ଭୁବନେଶ୍ୱର: ପୁଣି ଅସୁସ୍ଥ ହେଲେ କେନ୍ଦ୍ର ଆଦିବାସୀ ବ୍ୟାପର ମନ୍ତ୍ରୀ ଜୁଏଲ ଓରାମ । ଡେଙ୍ଗୁରେ ଆକ୍ରାନ୍ତ ହୋଇ ସୁସ୍ଥ ହୋଇଥିଲେଷ । ତେବେ ପୁଣି ଥରେ ଜୁଏଲଙ୍କର ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ତାଙ୍କୁ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଛି । ଗତକାଲି (ସୋମବାର) ବିଳମ୍ବିତ ରାତିରେ ଏମ୍ସର ନ୍ୟୁ-ପ୍ରାଇଭେଟ ଓ୍ବାର୍ଡରେ ଓରାମଙ୍କୁ ଭର୍ତ୍ତି କରାଯାଇଥିବା ସୂଚନା ମିଳିଛି । ତାଙ୍କ ସ୍ବାସ୍ଥ୍ୟବସ୍ଥା ସ୍ଥିର ରହିଛି । ଏକ ସ୍ବତନ୍ତ୍ର ଡାକ୍ତରୀ ଟିମ ତାଙ୍କ ଚିକିତ୍ସାରେ ନିୟୋଜିତ ହୋଇଛନ୍ତି । ବର୍ତ୍ତମାନ ତାଙ୍କ ସ୍ବାସ୍ଥ୍ୟବସ୍ଥା ସ୍ଥିର ରହିଛି । ଡେଙ୍ଗୁରେ ଆକ୍ରାନ୍ତ ହୋଇ ଗତ ଶନିବାର ଜୁଏଲଙ୍କ ପତ୍ନୀ ଝିଙ୍ଗିଆ ଓରାମଙ୍କ ଦେହାନ୍ତ ହୋଇଥିଲା । ପୂର୍ବରୁ ଜୁଏଲ ଗତ 11 ତାରିଖରେ ଡେଙ୍ଗୁରେ ଆକ୍ରାନ୍ତ ହୋଇଥିବା ଟେଷ୍ଟରୁ ଡଣାପଡିଥିଲା । ଭୁବନେଶ୍ବରର ଏକ ଘରୋଇ ହସ୍ପିଟାଲରେ କିଛିଦିନ ଚିକିତ୍ସିତ ହେବା ପରେ ତାଙ୍କୁ ଡିସଚାର୍ଯ୍ୟ କରାଯାଇଥିଲା ।
- ଶନିବାର ଆଖି ବୁଜିଥିଲେ ପତ୍ନୀ ଝିଙ୍ଗିଆ:-
ନିକଟରେ ଡେଙ୍ଗୁରେ ଓରାମ ଓ ତାଙ୍କ ପତ୍ନୀ ଝିଙ୍ଗିଆ ଆକ୍ରାନ୍ତ ହୋଇଥିଲେ । ଉଭୟ ଭୁବନେଶ୍ବର ଏକ ଘରୋଇ ହସ୍ପିଟାଲରେ ଭର୍ତ୍ତି ହୋଇ ଚିକିତ୍ସାଧୀନ ଥିଲେ । ଜୁଏଲଙ୍କ ସ୍ବାସ୍ଥ୍ୟବସ୍ଥାରେ ଉନ୍ନତି ଆସିବାରୁ ତାଙ୍କୁ ହସ୍ପିଟାଲରୁ ଡିସଚାର୍ଚ କରାଯାଇଥିଲା । ମାତ୍ର ଶନିବାର ରାତିରେ ଜୁଏଲଙ୍କ ପତ୍ନୀ ଝିଙ୍ଗିଆ ଓରାମଙ୍କ ଦେହାନ୍ତ ହୋଇଥିଲା । ତାଙ୍କୁ 58 ବର୍ଷ ବୟସ ହୋଇଥିଲା । ଡେଙ୍ଗୁରେ ପୀଡିତ ହେବା ପରେ ପ୍ରାୟ ଏକ ସପ୍ତାହେ ଧରି ସେ ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିଲେ । ଶରୀରର ପ୍ଲେଟଲେଟ ହ୍ରାସ ପାଇବାରୁ ତାଙ୍କର ଅବସ୍ଥା ସଙ୍କଟାପନ୍ନ ରହିଥିଲା । ଶନିବାର ରାତି ପ୍ରାୟ 10ଟା 30 ସମୟରେ ସେ ଶେଷନିଶ୍ବାସ ତ୍ୟାଗ କରିଥିଲେ ।
ପତ୍ନୀଙ୍କ ମରଶରୀର ଧରି ସୁନ୍ଦରଗଡରେ ମଧ୍ୟ ଜୁଏଲ ଓରାମ ପହଞ୍ଚିଥିଲେ । ପରେ ତାଙ୍କଠାରେ ପୁଣି ସ୍ବସ୍ଥ୍ୟଗତ ଜଟିଳତା ପ୍ରକାଶ ପାଇଥିଲା । ଗତକାଲି ତାଙ୍କୁ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଛି । ଅନ୍ୟପଟେ ରାଜଧାନୀରେ ଢେଙ୍ଗୁ ସଂକ୍ରମଣ ଏବେ ଭୟ ସୃଷ୍ଟି କରିଛି । ମନ୍ତ୍ରୀ ଓରାମଙ୍କ ଭୁବନେଶ୍ବରସ୍ଥିତ ବାସଭବନରେ ବିଏମସି କର୍ମଚାରୀ ପହଞ୍ଚି ସ୍ଥିତି ଯାଞ୍ଚ କରିଥିଲା । ମଶା ଜନ୍ମ ନେବା ଓ ଡେଙ୍ଗୁ ବ୍ୟାପିବା ପରି ଅସ୍ବାସ୍ଥ୍ୟକର ସ୍ଥିତିର ଯାଞ୍ଚ କରିଥିଲା ଏହି ଟିମ ।
ଇଟିଭି ଭାରତ, ଭୁବନେଶ୍ବର
