କଟକ: ନୂଆ ଡିଜି ଭାବରେ ଆଜି କାର୍ଯ୍ୟରେ ଯୋଗ ଦେଇଛନ୍ତି ବରିଷ୍ଠ ଆଇପିଏସ ଯୋଗେଶ ବାହାଦୂର ଖୁରାନିଆ । କଟକ ବକ୍ସିବଜାର ସ୍ଥିତ ପୋଲିସ ମୁଖ୍ୟାଳୟରେ ଆଜି ଅପରାହ୍ନରେ ଯୋଗଦେବା ସହ ଶହୀଦଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ନୂଆ ଡିଜି । ଏହି ଅବସରରେ ନୂତନ ଡିଜିଙ୍କୁ ଗାର୍ଡ ଅଫ ଅନର ପ୍ରଦାନ କରାଯାଇଥିଲା । ପରେ ଡିଜି ସମସ୍ତ ପୋଲିସ ଅଧିକାରୀଙ୍କ ସହ ହାତ ମିଳାଇଥିଲେ । ଏହାପରେ କାର୍ଯ୍ୟାଳୟକୁ ଯାଇ ସମସ୍ତ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଦାୟିତ୍ବ ଗ୍ରହଣ କରିଥିଲେ ଡିଜି ।
ଦାୟିତ୍ବ ନେବା ପରେ କଣ କହିଲେ ନୂଆ ପୋଲିସ ଡିଜି ?
ଡିଜିପି ଯୋଗେଶ ବାହାଦୂର ଖୁରାନିଆ କହିଛନ୍ତି, "ଓଡ଼ିଶା ପୋଲିସର ସ୍ବତନ୍ତ୍ରତା ରହିଛି । ଦାୟିତ୍ବ ନେଇ ମୁଁ ଗର୍ବିତ । ଓଡ଼ିଶାବାସୀଙ୍କୁ ଆଇନ ସେବା ଯୋଗାଇବା ମୋର ମୁଖ୍ୟ କର୍ତ୍ତବ୍ୟ ରହିବ । ମାଓ ମୁକାବିଲାରେ ଓଡ଼ିଶା ପୋଲିସ ଅନେକ ସଫଳତା ହାସଲ କରିଛି । ମାଓ ଦମନରେ ଶହୀଦ ହୋଇଥିବା ପୋଲିସ କର୍ମଚାରୀଙ୍କୁ ଶ୍ରଦ୍ଧାଞ୍ଜଳି ଜଣାଉଛି । ପୋଲିସର ଅପରାଧ ନିୟନ୍ତ୍ରଣରେ ବୈଜ୍ଞାନିକ ପଦ୍ଧତି ଉପରେ ଧ୍ୟାନ ଦିଆଯିବ । ସାଇବର ଅପରାଧ ରୋକିବା ଦିଗରେ ଫୋକସ କରିବ ଓଡ଼ିଶା ପୋଲିସ । ମାଦକ ଦ୍ରବ୍ୟ ରୋକିବା ପାଇଁ କଠୋର କାର୍ଯ୍ୟନୁଷ୍ଠାନ ନିଆଯିବ । ଜନଜାତିଙ୍କ ଉପରେ ହେଉଥିବା ଜୁଲମ ମୂଳୋତ୍ପାଟନ କରିବ ପୋଲିସ ।"
Shri Yogesh Bahadur Khurania, IPS took over as DGP, Odisha today at State Police Hdqrs., Cuttack. An officer of 1990 batch, he served in various capacities in the State and Govt. of India. Prior to this assignment, he was Special Director General, BSF, New Delhi. pic.twitter.com/0gUBdAilla
— Odisha Police (@odisha_police) August 16, 2024
'ସମ୍ପୂର୍ଣ୍ଣ ଦମନ ହେବ ଲାଲବାହିନୀ'
