ନୂଆଦିଲ୍ଲୀ: ୧୯୩୭ମସିହାରେ ଭାରତୀୟ ବ୍ୟୋମଯାନ ଆଇନ ସଂଶୋଧନ ନେଇ ବିଜ୍ଞପ୍ତି ପ୍ରକାଶ । ଏହି ସଂଶୋଧନ ଦେଶର ଉଡାଣ କ୍ଷେତ୍ରରେ ସୁରକ୍ଷା ଓ ନିରାପତ୍ତାକୁ ସୁଦୃଢ କରିବ । ସେହିଭଳି ବେସାମରିକ ଉଡାଣ ନିୟନ୍ତ୍ରଣ କ୍ଷେତ୍ରରେ କାର୍ଯ୍ୟକୁ ସହଜ ତଥା ସୁଗମ କରିବା ପାଇଁ ଏହା ବିଶେଷ ସହାୟକ ହେବ । ବେସମାରିକ ବିମାନ ଚଳାଚଳ କ୍ଷେତ୍ରକୁ ଅଧିକ ସମୟ ଉପଯୋଗୀ, ନିରାପଦ, ସୁରକ୍ଷିତ ଓ ଦକ୍ଷ କରିବା ପାଇଁ ଏହି ସଂଶୋଧନ ଏକ ଗୁରୁତ୍ବପୂର୍ଣ୍ଣ ପଦକ୍ଷେପ ।
ଉଡାଣ କ୍ଷେତ୍ର ସହିତ ସମ୍ପୃକ୍ତ ସବୁ ପକ୍ଷଙ୍କ ସହ ବ୍ୟାପକ ପରାମର୍ଶ ଓ ବିଚାର ଆଲୋଚନା ପରେ ସରକାର ୧୯୩୭ ଆଇନରେ ସଂଶୋଧନ ଆଣିଛନ୍ତି । ଏହା ଫଳରେ ଏହି କ୍ଷେତ୍ରର ନିରାପତ୍ତା, ସୁରକ୍ଷା ଓ ନିୟନ୍ତ୍ରଣ କ୍ଷେତ୍ରରେ କେତେକ ଗୁରୁତ୍ବପୂର୍ଣ୍ଣ ସଂସ୍କାର ଅଣାଯାଇଛି । ଏହି ସଂସ୍କାର ଫଳରେ ଭାରତ ବେସାମରିକ ଉଡାଣ ଓ ନିୟନ୍ତ୍ରଣ ନୀତି ଆନ୍ତର୍ଜାତିକ ନିୟମର ଅନୁରୂପ ହେବ ଏବଂ ଏଥିରେ ଭିନ୍ନତା ପ୍ରାୟତଃ ରହିବ ନାହିଁ । ନୂଆ ସଂଶୋଧିତ ବ୍ୟବସ୍ଥାରେ ଆନ୍ତର୍ଜାତିକ ବେସାମରିକ ଉଡାଣ ପ୍ରତିଷ୍ଠାନ ଆଇସିଏଓର ମାନକୁ ଗ୍ରହଣ କରାଯାଇଛି । ଏହାଛଡ଼ା ଉଡ଼ାଣ କ୍ଷେତ୍ରରେ ସୁରକ୍ଷା ଓ ନିରାପତ୍ତା ରକ୍ଷା ପାଇଁ ଆଇସିଏଓ ଯେଉଁ ମାନ ଓ ଶ୍ରେଷ୍ଠ ନୀତିକୁ ସୁପାରିସ କରିଛି ଭାରତର ସଂଶୋଧିତ ଆଇନ ତଦନୁସାରେ ପ୍ରସ୍ତୁତ ହୋଇଛି । ଏସବୁ ସଂସ୍କାରର କିଛି ଅଂଶକୁ ପ୍ରଥମେ ୨୦୨୩ ଏପ୍ରିଲ ୧୩ ତାରିଖ ଗେଜେଟ ବିଜ୍ଞପ୍ତିରେ ପ୍ରକାଶ କରାଯାଇଥିଲା । ସେଥିରେ ବିମାନ ଚଳାଚଳର ସୁଗମତା, ସୁରକ୍ଷା ଓ ନିରାପତ୍ତା ଦୃଷ୍ଟିରୁ ଉଡାଣରେ ପ୍ରତିବନ୍ଧକ ସୃଷ୍ଟି କରୁଥିବା ଭବନ ଓ ଗଛ ଆଦିକୁ ହଟାଇବାର ବ୍ୟବସ୍ଥା ରହିଛି । ବିଜ୍ଞପ୍ତି ଫଳରେ ଏହି ସଂଶୋଧିତ ଆଇନର କିଛି ଅଂଶ ପୂର୍ବରୁ କାର୍ଯ୍ୟକାରୀ ହୋଇସାରିଛି ।
