ବେଙ୍ଗାଲୁରୁ: କର୍ଣ୍ଣାଟକ ହୁବଳିରେ ଏକ ଯାତ୍ରାବାହୀ ବସ ଏକ ଲରି (ଟ୍ରକ)କୁ ଧକ୍କା ଦେବା ଫଲରେ ଘଟଣାସ୍ଥଳରେ 8 ଜଣଙ୍କ ମୃତ୍ୟୁ ଘଟିବା ସହ 20 ଜଣ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ଦୁଇ ଗାଡିର ଡ୍ରାଇଭରଙ୍କ ସମେତ ଯାତ୍ରୀ ମଧ୍ୟ ରହିଛନ୍ତି । ଗତକାଲି ମଧ୍ୟରାତ୍ରୀରେ ଏହି ଦୁର୍ଘଟଣା ଘଟିଛି । ଆହତଙ୍କୁ ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରୁ ପ୍ରାୟ 5ରୁ 6 ଜଣଙ୍କ ଅବସ୍ଥା ଗୁରୁତର ରହିଥିବା ମଧ୍ୟ ସୂଚନା ମିଳିଛି ।
ସ୍ଥାନୀୟ ପୋଲିସର ସୂଚନା ଅନୁସାରେ, ଯାତ୍ରୀବାହୀ ବସଟି ମହାରାଷ୍ଟ୍ରର କୋହ୍ଲାପୁରରୁ ବେଙ୍ଗାଲୁରୁ ଯାଉଥିବାବେଳେ ହୁବଳିର ବେଲଗାଭି ନିକଟରେ ବିପରୀତ ଦିଗରୁ ଆସୁଥିବା ଏକ ଲରିକୁ ଧକ୍କା ହୋଇଥିଲା । ବସଟି ଏକ ଟ୍ରାକ୍ଟରକୁ ଓଭରଟେକ କରୁଥିବା ବେଳେ ଏପରି ଦୁର୍ଘଟଣା ଘଟିଥିବା ପାରିପାର୍ଶ୍ବିକ ସ୍ଥିତିରୁ ସନ୍ଦେହ କରାଯାଉଛି ।
ତେବେ ମୃତକଙ୍କ ପରିଚୟ ମଧ୍ୟ ସ୍ପଷ୍ଟ ହୋଇଛି । ମୃତକଙ୍କ ମଧ୍ୟରେ ଅଧିକାଂଶ ମହାରାଷ୍ଟ୍ରର ହୋଇଥିବା ପ୍ରାଥମିକ ଭାବେ ଜଣାପଡିଛି । ଆହତଙ୍କୁ ସମସ୍ତ ପ୍ରକାର ତ୍ବରିତ ଚିକିତ୍ସା ସୁବିଧା ଯୋଗାଇବା ପାଇଁ ବ୍ୟବସ୍ଥା କରିଛି ସ୍ଥାନୀୟ ପ୍ରଶାସନ ।
ବ୍ୟୁରୋ ରିପୋର୍ଟ, ଇଟିଭି ଭାରତ
