ମୁମ୍ବାଇ: ମହାରାଷ୍ଟ୍ର ପୁଣେରେ ୯ ବର୍ଷର ନାବାଳକକୁ ଯୌନ ନିର୍ଯାତନା । ମସଜିଦକୁ ନମାଜ ପାଠ କରିବାକୁ ଯାଇଥିବା ବେଳେ ଧାର୍ମିକ ପୀଠରେ ଏଭଳି ଘଟଣାର ଶିକାର ହୋଇଛନ୍ତି ନାବାଳକ । ପୀଡିତ ନାବାଳକର ମାମୁଁ କନ୍ଧୱା ପୋଲିସ ଷ୍ଟେସନରେ ଅଭିଯୋଗ କରିବା ପରେ ଘଟଣା ସାମ୍ନାକୁ ଆସିଛି । ଅଭିଯୁକ୍ତର ନାମ ମହମ୍ମଦ ୟୁସୁଫ ଜଣାପଡ଼ିଥିବା ବେଳେ ପୋଲିସ ପୋକ୍ସୋ ଆକ୍ଟରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
ମିଳିଥିବା ସୂଚନା ଅନୁସାରେ ଗତ ୧୦ ତାରିଖରେ କନ୍ଧୱା ଠାରେ ଏହି ଘଟଣା ଘଟିଛି । ପୋଲିସର ସୂଚନା ଅନୁସାରେ ଅଭିଯୋଗକାରୀଙ୍କ ଭଉଣୀ କନ୍ଧୱା ଚେତନ ଗାର୍ଡେନ ନିକଟରେ ରୁହନ୍ତି । ସେ ଯେତେବେଳେ ନିଜ ଭଉଣୀ ଘରକୁ ବୁଲିବାକୁ ଯାଇଥିଲେ, ସେତେବେଳେ ଭଣଜା ନମାଜ ପାଠ କରିବାକୁ ମସଜିଦ ଯାଉନଥିବା ସେ ଜାଣିବାକୁ ପାଇଥିଲେ । ଏହାର କାରଣ ସମ୍ପର୍କରେ ସେ ଭଣଜାକୁ ପଚାରିଥିଲେ । ଏହାପରେ ପୀଡ଼ିତ ନାବାଳିକର ଭଉଣୀ ଜଣକ ଅଭିଯୋଗକାରୀଙ୍କୁ ଘଟଣା ସମ୍ପର୍କରେ ଅବଗତ କରାଇଥିଲେ ।
ଏହା ବି ପଢନ୍ତୁ- ଶ୍ରୀମନ୍ଦିରରେ ନାବାଳକକୁ ଯୌନ ନିର୍ଯାତନା ଅଭିଯୋଗ
କଣ ଥିଲା ଘଟଣା ? କନ୍ଧୱା ଓସମାନିଆ ମସଜିଦକୁ ପୀଡ଼ିତ ନାବାଳକ ଓ ତାର କିଛି ସାଙ୍ଗ ନମାଜ ପାଠ କରିବାକୁ ଯାଇଥିଲେ । ନମାଜ ପାଠ ପରେ ଯେତେବେଳେ ମସଜିଦରୁ ସମସ୍ତେ ପଳାଇଥିଲେ, ସେହି ସମୟରେ ଅଭିଯୁକ୍ତ ଜଣକ ତାକୁ ନମାଜ କିପରି ପାଠ କରାଯାଏ ସେ ସମ୍ପର୍କରେ ଶିଖାଇଦେବାକୁ କହି ଏକ ରୁମକୁ ଡାକିଥିଲେ । ଉକ୍ତ ଅଭିଯୁକ୍ତ ଜଣକ ମସଜିଦର ଏକ କୋଠରୀରେ ରହୁଥିଲା । ପ୍ରଥମେ ପୀଡିତ ଓ ତାର ବନ୍ଧୁକୁ ନମାଜ କିପରି ପଠାଯାଏ ସେ ସମ୍ପର୍କରେ ଶିଖାଇଥିଲା । ଏହାପରେ ପୀଡ଼ିତ ନାବାଳକର ସାଙ୍ଗକୁ ଯିବା ଲାଗି କହିଥିଲା । ଏହାପରେ ସେ ୯ ବର୍ଷର ନାବାଳକକୁ ଯୌନ ନିର୍ଯାତନା ଦେଇଥିବା ଅଭିଯୋଗ ହୋଇଛି ।
ଏହି ଘଟଣା ପରେ ପୀଡିତ ନାବାଳକ ଜଣକ ପରିବାରକୁ ଏ ନେଇ ଅବଗତ କରାଇଥିଲେ । ବଦନାମ ଭୟରେ ଏହି ଘଟଣା ସମ୍ପର୍କରେ ମୁହଁ ଖୋଲିନଥିଲେ ପୀଡିତର ପରିବାର । ହେଲେ ଏ ସମ୍ପର୍କରେ ପୀଡିତଙ୍କ ମାମୁଁ ତଥା ଅଭିଯୋଗକାରୀ ଜାଣିବା ପରେ ଥାନାରେ ପହଞ୍ଚିଥିଲେ । କନ୍ଧୱା ପୋଲିସ ଷ୍ଟେସନରେ ସେ ଏକ ଲିଖିତ ଅଭିଯୋଗ କରିଥିବା ବେଳେ ତଦନ୍ତ ଆରମ୍ଭ କରିଛନ୍ତି । ସେପଟେ ଅଭିଯୁକ୍ତ ଜଣକ ଫେରାର ଥିବା ଜଣାପଡିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