ମାଓ ଦମନରେ ଓଡ଼ିଶା ପୋଲିସ ସଫଳତା ପାଇଛି । ଆଗାମୀ ଦିନରେ ଓଡ଼ିଶାରେ ସମ୍ପୂର୍ଣ୍ଣ ଦମନ ହେବେ ମାଓବାଦୀ । ବାଂଲାଦେଶ ଅନୁପ୍ରବେଶକାରୀଙ୍କୁ ରୋକିବା ଦିଗରେ ଏକ ଗୁରୁତ୍ବପୂର୍ଣ୍ଣ ବୈଠକ ହେବ ବୋଲି କହିଛନ୍ତି ପୋଲସ ଡିଜି ୱାଇ.ବି ଖୁରାନିଆ । କେବଳ ସେତିକି ନୁହେଁ ଥାନାକୁ ଆସୁଥିବା ସମସ୍ତ ସାଧାରଣ ଲୋକଙ୍କ ପ୍ରତି ପୋଲିସର ଯେପରି ଉତ୍ତମ ବ୍ୟବହାର ରହିବ ସେନେଇ ପଦକ୍ଷେପ ନିଆଯିବ ବୋଲି ଡିଜି କହିଛନ୍ତି ।
ପୋଲିସ ଡିଜି ଅରୁଣ ଷଡ଼ଙ୍ଗୀଙ୍କ ସରିଲା କାର୍ଯ୍ୟକାଳ:-
ଗତ ବର୍ଷ ଡିସେମ୍ବର ମାସରେ ଓଡ଼ିଶା ପୋଲିସର ଅତରିକ୍ତ ଡିଜି ହିସାବରେ ନିଯୁକ୍ତି ପାଇଥିଲେ ଅରୁଣ ଷଡ଼ଙ୍ଗୀ । କାର୍ଯ୍ୟକାଳ ସରିବା ପରେ ପୂର୍ବତନ ପୋଲିସ ଡିଜି ଅରୁଣ ଷଡ଼ଙ୍ଗୀ ମତ ରଖି କହିଛନ୍ତି, "ସାଢେ 7ମାସ ଯାତ୍ରା ବେଶ ଭଲ ରହିଲା । ଏହାରି ଭିତରେ ବହୁତ ଚ୍ୟାଲେଞ୍ଜ ସାମ୍ନା କରିଛି ଓଡ଼ିଶା ପୋଲିସ । କେମିତି ନିର୍ବାଚନ ପ୍ରକ୍ରିୟା ସଫଳତାର ସହ ଓ ଶାନ୍ତିପୂର୍ଣ୍ଣ ନିର୍ବାଚନ ଶେଷ ହେବ ତାହା ଓଡ଼ିଶା ପୋଲିସ ପାଇଁ ଥିଲା ବଡ଼ ଚ୍ୟାଲେଞ୍ଜ । 26ବର୍ଷ ପରେ ମାଓ ହିଂସା ମୁକ୍ତ ନିର୍ବାଚନ ଓଡ଼ିଶାରେ ହୋଇଥିଲା । ଏହାବ୍ୟତୀତ ରଥଯାତ୍ରା ମଧ୍ୟ ପୋଲିସ ପାଇଁ ବଡ଼ ଚ୍ୟାଲେଞ୍ଜ ଥିଲା । ନବ ଯୌବନ ଦର୍ଶନ, ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଗସ୍ତ, ନୂଆ ଅପରାଧିକ ଆଇନକୁ ସୁରୁଖୁରୁରେ ଲାଗୁ କରାଯାଇଛି।"
ସେ ଆହୁରି କହିଛନ୍ତି, "ବାଲେଶ୍ଵରର କିଛି ଜାଗାରେ ଗୋଷ୍ଠୀ ଉତ୍ତେଜନାର ସାମ୍ନା କରିଥିଲା ପୋଲିସ । ତାହାକୁ ମଧ୍ୟ ଅତି ଶୀଘ୍ର ରୋକ ଲଗାଯାଇଥିଲା । ଏହାବ୍ୟତୀତ ଅବକାରୀ ରେଡ ଉପରେ ସଫଳତା ହାସଲ କରିଛି ଓଡ଼ିଶା ପୋଲିସ । ଅପରାଧର ଅନୁସନ୍ଧାନ ନିରାକରଣ ବେଶ ଉଚ୍ଚକୋଟୀର ରହିଥିଲା । ଓଡ଼ିଶା ପୋଲିସର ପ୍ରତ୍ୟେକ କର୍ମଚାରୀ ମୋର କାର୍ଯ୍ୟକାଳରେ ଭଲ କାର୍ଯ୍ୟ କରିଛନ୍ତି । ସମସ୍ତଙ୍କ ସହ ଅତିବାହିତ ହୋଇଥିବା ସମୟ ସ୍ମରଣୀୟ ।"
ଇଟିଭି ଭାରତ, କଟକ
