ଭୁବନେଶ୍ୱର: ଆସନ୍ତାକାଲି ଓଡ଼ିଶାରେ ପ୍ରବେଶ କରିବ ରାହୁଲ ଗାନ୍ଧୀଙ୍କ ଭାରତ ଯୋଡ ନ୍ୟାୟ ୟାତ୍ରା । ଏନେଇ ଚଳଚଞ୍ଚଳ ରାଜ୍ୟ କଂଗ୍ରେସ ଶିବିର । ନିର୍ବାଚନ ପୂର୍ବରୁ ରାହୁଲ ଗାନ୍ଧୀଙ୍କ ଭାରତ ଯୋଡ ନ୍ୟାୟ ଯାତ୍ରା ଓଡ଼ିଶା କଂଗ୍ରେସ ପାଇଁ ଏକ ଗୁରୁତ୍ୱ ବହନ କରୁଛି । 6 ତାରିଖ ସଂଧ୍ୟାରେ ରାହୁଲ ପଡୋଶୀ ଝାଡଖଣ୍ଡ ଦେଇ ଓଡିଶା ସୀମାବର୍ତ୍ତୀ ଅଞ୍ଚଳ ବୀରମିତ୍ରପୁରରେ ପହଞ୍ଚିବେ । ସେଠାରେ ତାଙ୍କୁ ରାଜ୍ୟ କଂଗ୍ରେସ ପକ୍ଷରୁ ସମ୍ବର୍ଦ୍ଧିତ କରାଯିବ ।
ବୀରମିତ୍ରପୁର ବିଜବାହାଲ ରାମ୍ପଲରେ ସେ ରାତ୍ରି ଯାପନ କରିବେ । 7 ତାରିଖ ସକାଳେ ରାଉରକେଲାର ଉଦିତ ନଗରରୁ ପାନପୋଷ ଅଭିମୁଖେ ପଦଯାତ୍ରାରେ ବାହାରିବ । ଦିନ 10ଟାରେ ପାନପୋଷ ଛକରେ ଏକ ସାଧାରଣସଭା ଅନୁଷ୍ଠିତ ହେବ । ବିର୍ସା ମୁଣ୍ଡା ଗ୍ରାଉଣ୍ଡରେ ମଧ୍ୟାହ୍ନ ଭୋଜନ କରିବେ ରାହୁଲ ଗାନ୍ଧୀ । 2ଟାରେ ରାଜଗାଙ୍ଗପୁର ଅଭିମୁଖେ ଯାତ୍ରା କରିବେ । ସେଠାରେ ସାଧାରଣ ସଭା ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି । କୁଟ୍ରା ଅଭିମୁଖେ ବାହାରି ବଡ଼ଗାଁଓ ରେ କିଛି ସମୟ ରହିବେ । ସାଢେ ଚାରିଟା ବେଳେ ସୁନ୍ଦରଗଡ ବସଷ୍ଟାଣ୍ଡରୁ ପଦଯାତ୍ରା ବାହାରି ଏସବିଆଇ ଛକ ଦେଇ ଝାରସୁଗୁଡା ଅମିଲିପାଲି ଗ୍ରାଉଣ୍ଡରେ ରାତ୍ରିଯାପନ କରିବେ ।
ଅଧିକ ପଢନ୍ତୁ- କାଲି ରାଉରକେଲାରେ ପହଞ୍ଚିବ ରାହୁଲଙ୍କ ନ୍ୟାୟ ଯାତ୍ରା, ଚଳଚଞ୍ଚଳ କଂଗ୍ରେସ ଶିବିର
ସେହିପରି 8 ତାରିଖ ସକାଳ ସମୟରେ ଝାରସୁଗୁଡା ପୁରୁଣା ବସଷ୍ଟାଣ୍ଡ ମହାତ୍ମା ଗାନ୍ଧୀ ଛକରୁ ପଦଯାତ୍ରାରେ ବାହାରି ବେହେରା ମାଳରେ ସାଧାରଣ ଲୋକଙ୍କୁ ସମ୍ବୋଧନ କରିବେ । ଗୋବିନ୍ଦପୁର ମଧୁବନ ଢ଼ାବାରେ କିଛି ସମୟ ଅବସ୍ଥାନ କରିବେ । ସେହିଠାରୁ ଯାଇ କୁରେଇମଲରେ ମଧ୍ୟାହ୍ନ ଭୋଜନ କରିବେ ରାହୁଲ ଗାନ୍ଧୀ । ପରେ ଅପରାହ୍ନ 2 ଟାରେ କନକତୋରାରୁ ବାହାରି ଓଡିଶା ଛାଡି ଛତିଶଗଡରେ ପ୍ରବେଶ କରିବେ ।
ଭାରତ ଯୋଡ ଯାତ୍ରା ଦେଶରେ କଂଗ୍ରେସ ପାଇଁ ଏକ ନୂଆ ଆଶା ସୃଷ୍ଟି କରିଥିଲା । ଜାତି ବର୍ଣ୍ଣ , ଧର୍ମ ନିର୍ବିଶେଷରେ ରାହୁଲ ଗାନ୍ଧୀଙ୍କ ପ୍ରତି ଜନସମର୍ଥନ ମିଳିଥିଲା । ତାର ସମ୍ପୂର୍ଣ ଫାଇଦା କିନ୍ତୁ ଦଳ ଉଠାଇ ପାରିଲା ନାହିଁ । ଆଗାମୀ ଦିନରେ ଓଡ଼ିଶାରେ ବିଧାନସଭା ନିର୍ବାଚନ ଥିବାରୁ ରାହୁଲ ଗାନ୍ଧୀଙ୍କ ଭାରତ ଯୋଡ ନ୍ୟାୟ ଯାତ୍ରାରୁ ରାଜ୍ୟ କଂଗ୍ରେସକୁ ଫାଇଦା ନେବାକୁ ଅଣ୍ଟା ଭିଡିଛି । ଦଳ ଏହାକୁ ଭୋଟରେ ପରିଣତ କରିବାକୁ ଉଦ୍ୟମ କରିବ ବୋଲି କହିଛନ୍ତି ଦଳୀୟ ନେତା ।
ଇଟିଭି ଭାରତ, ଭୁବନେଶ୍ୱର
