ନୂଆଦିଲ୍ଲୀ: ଦିଲ୍ଲୀରେ କୋରୋନା ସଂକ୍ରମଣ ମାମଲା ଧିରେଧିରେ ନିୟନ୍ତ୍ରଣକୁ ଆସୁଥିବାବେଳେ ମୃତ୍ୟୁ ହାରରେ କିନ୍ତୁ ରୋକ ଲାଗିବାର ପ୍ରଶ୍ନ ଉଠୁନାହିଁ । ତେବେ ମୃତ୍ୟୁ ସଂଖ୍ୟା ଅଧିକ ରହୁଥିବାରୁ ଶ୍ମଶାନରେ ମଧ୍ୟ ମୃତଦେହ ସତ୍କାର କରିବା ପାଇଁ ସ୍ଥାନ ଓ ଆବଶ୍ୟକୀୟ ଭିତ୍ତିଭୂମିର ଅଭାବ ଗତ କିଛିଦିନ ଧରି କ୍ରମାଗତ ଦେଖିବାକୁ ମିଳିଆସୁଛି । ଆଜି ଦିଲ୍ଲୀର ଗାଜିପୁର ଶ୍ମଶାନରେ ମୃତଦେହ ସତ୍କାର ନେଇ ଏକ ବିରଳ ଘଟଣା ଦେଖିବାକୁ ମିଳିଛି ।
ଦୁଇ ଖ୍ରୀଷ୍ଟିଆନ ଧର୍ମାବଲମ୍ବୀ ମୃତକଙ୍କ ସତ୍କାର ହିନ୍ଦୁ ପାରମ୍ପରିକ ଶୈଳୀରେ ସମ୍ପନ୍ନ ହୋଇଥିବା ଦେଖିବାକୁ ମିଳିଛି । ଖ୍ରୀଷ୍ଟିଆନ ଧର୍ମ ପରମ୍ପରା ଅନୁସାରେ ମୃତଦେହ ପୋତା ହେବାର ପରମ୍ପରା ଥିବାବେଳେ ସ୍ଥାନ ଅଭାବରୁ ପୋତିବା ପରିବର୍ତ୍ତେ ଦାହ କରାଯାଇଛି । ଗାଜୀପୁର ଶ୍ମଶାନ ଘାଟର ମୁଖ୍ୟ ପୂଜାରୀଙ୍କ କହିବା ଅନୁସାରେ ଦୁଇ ଖ୍ରୀଷ୍ଟ ଧର୍ମାବଲମ୍ବୀଙ୍କ ପାଇଁ କବର ସ୍ଥାନରେ ସ୍ଥାନ ନମିଳିବାରୁ ହିନ୍ଦୁ ରୀତିନୀତି ଅନୁସାରେ ଗାଜିପୁର ଶ୍ମଶାନ ଘାଟ ଅଣାଯାଇଥିଲା । ସେଠାରେ ଉଭୟ ମୃତଦେହକୁ ଦାହ କରାଯାଇଛି ।
ହିନ୍ଦୁ ଧର୍ମାନୁସାରେ ଦାହ ପରେ ଚିତାଗ୍ନୀ ସଂଗ୍ରହ କରାଯିବା ସହ ଯମୁନା ନଦୀରେ ପରିବାର ଲୋକେ ବିସର୍ଜନ ମଧ୍ୟ କରିଛନ୍ତି । ତେବେ ଘଟଣାକୁ ନେଇ କୌଣସି ବିବାଦ ସୃଷ୍ଟି ନହେବା ନେଇ ସବୁ ପ୍ରକାର ସରକାରୀ ପ୍ରକ୍ରିୟା ଅବଲମ୍ବନ କରାଯିବା ସହ ସମସ୍ତ କାଗଜ ପତ୍ର ମଧ୍ୟ ପ୍ରସ୍ତୁତ କରି ପରିବାର ଲୋକଙ୍କୁ ହସ୍ତାନ୍ତର ସରିଥିବା ଶ୍ମଶାନଘାଟ କର୍ତ୍ତୃପକ୍ଷ ସୂଚନା ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
