ଭୁବନେଶ୍ବର: ପୋଲାଭରମ ପ୍ରକଳ୍ପକୁ ନେଇ ଦୀର୍ଘ ବର୍ଷ ହେଲା ଓଡ଼ିଶା ଓ ଆନ୍ଧ୍ରପ୍ରଦେଶ ମଧ୍ୟରେ ବିବାଦ ଲାଗି ରହିଛି । କାରଣ ଏହି ପ୍ରକଳ୍ପ ହେଲେ ଓଡ଼ିଶାର ଅନେକ ଗାଁ ବୁଡିଯିବ । ମାଲକାନଗିରି ଓ ଗଜପତି ଜିଲ୍ଲା ବିଶେଷ କ୍ଷତିଗ୍ରସ୍ତ ହେବ । ଏହାସତ୍ତ୍ବେ ଓଡ଼ିଶାର ସ୍ବାର୍ଥକୁ ଅଣଦେଖା କରାଯାଇ ଆଜି ବଜେଟରେ ପୋଲାଭରମ ପ୍ରକଳ୍ପ ପାଇଁ କେନ୍ଦ୍ରୀୟ ଅନୁଦାନ ଘୋଷଣା କରିଛନ୍ତି ମୋଦି ସରକାର । ଏହି ପ୍ରକଳ୍ପ କାର୍ଯ୍ୟ ଶୀଘ୍ର ଶେଷ କରିବାକୁ ପଦକ୍ଷେପ ନିଆଯିବ ବୋଲି ଅର୍ଥମନ୍ତ୍ରୀ ସୀତାରମଣ ଘୋଷଣା କରିଛନ୍ତି । ଅର୍ଥମନ୍ତ୍ରୀଙ୍କ ଏହି ବଜେଟ ଘୋଷଣାକୁ ଓଡ଼ିଶା ବିରୋଧୀ କହି ପ୍ରବଳ ବର୍ଷିଛନ୍ତି ଉଭୟ ବିଜେଡି ଓ କଂଗ୍ରେସ । ଓଡ଼ିଶାବାସୀ ବିଜେପିକୁ ବହୁମତ ଦେଇ ଜିତାଇଥିବାବେଳେ ବିଜେପି ସେମାନଙ୍କ ପ୍ରତି ବିଶ୍ବାସଘାତକ କରିଥିବା ବିରୋଧୀ ଅଭିଯୋଗ କରିଛନ୍ତି ।
ପୋଲାଭରମ ପ୍ରକଳ୍ପର ପରିକଳ୍ପନା ଦିନଠାରୁ ଏହା ବହୁ ବାଦବିବାଦ ଦେଇ ଗତି କରୁଛି । ମାମଲା ଟ୍ରିବ୍ୟୁନାଲ ବିଚାରଧୀନ ରହିଛି । ଏବେ ଓଡ଼ିଶା ଓ ଆନ୍ଧ୍ରପ୍ରଦେଶରେ ବିଜେପି ସରକାର ଆସିବା ପରେ ଏହି ମାମଲାର ସମାଧାନ ହେବ ବୋଲି ଆଶା କରାଯାଉଥିଲା । ମାତ୍ର ଆଜିର ବଜେଟ ଘୋଷଣା ଓଡ଼ିଶାକୁ ଶକ୍ତ ଆଘାତ ଦେଇଛି । ଏନଡିଏ ସହଯୋଗୀ ଦଳକୁ ସନ୍ତୁଷ୍ଟ କରିବାକୁ ଓଡ଼ିଶାର ସ୍ବାର୍ଥକୁ ଅଣଦେଖା କରାଯାଇଛି ବୋଲି ଅଭିଯୋଗ କରିଛନ୍ତି ବିରୋଧୀ ନେତା ।
କେନ୍ଦ୍ର ବଜେଟରେ ପୋଲାଭରମ ପାଇଁ ଅନୁଦାନ ଘୋଷଣା ପରେ ଓଡ଼ିଶା ରାଜନୀତିରେ ତୁମ୍ବିତୋଫାନ ଆରମ୍ଭ ହୋଇଯାଇଛି । ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, ''ଏହା ଓଡ଼ିଶା ପ୍ରତି ସମ୍ପୂର୍ଣ୍ଣ ପକ୍ଷପାତିତା । ଅନ୍ୟ ଦଳମାନଙ୍କୁ ଭାର ଦେଇ କେନ୍ଦ୍ର ସରକାର ତିଷ୍ଠିଛି । ତେଣୁ ସେମାନଙ୍କୁ ସନ୍ତୁଷ କରିବା ପାଇଁ ଓଡିଶା ସ୍ବାର୍ଥକୁ ବ୍ୟାଘାତ କରୁଛନ୍ତି । ପୂର୍ବତନ ନବୀନ ସରକାର ବାରମ୍ବାର ପୋଲାଭରମ ପ୍ରକଳ୍ପରେ ଓଡ଼ିଶା ସ୍ବାର୍ଥକୁ ଦୃଷ୍ଟି ଦେବାକୁ କେନ୍ଦ୍ରକୁ ଅବଗତ କରିଥିଲେ । ହେଲା ଆଜି ବଜେଟରେ ଏହି ପ୍ରକଳ୍ପ ପାଇଁ ଅନୁଦାନ ଘୋଷଣା ଓଡ଼ିଶା ସ୍ବାର୍ଥ ପ୍ରତି ପ୍ରଚଣ୍ଡ ଆଘାତ । ନିଜ ସ୍ବାର୍ଥ ପୂରଣ ପାଇଁ ରାଜ୍ୟ ରାଜ୍ୟ ଭିତରେ ବିଭେଦ ସୃଷ୍ଟି କରୁଛନ୍ତି କେନ୍ଦ୍ର ସରକାର ।''
