ନୂଆଦିଲ୍ଲୀ: ୨୦୨୦ ମେ-ଜୁନ ମାସରେ ପୂର୍ବ ଲଦାଖ ସୀମାରେ ମୁହାଁମୁହିଁ ହୋଇଥିଲେ ଭାରତ-ଚୀନ । ଦୁଇ ଦେଶର ସେନାଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ଘଟିଥିଲା । ଯେଉଁଥିରେ ଅନେକ ଭାରତୀୟ ଯବାନ ମଧ୍ୟ ଶହୀଦ ହୋଇଯାଇଥିଲେ । ତେବେ ଏହି ସଂଘର୍ଷରେ ଡ୍ରାଗନ ସେନା ବିରୁଦ୍ଧରେ ସାହାସିକତାର ସହ ମୁକାବିଲା ପାଇଁ ଆଜି ୨୦ ଜଣ ITBP ଯବାନଙ୍କୁ ପୋଲିସ ମେଡାଲ ଫର ଗାଲାଣ୍ଟ୍ରି (ପିଏମଜି) ପଦକ ପ୍ରଦାନ କରାଯାଇଛି ।
ITBPର ୬୦ତମ ପ୍ରତିଷ୍ଠା ଦିବସ ପାଳନ ଅବସରରେ ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ସେହି ବୀର ଯବାନମାନଙ୍କ ସାହାସିକତା ପାଇଁ ପିଏମଜି ପଦକ ସହ ସେମାନଙ୍କୁ ପ୍ରମାଣପତ୍ର ପ୍ରଦାନ କରିଛନ୍ତି । ଏହି ପଦକଗୁଡିକ ଚଳିତ ବର୍ଷ ଅଗଷ୍ଟ 14 ତାରିଖ ଦିନ ସ୍ୱାଧୀନତା ଦିବସ ଉପଲକ୍ଷେ ଘୋଷଣା କରାଯାଇଥିଲା।
ଗତ ବର୍ଷ ଜୁନ ୧୫ ତାରିଖରେ ଗଲୱାନ ନଲ୍ଲା ଅଞ୍ଚଳରେ ଚୀନ ସହ ଜୋରଦାର ସଂଘର୍ଷ ଘଟିଥିଲା । ଏହି ସଂଘର୍ଷ ସମୟରେ ବୀରତାପୂର୍ଣ୍ଣ କାର୍ଯ୍ୟ, ଉଚ୍ଚକୋଟୀର ଯୋଜନା ଏବଂ ସାମରିକ ଦୂରଦୃଷ୍ଟି ସହ ଚୀନର ମୁକାବିଲା କରି ଦେଶମାତୃକାର ସେବା କରିବା ପାଇଁ ଉକ୍ତ ୨୦ ଜଣ ଯବାନଙ୍କ ମଧ୍ୟରୁ ୮ ଜଣଙ୍କୁ PMG ପଦକ ଦିଆଯାଇଛି । ମେ ୧୮ରେ Finger IV ଅଞ୍ଚଳରେ ଘଟିଥିବା ରକ୍ତପାତରେ ଡ୍ରାଗନ ସେବା ଆଗରେ ଅଡି ରହି ବୀରତାର ସହ ମୁକାବିଲା ପାଇଁ ଅନ୍ୟ ୬ ଜଣ ଯବାନଙ୍କୁ PMG ସମ୍ମାନ ପ୍ରଦାନ କରାଯାଇଛି ।
ସେହିପରି ସମାନ ଦିନ ଲଦାଖର ହଟ ସ୍ପିଙ୍ଗ ନିକଟରେ ଘଟିଥିବା ସଂଘର୍ଷରେ ଚୀନ ସେନାକୁ କଡା ଜବାବ ଦେବା ନେଇ ବାକି ୬ ଜଣ ITBP ଯବାନଙ୍କୁ ପୋଲିସ ମେଡାଲ ଫର ଗାଲାଣ୍ଟ୍ରି(ପିଏମଜି) ମିଳିଛି ।
PTI
