କୋଲକାତା: ପଶ୍ଚିମବଙ୍ଗରେ ଚାଲିଛି ବିଧାନସଭା ନିର୍ବାଚନ । ଏଥିଲାଗି ରାଜ୍ୟରେ ଗୋଟିଏ ପରେ ଗୋଟିଏ ନିର୍ବାଚନୀ ହିଂସା ଦେଖିବାକୁ ମିଳିଛି । ରାଜ୍ୟରେ 2ଟି ପର୍ଯ୍ୟାୟ ମତଦାନ ପ୍ରକ୍ରିୟା ଶେଷ ହେଉଥିବା ବେଳେ ଏପ୍ରିଲ 6 ତାରିଖରେ ହେବ 3ୟ ପର୍ଯ୍ୟାୟ ମତଦାନ । ତେବେ ଏହାରି ମଧ୍ୟରେ ଦକ୍ଷିଣ 24 ପ୍ରଗଣା ଜିଲ୍ଲାରୁ 41ଟି ଅଫୁଟା ବୋମାକୁ ଗତ ଶୁକ୍ରବାର ଉଦ୍ଧାର କରାଯାଇଛି ।
ବୋମା ରହିଥିବା ସମ୍ପର୍କରେ ବିଶେଷ ସୂତ୍ରରୁ ଖବର ପାଇବା ପରେ ଜିଲ୍ଲାର ପଦ୍ମପୁକୁର ଅଞ୍ଚଳରେ ଭାଙ୍ଗୋର ପୋଲିସ ଚଢାଉ କରିଥିଲା । ତେବେ ଏହି ଚଢାଉ ସମୟରେ ଏକ ବୁଦା ଅଞ୍ଚଳରୁ 41ଟି ଅଫୁଟା ବୋମାକୁ ଜବତ କରାଯାଇଥିବା ଦକ୍ଷିଣ 24 ପ୍ରଗଣାର ଜିଲ୍ଲା ନିର୍ବାଚନ ଅଧିକାରୀ ସୂଚନା ଦେଇଛନ୍ତି । ଏହି ଘଟଣାରେ କାହାରିକୁ ଗିରଫ କରାଯାଇନଥିବା ବେଳେ ଅଧିକ ତଦନ୍ତ ଜାରି ରହିଛି ବୋଲି ସେ କହିଛନ୍ତି ।
ରାଜ୍ୟରେ ବିଧାନସଭା ଆସନ ପାଇଁ ପ୍ରଥମ ଓ ଦ୍ବିତୀୟ ପର୍ଯ୍ୟାୟ ଭୋଟ ଗ୍ରହଣ ପ୍ରକ୍ରିୟା ଯଥାକ୍ରମେ ମାର୍ଚ୍ଚ 27 ଓ ଏପ୍ରିଲ 1 ତାରିଖରେ ଶେଷ ହୋଇଛି । ଏହାପରେ 3ୟ ପର୍ଯ୍ୟାୟ ଭୋଟ ଗ୍ରହଣ ଆସନ୍ତା ଏପ୍ରିଲ 6 ତାରିଖରେ ଅନୁଷ୍ଠିତ ହେବ । ତେବେ ରାଜ୍ୟରେ ମୋଟ 8ଟି ପର୍ଯ୍ୟାୟରେ ନିର୍ବାଚନ ପାଇଁ ଭୋଟ ଗ୍ରହଣ କରାଯିବ ।
@ANI