All the BJD MPs in Rajya Sabha Walked Out of the Rajya Sabha today when the Union Budget was being laid, strongly protesting the continued neglect of Odisha in the Union Budget. Before Walking out, the BJD MPs strongly said in the House that they are walking out due to denial of…
— ଡ଼ଃ ସସ୍ମିତ ପାତ୍ର I Dr. Sasmit Patra (@sasmitpatra) July 23, 2024
ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି, ଓଡ଼ିଶା, ଆନ୍ଧ୍ରପ୍ରଦେଶ ଓ ବିହାର ସ୍ବତନ୍ତ୍ର ରାଜ୍ୟ ପାହ୍ୟା ଦାବି କରିଥିଲେ । ହେଲେ କେବଳ ଆନ୍ଧ୍ର ଓ ବିହାର ପାଇଁ ସ୍ବତନ୍ତ୍ର ପ୍ୟାକେଜ ଘୋଷଣା ହେଲା କିନ୍ତୁ ଓଡ଼ିଶାକୁ ଦଣ୍ଡ ଦିଆଗଲା । ଓଡ଼ିଶାବାସୀ ୨୧ ଲୋକସଭା ଆସନରୁ ୨୦ ଆସନରେ ବିଜେପି ସାଂସଦକୁ ଜିତାଇଛନ୍ତି । ତଥାପି ଓଡ଼ିଶାର ଦାବିକୁ ଅବହେଳା କରାଯାଇଛି ।
କଂଗ୍ରେସ ବିଧାୟିକା ସୋଫିଆ ଫିର୍ଦ୍ଦୋସ କହିଛନ୍ତି, "ପୋଲାଭରମ ହେଲେ ଓଡ଼ିଶାର ଅନେକ ଗାଁ ବୁଡିଯିବ । ତଥାପି କେନ୍ଦ୍ର ସରକାର ଓଡ଼ିଶାର ସ୍ବାର୍ଥ ଦେଖିଲେ ନାହିଁ । ଆନ୍ଧ୍ରରେ ବିଜେପି ସରକାର ଥାଇ ମଧ୍ୟ ଓଡିଶା ସ୍ବାର୍ଥକୁ ଅଣଦେଖା କଲେ । ଆରମ୍ଭରୁ ଓଡ଼ିଶାବାସୀଙ୍କ ସହ ବିଜେପି ବିଶ୍ବାସଘାତ କରିଛି ।" ସେହିପରି କଂଗ୍ରେସର ବିଧାୟକ ଦଳ ନେତା ରାମଚନ୍ଦ୍ର କାଡାମ୍ ମଧ୍ୟ ଏହି ପ୍ରସଙ୍ଗ ଉପରେ ପ୍ରତିକ୍ରିୟା ରଖି କହିଛନ୍ତି ଯେ ଏହି ପ୍ରକଳ୍ପ ବିରୋଧରେ କଂଗ୍ରେସ ଆନ୍ଦୋଳନକୁ ଓହ୍ଲାଇବ । ଜୋରଦାର ବିରୋଧ କରାଯିବ ।
ଅନ୍ୟପଟେ ପୋଲାଭରମ ନେଇ ପ୍ରତିକ୍ରିୟା ରଖିଛି ଶାସକ ଦଳ । ପୋଲାଭରମ ପ୍ରସଙ୍ଗରେ ବିଜେପି ବିଧାୟକ ସନତ ଗର୍ତିଆ କହିଛନ୍ତି ଯେ, ଓଡ଼ିଶାର ସ୍ବାର୍ଥ ପାଇଁ ରାଜ୍ୟ ସରକାର ଚିନ୍ତା କରିବେ । ପୋଲାଭରମ ପାଇଁ ଅର୍ଥ ଦିଆଯାଇଛି କିନ୍ତୁ ଓଡ଼ିଶାର କ୍ଷତି ହେଲେ ରାଜ୍ୟ ସରକାର ଏ ଦିଗରେ ପଦକ୍ଷେପ ନେବେ ।
ପୋଲାଭରମ ପ୍ରକଳ୍ପ ହେଲେ ଓଡ଼ିଶାର ଉପାନ୍ତ ଜିଲ୍ଲା ପ୍ରଭାବିତ ହେବ । ଏହି ପ୍ରକଳ୍ପ ଦ୍ବାରା ମାଲକାନଗିରି ଜିଲ୍ଲାରେ ପ୍ରାୟ 30 ହଜାର ଜନସାଧାରଣ ପ୍ରଭାବିତ ହେବେ । ମୋଟୁ ତହସିଲର କିଛି ଅଂଶ ବୁଡିଯିବାର ସମ୍ଭାବନା ରହିଛି । ମୋଟୁ ଅଞ୍ଚଳର ପ୍ରାୟ 50ରୁ ଉର୍ଦ୍ଧ୍ବ ଗାଁ ବୁଡିଯିବାର ସମ୍ଭାବନା ରହିଛି । ଯାହାକୁ ବିରୋଧ କରିଛନ୍ତି ଉଭୟ କଂଗ୍ରେସ ଓ ବିଜେଡି ।
ଇଟିଭି ଭାରତ, ଭୁବନେଶ୍ବର