ଅଧିକ ପଢନ୍ତୁ- ବାଦ ବିବାଦରେ ପ୍ରଥମ ଏୟାରକ୍ରାଫ୍ଟ ନିର୍ମାଣକାରୀ ଶିଭକର ତଲପଡେ
ବିମାନ ଉଡାଣ କ୍ଷେତ୍ରରେ ପ୍ରତିବନ୍ଧକ ସୃଷ୍ଟି କରୁଥିବା ଭବନ ଓ ଗଛ ଆଦିକୁ ହଟାଇବା ପାଇଁ ୧୯୯୪ର ଆଇନରେ ବ୍ୟବସ୍ଥା ଥିଲେ ମଧ୍ୟ ତାହା କାର୍ଯ୍ୟକାରୀ ହୋଇ ନ ଥିଲ । ୨୦୨୩ ଏପ୍ରିଲ ୧୩ରୁ ଏହା କାର୍ଯ୍ୟକାରୀ ହୋଇଛି ।
୧୯୩୭ ଭାରତୀୟ ବ୍ୟୋମଯାନ ଆଇନରେ ଯେଉଁ ଗୁରୁତ୍ବପୂର୍ଣ୍ଣ ସଂଶୋଧନ କରାଯାଇଛି ତାହା ହେଲା ଏୟାର ଲାଇନ୍ସର ଉଭୟ ଟାନ୍ସପୋର୍ଟ(ପରିବହନ) ଓ କମର୍ସିଆଲ (ବ୍ୟାବସାୟିକ) ପାଇଲଟଙ୍କ ଲାଇସେନ୍ସର ଅବଧିକୁ 5 ବର୍ଷରୁ ୧୦ବର୍ଷ କରାଯାଇଛି । ଏଥିପାଇଁ ୧୯୩୭ ଆଇନର ଧାରା ୩୯ ସିକୁ ସଂଶୋଧନ କରାଯାଇଛି । ଏହି ପରିବର୍ତ୍ତନ ଫଳରେ ପାଇଲଟ ମାନଙ୍କର ପ୍ରଶାସନିକ ବୋଝ ହ୍ରାସ ପାଇବ । ସେହିଭଳି ଡିଜିସିଏ ଭଳି ଉଡାଣ ପ୍ରାଧିକରଣଙ୍କ କାମ ବୋଝ ମଧ୍ୟ କମିବ ।
ଏହା ବ୍ୟତୀତ ୧୯୩୭ ଆଇନର ଧାରା ୬୬କୁ ପରିବର୍ତ୍ତନ କରାଯାଇଛି । ଏହି ଆଇନ ଅନୁସାରେ ବିମାନ ବନ୍ଦର ବା ଏରୋଡ୍ରୋମ ଆଖ ପାଖରେ ‘ଫଲସ ଲାଇଟ’ ପ୍ରଦର୍ଶନ ନିଷିଦ୍ଧ କରିବା । ଏହା ଲଣ୍ଠନ ଆଲୋକ, ଲେଜର ଲାଇଟ ବା ଉଇସ ଲାଇଟ୍ସ ହୋଇପାରେ । ସଂଶୋଧିତ ବ୍ୟବସ୍ଥା ଅନୁସାରେ ଏହି ‘ଫଲସ ଲାଇଟ’ ପ୍ରଦର୍ଶନ କରିବାର ଅଧିକାର କ୍ଷେତ୍ରକୁ ପାଞ୍ଚ କିଲୋମିଟରରୁ ବିମାନ ବନ୍ଦରର ପାଞ୍ଚ ନଟିକାଲ ମାଇଲ ପର୍ଯ୍ୟନ୍ତ ବୃଦ୍ଧି କରାଯାଇଛି । ଏହି ପରିସୀମା ମଧ୍ୟରେ କୌଣସି ବ୍ୟକ୍ତିବିଶେଷ ବା ଅନୁଷ୍ଠାନ ଯଦି ଫଲସ ଲାଇଟ ପ୍ରଦର୍ଶନ କରନ୍ତି ତା’ ହେଲେ ସରକାର ନିରାପତ୍ତା ଦୃଷ୍ଟିରୁ ଏହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବେ । କାରଣ ଏଭଳି ଆଲୋକ ପ୍ରଦର୍ଶନ ଦ୍ବାରା ବୈମାନିକ ବିଭ୍ରାନ୍ତ ହୋଇପାରନ୍ତି । ବିମାନ ଚଳାଚଳରେ ବିଭ୍ରାଟ ସୃଷ୍ଟି ହୋଇପାରେ । ଯଦି ଏହି ପରିସୀମା ଭିତରେ କେହି ଏଭଳି ଫଲସ ଆଲୋକ ପ୍ରଦର୍ଶନ କରନ୍ତି ଏବଂ ୨୪ଘଣ୍ଟା ପର୍ଯ୍ୟନ୍ତ ଏହା ପ୍ରଦର୍ଶିତ ହୁଏ ତା’ ହେଲେ ସରକାର ସମ୍ପୃକ୍ତ ଇଲାକାରେ ପ୍ରବେଶ କରି ସେହି ଆଲୋକକୁ ଲିଭାଇବାକୁ ନୂଆ ଆଇନ ଦ୍ବାରା ଅଧିକାର ପାଇଛନ୍ତି ।
ଅନ୍ୟପଟେ ଧାରା ୧୧୮ ରେ ସଂଶୋଧନ କରାଯାଇ ବିଦେଶୀ ଲାଇସେନ୍ସର ବୈଧତାକୁ ରଦ୍ଦ କରାଯାଇଛି । ଏହା ଫଳରେ ଆନ୍ତର୍ଜାତିକ ବିମାନ ଉଡାଣ ସଂକ୍ରାନ୍ତ ଲାଇସେନ୍ସ ନୀତି ମଧ୍ୟ ଭାରତରେ ଗ୍ରହଣୀୟ ହେବ । ଉଡାଣ କ୍ଷେତ୍ରରେ ପରିବର୍ତ୍ତିତ ଆବଶ୍ୟକତାକୁ ବିଚାରକୁ ନେଇ ଏହି ସଂଶୋଧନ କରାଯାଇଛି । ଏଥି ସହିତ ଏୟାର ଟ୍ରାଫିକ କଣ୍ଟ୍ରୋଲ ଲାଇସେନ୍ସଧାରୀଙ୍କ ଲାଇସେନ୍ସ ସହିତ ସେମାନଙ୍କର ଦକ୍ଷତା ଓ କର୍ତ୍ତବ୍ୟ ପରାୟଣତା ଉପରେ ଅଧିକ ଗୁରୁତ୍ବ ଦିଆଯାଇଛି । ତେବେ ଏହି ପ୍ରାର୍ଥୀମାନଙ୍କ ନିଯୁକ୍ତି ସର୍ତ୍ତାବଳୀକୁ ଅନେକାଂଶରେ କୋହଳ କରାଯାଇଛି । ସେମାନଙ୍କ ଦକ୍ଷତା ବିକାଶ ଓ ତାଲିମକୁ ସଂଶୋଧିତ ଆଇନରେ ଗୁରୁତ୍ବ ଦିଆଯାଇଛି । ୧୯୩୭ର ବେସାମରିକ ଉଡାଣ ଆଇନରେ ଯେଉଁସବୁ ସଂଶୋଧନ ଓ ସଂସ୍କାର ଅଣାଯାଇଛି ତାହା ବିମାନ ଉଡାଣ କ୍ଷେତ୍ରରେ ସୁରକ୍ଷା ଓ ନିରାପତ୍ତାକୁ ବିଚାରକୁ ନେଇ କରାଯାଇଛି । ଏହା ବ୍ୟତୀତ ସମୟର ଆବଶ୍ୟକତା ଦୃଷ୍ଟିରୁ କେତେକ ପୁରୁଣା ଆଇନ ପରିବର୍ତ୍ତନ ଜରୁରୀ ଥିଲା । ଏହି ସଂଶୋଧିତ ଆଇନ କାର୍ଯ୍ୟକାରୀ ହେବା ପରେ ଭାରତୀୟ ବେସାମରିକ ଉଡାଣ କ୍ଷେତ୍ର ସୁଦୃଢ଼ ହେବା ସହିତ ଏହାର ଦକ୍ଷତା ଓ ନିରାପତ୍ତା ବଢିବ । ଏହା ଦ୍ବାରା ବୈଶ୍ବକ ମାନରକ୍ଷା ସହିତ ଉତ୍ତମ ଅଭିବୃଦ୍ଧି ହାସଲ ହେବ ଏବଂ ଭାରତ ଆନ୍ତର୍ଜାତିକ ଉଡ଼ାଣ କ୍ଷେତ୍ରରେ ଅଗ୍ରଣୀ ରାଷ୍ଟ୍ର ହୋଇପାରିବ ।
