଏଠାରେ ଉଲ୍ଲେଖଯୋଗ୍ଯ ଯେ, କୌଣସି ମୁସଲମାନ ଶାସକଙ୍କ ସମୟରେ ନୁହେଁ ବରଂ ବ୍ରିଟିଶ ଶାସନ ଅମଳରେ ଦେଶର ରାଜଧାନୀ କୋଲକାତାରୁ ଦିଲ୍ଲୀକୁ ସ୍ଥାନାନ୍ତରିତ ହୋଇଥିଲା । ମୁସଲମାନ ଶାସକ ମହମ୍ମଦ ବିନ ତୋଗଲକ ତାଙ୍କ ରାଜଧାନୀ ଦିଲ୍ଲୀରୁ ଦେବଗିରିକୁ ସ୍ଥାନାନ୍ତରିତ କରିଥିଲେ ।
ସେହିପରି ତାଙ୍କ ସରକାରରେ ମନ୍ତ୍ରୀ ଥିବା ଜ୍ୟୋତିପ୍ରିୟ ମଲ୍ଲିକଙ୍କ ବାସଭବରେ ପ୍ରବର୍ତ୍ତନ ନିର୍ଦ୍ଦେଶାଳୟର ଚଢାଉକୁ ମଧ୍ୟ ବିରୋଧ କରିଛନ୍ତି । ମମତା କହିଛନ୍ତି, ମନ୍ତ୍ରୀ ଜ୍ୟୋତିପ୍ରିୟ ଏକାଧିକ ସ୍ବାସ୍ଥ୍ୟଗତ ସମସ୍ୟାରେ ପୀଡିତ ଅଛନ୍ତି । ତାଙ୍କୁ ତଦନ୍ତ ଆଳରେ ନିର୍ଯାତନା ଦିଆଯାଉଛି । ଯଦି ତାଙ୍କର କିଛି ହେବ, ତାହାଲେ ସେ ସିଧା ଭାରତୀୟ ଜନତା ପାର୍ଟି ଓ କେନ୍ଦ୍ରୀୟ ସଂସ୍ଥା ପ୍ରବର୍ତ୍ତନ ନିର୍ଦ୍ଦେଶାଳୟ ବିରୋଧରେ ମାମଲା କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
