ଭୁବନେଶ୍ବର: ରାଜ୍ୟରେ ଶୁଭାରମ୍ଭ ହେବ ସୁଭଦ୍ରା ଯୋଜନା । ଏହାର ଶୁଭାରମ୍ଭ ପାଇଁ ଆସନ୍ତା 17ରେ ଦିନିକିଆ ଓଡ଼ିଶା ଗସ୍ତରେ ଆସୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଜନତା ମଇଦାନରେ ହେବାକୁ ଥିବା କାର୍ଯ୍ୟକ୍ରମ ପାଇଁ ସୁରକ୍ଷା ବ୍ୟବସ୍ଥା ହୋଇଛି । ମହିଳାଙ୍କ ସମାଗମ ଦୃଷ୍ଟିରୁ ପର୍ଯ୍ୟାପ୍ତ ମହିଳା ଅଫିସର ନିୟୋଜନ ପାଇଁ ପୋଲିସ ପକ୍ଷରୁ ବ୍ୟବସ୍ଥା କରାଯାଇଛି ।
ପୋଲିସର ଗୁରୁ ଦାୟିତ୍ବ:
ଏନେଇ ସୁରକ୍ଷା ବ୍ୟବସ୍ଥାର ପ୍ରସ୍ତୁତି ର ସମୀକ୍ଷା କରିଛନ୍ତି ପୋଲିସ କମିଶନର । ଏନେଇ ସେ ସୂଚନା ଦେଇ କହିଛନ୍ତି, ‘ଦୁଇଟି କାର୍ଯ୍ୟକ୍ରମ ରହିଛି ପ୍ରଧାନମନ୍ତ୍ରୀ ଆବାସ ଯୋଜନାର ହିତାଧିକାରୀଙ୍କ ସହ ଆଲୋଚନା କରିବେ ଗାଢକଣରେ । ଅନ୍ୟଟି ସୁଭଦ୍ରା ସ୍କିମ ଓ ଅନ୍ୟ ସ୍କିମର କାର୍ଯକ୍ରମରେ ଯୋଗଦେବେ ଜନତା ମଇଦାନରେ । ଏୟାରପୋର୍ଟରୁ ଗାଢକଣ ଓ ଜନତା ମଇଦାନ ପର୍ଯ୍ୟନ୍ତ ସୁରକ୍ଷା ଓ ଗାର୍ଡ ଗୁରୁ ଦାୟିତ୍ବ ରହିଛି ଆମର । ତେଣୁ ଏୟାରପୋର୍ଟରୁ ୧୨କିମି ରୁଟ ରହିଛି ଏନେଇ ବିଭିନ୍ନ ସେକ୍ଟର କରାଯାଇଛି । ଏଥିପାଇଁ ରୁଟ ଲାଇନ ଦାୟିତ୍ଵରେ ଆଇଜି ସଫିନ ଅହମ୍ମଦ କେ ଓ ଜୟନାରାୟଣ ପଙ୍କଜ ରହିବେ ସେହିପରି ଜନତା ମଇଦାନର ଦାୟିତ୍ବରେ ଆଇଜି ପର୍ସନେଲ ପ୍ରବୀଣ କୁମାର ଦାୟିତ୍ବରେ ରହିବେ । ଏନେଇ ବୁକ୍ ଅନୁସାରେ ଏନଏସଜି ସହ ଆଲୋଚନା କରି ସମସ୍ତ ସୁରକ୍ଷା ବ୍ୟବସ୍ଥା କରାଯାଇଛି । ଜନତା ମଇଦାନରେ ମହିଳାଙ୍କ ସାମଗମକୁ ଦୃଷ୍ଟିରେ ରଖି ଅଧିକ ମହିଳା ଅଫିସର ଓ ଅଧିକ ଫୋର୍ସ ମଧ୍ୟ ନିୟୋଜିତ ପାଇଁ ବ୍ୟବସ୍ଥା କରିଛୁ ।’
ଦାୟିତ୍ବରେ ଅଧିକାଂଶ ଲେଡି ଅଫିସର:
ଏନେଇ ୧୧ଜଣ ଡିସିପି ସହ ୨୨ଜଣ ଏଡିସିପି ଓ ୬୬ ଜଣ ଏସିପି ଓ ୧୦୦ଇନସ୍ପେକ୍ଟର ସହ ୩୦୦ ଅଫିସର ଦାୟିତ୍ବରେ ରହିବେ। ୮୧ପ୍ଲାଟୁନ ଫୋର୍ସ ସହ ୫୦୦ ହୋମଗାର୍ଡ ମଧ୍ୟ ନିୟୋଜିତ ହେଉଛନ୍ତି । ଏସଟିୟୁ ୩ୟୁନିଟ ସହ ୨ କମ୍ପାନି ସିଆରପିଏଫ ଟିମ୍ ଓ ଓଡ୍ରାଫ ଟିମ୍ ମଧ୍ୟ ନିୟୋଜିତ ହେବେ । ନୋ ଫ୍ଲାଇଙ୍ଗ ଜୋନ ଭାବେ ଘୋଷଣା କରଯାଇଛି । ଡଗସ୍କ୍ବାର୍ଡ ଓ ବମ ସ୍କାର୍ଡ ଦ୍ବାରା ରାସ୍ତା ଓ କାର୍ଯ୍ୟକ୍ରମସ୍ଥଳୀ ପର୍ଯାୟ କ୍ରମେ ଯାଞ୍ଚ କରାଯାଉଛି । ତେବେ ନିୟୋଜିତ ହେବାକୁ ଥିବା ଅଫିସରଙ୍କ ମଧ୍ୟରେ ଅଧିକାଂଶ ଲେଡି ଅଫିସର ରହିଛନ୍ତି । ଏନେଇ ବିଜୁପଟ୍ଟନାୟକ ପୋଲିସ ଏକାଡେମିରୁ ଟ୍ରେନିଂ ଲେଡି ଅଫିସର ମଧ୍ୟ ଆସିଛନ୍ତି ପ୍ରଧାନମନ୍ତ୍ରୀଙ୍କ ଡ୍ୟୁଟିରେ ନିୟୋଜିତ ହେବେ । ଏନେଇ କିଛି ଲେଡି ଆଇପିଏସ ମଧ୍ୟ ଦାୟିତ୍ବ ଦିଆଯାଇଛି । ୧୦ଜଣ ଡିଏସପି, ୨୦ଇନସ୍ପେକ୍ଟର, ୪୦ଅଫିସର ଲେଡି ଅଫିସର ମହିଳାଙ୍କ ସମାଗମକୁ ଦୃଷ୍ଟିରେ ରଖି ପରିଚାଳନା ପାଇଁ ପୋଲିସ ବନ୍ଦୋବସ୍ତ କରିଛି ।
ଗାଢ଼କଣ ଗାଁ ପର୍ଯ୍ୟନ୍ତ ସିସିଟିଭି:
ତେବେ ପ୍ରଧାନମନ୍ତ୍ରୀଙ୍କ ଗସ୍ତ ସମୟକୁ ଦୃଷ୍ଟିରେ ରଖି ଏୟାରପୋର୍ଟରୁ ୧୨କିମି ରହିଛି କାର୍ଯ୍ୟକ୍ରମ । ସେନେଇ ୧୨କିମି ପର୍ଯ୍ୟନ୍ତ ସିସିଟିଭି ବନ୍ଦୋବସ୍ତ କରାଯାଇଛି । ସିସିଟିଭି ସର୍ଭିଲାନ୍ସରେ ରହିବ ପୁରା ରୁଟ ଲାଇନ ଓ କାର୍ଯ୍ୟକ୍ରମ । ଏଥି ସହ ଦୁଇଟି କଣ୍ଟ୍ରୋଲ ରୁମ୍ ମଧ୍ୟ କରାଯାଇଛି । ଜନତା ମଇଦାନରେ ଓ ଅନ୍ୟଟି ଗାଢକଣ ଗାଁରେ ମଧ୍ୟ ଏକ କଣ୍ଟ୍ରୋଲ ରୁମ୍ ଜରିଆରେ ସୁରକ୍ଷା ବ୍ୟବସ୍ଥା ଉପରେ ଧ୍ୟାନ ଦିଆଯିବ । ଏଥି ସହ ଟ୍ରାଫିକ ପରିଚାଳନା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯିବ । ଏନେଇ ସୋମବାର ଏହାର ରିହଲର୍ସଲ କାର୍ଯ୍ୟକ୍ରମ ରହିଛି । କିଭଳି ଟ୍ରାଫିକ ଓ ଅଫିସର ମୁତୟନ ଉପରେ ଆଜିର ବୈଠକରେ ଗୁରୁତ୍ବ ଦିଆଯାଇଛି ।
ଆସୁଛନ୍ତି ମୋଦି, ସ୍କୁଲ କଲେଜ ଛୁଟି:
ପ୍ରଧାନମନ୍ତ୍ରୀଙ୍କ ଦୃଷ୍ଟିରେ ରଖି ରାଜଧାନୀରେ ସମସ୍ତ ସ୍କୁଲ ଓ କଲେଜ ବନ୍ଦ ରହିବ । ଏନେଇ ରାଜ୍ୟ ସରକାର ଘୋଷଣା କରିଛନ୍ତି । ଏଥିସହ ସମସ୍ତ ସରକାରୀ କାର୍ଯ୍ୟାଳୟ ଦିନ 2ଟା ପର୍ଯ୍ୟନ୍ତ ବନ୍ଦ ରହିବ ।
ଇଟିଭି ଭାରତ, ଭୁବନେଶ୍ବର
