ଲକ୍ଷ୍ନୌ: ଉତ୍ତରପ୍ରଦେଶର ପ୍ରତାପଗଡର ମାଣିକପରୁରେ ମର୍ମନ୍ତୁଦ ସଡକ ଦୁର୍ଘଟଣା । ବିବାହ ଉତ୍ସବରୁ ଫେରୁଥିବା ବେଳେ ବୋଲେରୋଟି ନିୟନ୍ତ୍ରଣ ହରାଇ ଟ୍ରକ ସହ ପିଟି ହେବା ଫଳରେ 14 ଜଣଙ୍କର ଅକାଳ ମୃତ୍ୟୁ ହୋଇଛି ।
ସୂଚନାଅନୁସାରେ, ମୃତକମାନେ ନବାଜଗଜ ଅଞ୍ଚଳ ଶେଖପରୁରୁ ଏକ ବିବାହ ଉତ୍ସବରେ ଯୋଗ ଦେଇ ବୋଲେରୋରେ ଫେରୁଥିଲେ । ରାସ୍ତାରେ ଛିଡା ହୋଇଥିବା ଗୋଟିଏ ଟ୍ରକ ସହ ବୋଲେରୋଟି ପିଟି ହେବା ଫଳରେ ଭୟଙ୍କର ସଡକ ଦୁର୍ଘଟଣା ହୋଇଛି । ଦୁର୍ଘଟଣାର ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ସେଠାରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା । ଘଟଣାସ୍ଥଳରୁ 14 ଜଣଙ୍କର ମୃତଦେହ ଉଦ୍ଧାର କରିଛି ପୋଲିସ ।
ତେବେ ଗାଡି ଡ୍ରାଇଭରର ଆଖି ଲାଗିଯିବାରୁ ଦୁର୍ଘଟଣା ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି । ମୃତକଙ୍କ ମଧ୍ୟ ଜଣେ ଶିଶୁ ଥିବାବେଳେ 6ଜଣ ନାବାଳକ ଥିବା ଜଣାପଡିଛି । 12ଜଣ ମୃତକ ଜିଗ୍ରାପୁର ଚୋଷା ଗାଁର ବୋଲି ଜଣାପଡିଛି ।
ଦୁର୍ଘଟଣା ଏତେ ଭୟଙ୍କର ଥିଲା ଯେ ପୋଲିସକୁ ମୃତଦେହ ଉଦ୍ଧାର କରିବାକୁ ପ୍ରାୟ ଦୁଇଘଣ୍ଟା ଲାଗିଥିଲା । ଗ୍ୟାସ କଟରରେ ବୋଲୋରକୁ କାଟି ମୃତଦେହକୁ ଉଦ୍ଧାର କରିଥିଲା ପୋଲିସ । 14ଜଣଙ୍କର ଅକାଳ ମୃତ୍ୟୁରେ ଗାଁ ଓ ପରିବାରରେ ଶୋକର ଛାୟା ଖେଳିଯାଇଛି ।
ଘଟଣାରେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଗଭୀର ଶୋକପ୍ରକାଶ କରିବା ସହ ମୃତକଙ୍କ ପରିବାରକୁ ସମସ୍ତ ସହାୟତା ଯୋଗାଇ ଦେବାରୁ ନିର୍ଦ୍ଦେଶ ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
