ଭୁବନେଶ୍ବର: ପାଳନ ହୋଇଛି ରାଜ୍ୟସ୍ତରୀୟ ବନ୍ୟପ୍ରାଣୀ ସପ୍ତାହ । ଏହି ଅବସରରେ ରାଜ୍ୟରେ କିପରି ବନ୍ୟପ୍ରାଣୀଙ୍କୁ ସୁରକ୍ଷା ଦିଆଯିବ ସେନେଇ ବିସ୍ତୃତ ଆଲୋଚନା ହୋଇଥିଲା । ସେପଟେ ସାତକୋଶିଆ ବ୍ୟାଘ୍ର ପ୍ରକଳ୍ପ ପାଇଁ ଲୋକେ ସ୍ବେଚ୍ଛାକୃତ ସ୍ଥାନାନ୍ତରଣ ପ୍ରକ୍ରିୟାକୁ ସହଯୋଗ କରୁଥିବା ସୂଚନା ଦେଇଛନ୍ତି ପିସିସିଏଫ୍ ସୁଶାନ୍ତ ନନ୍ଦ ।
ସ୍ଥାନାନ୍ତରଣ ହେବେ ଜଙ୍ଗଲ ମଧ୍ୟରେ ଥିବା ଗାଁ:
ଏନେଇ ପିସିସିଏଫ୍ ସୁଶାନ୍ତ ନନ୍ଦ କହିଛନ୍ତି,"ସାତକୋଶିଆ ଅଭୟାରଣ୍ୟରୁ ୬ଟି ଗାଁ ସ୍ଵେଚ୍ଛାକୃତ ଭାବେ ସ୍ଥାନାନ୍ତରିତ ହୋଇ ସାରିଛି । ଆଉ ୩ଟି ଗାଁ ସ୍ଥାନାନ୍ତରିତ ପାଇଁ ଇଚ୍ଛା ପ୍ରକାଶ କରିଛନ୍ତି । ଆଗାମୀ ଦିନରେ ସେମାନଙ୍କୁ ଜଙ୍ଗଲ ଆଖପାଖରେ ନରଖି ଜାତୀୟ ରାଜପଥ ନହେଲେ ରାଜ୍ୟ ରାଜପଥ ନିକଟରେ ଜାଗା ଦେବା ନେଇ ସ୍ଥିର ହୋଇଛି । ଗୋଟିଏ ପରିବାର ଜଙ୍ଗଲ ମଧ୍ୟରୁ ଗଲେ ୨୦ ଲକ୍ଷ ଟଙ୍କା କ୍ଷତି ପୂରଣ ଦେବାର ବ୍ୟବସ୍ଥା ରହିଛି । ଯଦି ୨୦ ଲକ୍ଷ ନ ନିଅନ୍ତି ତେବେ ଘରଡିହ ସହ ୧୫ ଲକ୍ଷ ଦେବା ନେଇ ବ୍ୟବସ୍ଥା ରହିଛି । ଏହାସହ ସରକାରଙ୍କ ବିଭିନ୍ନ ଯୋଜନାରେ ସେହି ପରିବାରଙ୍କୁ ସାମିଲ କରାଯିବ । ସେହିପରି ଶିମିଳିପାଳ ଅଭୟାରଣ୍ୟରୁ ସ୍ଥାନାନ୍ତାରିତ ହୋଇଥିବା ଗ୍ରାମବାସୀଙ୍କୁ ବାରିପଦା ଓ ଖୁଣ୍ଟା ରାସ୍ତାରେ ଥଇଥାନ ପାଇଁ ସ୍ଥାନ ଚିହ୍ନଟ ହୋଇଛି । ସାତକୋଶିଆ ଅଭୟାରଣ୍ୟରୁ ସ୍ଥାନାନ୍ତରିତ ହୋଇଥିବା ଗ୍ରାମବାସୀ ସାତକୋଶିଆ- ନରସିଂହପୁର ସୀମାରେ ଜାଗା ଚିହ୍ନଟ ହୋଇଛି । ସେହିପରି ଅନୁଗୋଳ ଓ ଛେଣ୍ଡିପଦା ମଧ୍ୟରେ ଜାତୀୟ ରାଜପଥକୁ ଲାଗି ଏକ ଜାଗା ଚିହ୍ନଟ ହୋଇଛି । "
ହାତୀ ଯୋଗୁଁ ଯାଉଛି ସର୍ବାଧିକ ଜୀବନ:
ହାତୀ ମଣିଷ ଲଢେଇରେ ପ୍ରତିବର୍ଷ ୧୬୦ ରୁ ୧୮୦ ମଣିଷଙ୍କ ଜୀବନ ଯାଉଛି । ସେଥିରୁ ୯୦% ଜଙ୍ଗଲ ବାହାରେ ଘଟୁଛି । ହାତୀ ଯୋଗୁଁ ସର୍ବାଧିକ ଜୀବନ ଯାଉଛି ।
ମଞ୍ଜାବନ୍ଧରେ କଳାବାଘ ସଫାରୀ:
ସେହିପରି ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ କହିଛନ୍ତି,"ଜନସଂଖ୍ୟା ବଢ଼ିବାରେ ଲାଗିଛି । ବିକାଶ ହେବ, କିନ୍ତୁ ଜୀବଜନ୍ତୁଙ୍କୁ ମଧ୍ୟ ସୁରକ୍ଷା ଦେବାକୁ ପଡ଼ିବ । ଶିମିଳିପାଳରେ ଅନେକ ପଦକ୍ଷେପ ହାତକୁ ନିଆଯାଇଛି । ୧୯ଟି ଅଭୟାରଣ୍ୟ ଅଛି । ପ୍ରକୃତିର ସବୁ କିଛି ଓଡ଼ିଶାରେ ରହିଛି । ରାଜ୍ୟର ମାତ୍ର ୫.୬୯ % ଅଞ୍ଚଳରେ ଜୀବଜନ୍ତୁ ଅଛନ୍ତି । ସେମାନଙ୍କୁ କିଭଳି ସୁରକ୍ଷା ଯୋଗାଇ ଦିଆଯିବ ତାହା ମୁଖ୍ୟ ଆହ୍ଵାନ । ମଞ୍ଜାବନ୍ଧରେ କଳାବାଘ ସଫାରୀ କରାଯିବ । ହାତୀ ଉପରେ ନଜର ରଖିବାକୁ ରେଡିଓ କଲାର୍ କରାଯାଉଛି । ଗୋଠଛଡା ଅମାନିଆ ହାତୀଙ୍କୁ କୁମକୀ ଟ୍ରେନିଂ ଦିଆଯାଉଛି । 'ଆମ ଜଙ୍ଗଲ ଯୋଜନା' ଭଳି କିଛି ନୂଆ ଜୀବନ ଜୀବିକା ଯୋଜନା ଘୋଷଣା ହେବ ।"
ବଢିବ କ୍ଷୟକ୍ଷତି ଅର୍ଥରାଶି:
ଇଟିଭି ଭାରତ, ଭୁବନେଶ୍ବର
