ପାଟନା: ଭକ୍ତି, ପ୍ରେମ ଏବଂ ସମର୍ଥନର ଭିନ୍ନ ଏକ ବାର୍ତ୍ତା ଦେଉଛି ବିହାରର ଗୟା ଅଞ୍ଚଳ । ଦିନ ଭରି ରମଜାନ ପାଳନ କରୁଥିବା ମୁସଲିମ୍ ଅଧିବାସୀ ରାମ ନବମୀ ପାଇଁ ପତାକା ପ୍ରସ୍ତୁତିରେ ଲାଗିପଡିଛନ୍ତି ଏଠାକାର ମୁସଲିମ ସମ୍ପ୍ରଦାୟର ଲୋକେ । ଚଳିତ ବର୍ଷ ଗୋଟିଏ ମାସରେ ରମଜାନ ଏବଂ ରାମ ନବମୀ ପଡୁଥିବାରୁ ସାମ୍ପ୍ରଦାୟିକ ହିଂସାର ଆଶଙ୍କା କରାଯାଉଛି । ମାତ୍ର ଏଠାରେ ଦୁଇ ପର୍ବକୁ ପାଳନ ପାଇଁ ବେଶ୍ ଉତ୍ସାହର ସହ ଲାଗି ପଡିଛନ୍ତି ଉଭୟ ସମ୍ପ୍ରଦାୟର ଲୋକେ ।
ଦିନେ ନୁହଁ କି ଦୁଇ ଦିନ ଦୀର୍ଘ ୭୦ ବର୍ଷ ହେବ ବିହାର ଗୟା ନିକଟ କେପି ରୋଡ ବଜାରରେ ରାମ ନବମୀ ପାଇଁ ମୁସଲିମ୍ ସମ୍ପ୍ରଦାୟର ଲୋକେ ପତାକା ପ୍ରସ୍ତୁତ କରିଆସୁଛନ୍ତି । ଜଣେ ବ୍ୟବସାୟୀ ମହମ୍ମଦ ରଶିଦ କହିଛନ୍ତି ଯେ, 'ରାମ ନବମୀ ପତାକା ପ୍ରସ୍ତୁତ କରିବା ପାଇଁ ସେ ବେଶ୍ ଆଗ୍ରହର ସହ ଅପେକ୍ଷା କରିଥାଏ । ପତାକା ପ୍ରସ୍ତୁତ କରି ବେଶ୍ ଖୁସି ଲାଗେ । ହିନ୍ଦୁ-ମୁସଲିମ ଏପରି ସାମ୍ପ୍ରଦାୟିକ ଭେଦଭାବକୁ ବିଶ୍ବାସ କରେ ନାହିଁ । ଭଗବାନ ଏକ ସେ ମୋତେ ଏହି କାମ ପାଇଁ ପଠାଇଛନ୍ତି ।' ମୁସଲିମ୍ ହୋଇ ରାମଙ୍କ ପୂଜା ପାଇଁ ପତାକା ପ୍ରସ୍ତୁତ କରୁଥିଲେ ମଧ୍ୟ କେବେ କୌଣସି ବ୍ୟକ୍ତିଙ୍କ ପକ୍ଷରୁ ବିବାଦର ଶିକାର ହୋଇନଥିବା କହିଛନ୍ତି ମହମ୍ମଦ । ଦେଶରେ ସାମ୍ପ୍ରଦାୟିକ ଦଙ୍ଗା ଖବର ଶୁଣିଲେ ଆଘାତ ଲାଗେ ବୋଲି ସେ କହିଛନ୍ତି ।
ତେବେ କେବଳ ଯେ ମହମ୍ମଦ କାହିଁକି, ତାଙ୍କ ଭାଇ, ପୁଅ ଏବଂ ପରିବାରର ଅନ୍ୟ ସଦସ୍ୟମାନେ ମଧ୍ୟ ରାମ ନବମୀ ପତାକା ପ୍ରସ୍ତୁତ କରିବା ପାଇଁ ବେଶ୍ ଆଗ୍ରହ ପ୍ରକାଶ କରିଥାନ୍ତି । ସେମାନେ କହିଛନ୍ତି ଯେ, ଆମେ କେବଳ ଟଙ୍କା ପାଇଁ କାମ କରୁନୁ, ସାମାଜିକ ସେବା ଉଦ୍ଦେଶ୍ୟରେ କାମ କରୁଛୁ । ଅନ୍ୟପଟେ ହିନ୍ଦୁ ବ୍ୟବସାୟୀ ମଧ୍ୟ ସେମାନଙ୍କୁ ସମର୍ଥନ ଜଣାଇଛନ୍ତି । ଜଣେ ହିନ୍ଦୁ ବ୍ୟବସାୟୀ କହିଛନ୍ତି ଯେ, ଏଠାରେ ଆମେ ସବୁବେଳେ ଭାଇ-ଭାଇ ହୋଇ କାମ କରିଥାଉ । ଉଭୟ ଉଭୟଙ୍କୁ ସାହାଯ୍ୟର ହାତ ବଢାଇଥାଉ । ମୁସଲିମ ସମ୍ପ୍ରଦାୟର ଲୋକେ ରାମଙ୍କ ପାଇଁ ପତାକା ପ୍ରସ୍ତୁତ କଲେ ମଧ୍ୟ ଆମେ କୌଣସି ବାଛ-ବିଚାର କରୁନା ବରଂ ଆମେ ତାଙ୍କୁ ସମର୍ଥନ ଜଣାଇଥାଉ । ସବୁଠୁ ବଡ କଥା ହେଉଛି କି ମହମ୍ମଦ ରଶିଦ ସୁନ୍ଦର ଏବଂ ଭଲ ପତାକା ପ୍ରସ୍ତୁତ କରିଥାନ୍ତି । ସେଥିପାଇଁ ତାଙ୍କ ନିକଟରେ ଲୋକଙ୍କ ଭିଡ ଲାଗିଥାଏ ।
ବ୍ୟୁରୋ ରିପୋର୍ଟ, ଇଟିଭି ଭାରତ
