ନୂଆଦିଲ୍ଲୀ: 3 ତାରିଖରେ ପ୍ରକାଶ ପାଇଥିବା 4 ରାଜ୍ୟର ବିଧାନସଭା ଫଳାଫଳରେ 3 ରାଜ୍ୟରେ ବିଜେପି କ୍ଷମତା ହାସଲ କରିଛି । ମାତ୍ର ଏହି ରାଜ୍ୟ ଗୁଡିକରେ ମୁଖ୍ୟମନ୍ତ୍ରୀ ଚୟନ ପ୍ରକ୍ରିୟା ଏ ପର୍ଯ୍ୟନ୍ତ ଶେଷ ହୋଇନି । ଦିଲ୍ଲୀରେ ପ୍ରଧାନମନ୍ତ୍ରୀଙ୍କ ସମେତ କେନ୍ଦ୍ରୀୟ ନେତୃତ୍ବ ଘନ ଘନ ବୈଠକ କରୁଥିବା ବେଳେ 3 ରାଜ୍ୟରେ ମୁଖ୍ୟମନ୍ତ୍ରୀ କି’ଏ ହେବେ ସେ ନେଇ ସମଗ୍ର ଦେଶର ନଜର ରହଛି । ଆଜି ସଂଧ୍ୟାରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଓ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଜି ପ୍ରଧାନମନ୍ତ୍ରୀଙ୍କ ସହ ସାକ୍ଷାତ କରିଛନ୍ତି । ତେଣୁ ଆସନ୍ତାକାଲି ଦଳ 3 ରାଜ୍ୟପାଇଁ କେନ୍ଦ୍ରୀୟ ପର୍ଯ୍ୟବେକ୍ଷକ ଘୋଷଣା କରିପାରନ୍ତି । ଏହି ପର୍ଯ୍ୟବେକ୍ଷକମାନେ ହିଁ 3 ରାଜ୍ୟରେ ନିର୍ବାଚିତ ବିଧାୟଙ୍କମାନଙ୍କ ସହ ଆଲୋଚନା କରି ମୁଖ୍ୟମନ୍ତ୍ରୀ ଚୟନ ପ୍ରକ୍ରିୟାରେ ନିର୍ଣ୍ଣାୟକ ନିଷ୍ପତ୍ତି ନେବା ନେଇ ଅନୁମାନ କରାଯାଉଛି ।
ଆଜି ଲୋକ କଲ୍ୟାଣ ମାର୍ଗ ସ୍ଥିତ ପ୍ରଧାନମନ୍ତ୍ରୀଙ୍କ ବାସଭବନରେ ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ତଥା ଦଳର ବଡ ହିନ୍ଦୁତ୍ବ ଚେହେରା ଯୋଗୀ ଆଦିତ୍ୟନାଥ ଓ ଅନ୍ୟ କିଛି ହାତଗଣତି ବରିଷ୍ଠ ନେତା ପ୍ରଧାନମନ୍ତ୍ରୀ ମୋଦିଙ୍କ ସହ ଆଲୋଚନା କରିଛନ୍ତି । କେନ୍ଦ୍ରୀୟ ପର୍ଯ୍ୟବେକ୍ଷକ ନିଯୁକ୍ତି ସହ ଉତ୍ତର ପ୍ରଦେଶରେ ମନ୍ତ୍ରୀମଣ୍ଡଳ ସମ୍ପ୍ରସାରଣ ପ୍ରସଙ୍ଗରେ ମୋଦିଙ୍କୁ ଯୋଗୀ ଭେଟିଛନ୍ତି ।
ଏହା ପରେ ଶାହ ପ୍ରଧାନମନ୍ତ୍ରୀଙ୍କ ସହ ପୃଥକ ଆଲୋଚନା କରିଥିଲେ । ପ୍ରାୟ ଘଣ୍ଟାଧିକ ସମୟ ଏହି ଆଲୋଚନା ଜାରି ରହିଥିଲା । ତେବେ ଆସନ୍ତାକାଲି ସୁଦ୍ଧା ଦଳ 3 ରାଜ୍ୟ ମଧ୍ୟ ପ୍ରଦେଶ, ଛତିଶଗଡ ଓ ରାଜସ୍ଥାନ ପାଇଁ କେନ୍ଦ୍ରୀୟ ପର୍ଯ୍ୟବେକ୍ଷକ ନିଯୁକ୍ତ କରିବ । ଏହା ପରେ ତିନି ରାଜ୍ୟରେ ନିର୍ବାଚିତ ବିଧାୟକ ଦଳ ବୈଠକ ହେବ । ଏହି ବୈଠକରେ ହିଁ ବିଧାୟକ ଦଳ ନେତା ନିର୍ବାଚିତ ହେବା ପରେ ସେ ହିଁ ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବେ ।
ରାଜସ୍ଥାନରେ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ସିନ୍ଧିଆ, ମଧ୍ୟ ପ୍ରଦେଶରେ ବର୍ତ୍ତମାନର ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଦାବିଦାର ଥିଲା ବେଳେ ଛତିଶଗଡରେ ମଧ୍ୟ ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂ ମୁଖ୍ୟମନ୍ତ୍ରୀ ଦାବିଦାର ରହିଛନ୍ତି । ଏହି ଶୀର୍ଷ ଦାବିଦାର ନେତାଙ୍କ ବ୍ୟତୀତ ତିନି ରାଜ୍ୟରେ ଏକାଧିକ ବରିଷ୍ଠ ଚେହେରା ମଧ୍ୟ ମୁଖ୍ୟମନ୍ତ୍ରୀ ଆଶାୟୀ ଭାବେ ରହିଛନ୍ତି । ବର୍ତ୍ତମାନ ସମୟରେ ଦଳର କେନ୍ଦ୍ରୀୟ କମିଟି ନିଷ୍ପତ୍ତି ହିଁ ମୁଖ୍ୟମନ୍ତ୍ରୀ ବାଛିବାରେ ନିର୍ଣ୍ଣାୟକ ହେବ । ଅନ୍ୟପଟେ 2024 ସାଧାରଣ ନିର୍ବାଚନକୁ ଦୃଷ୍ଟିରେ ରଖି 3 ରାଜ୍ୟରେ ପୂର୍ବ ମୁଖ୍ୟମନ୍ତ୍ରୀଙ୍କୁ ଚଳିତ ଥର ଦୋହରାଇବା ପରିବର୍ତ୍ତେ ଦଳ ନୂଆ ଚେହେରା ଉପରେ ବିଚାର ବିମର୍ଶ କରୁଥିବା ଚର୍ଚ୍ଚା ହେଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
