ଜେଲରେ ଫିଲ୍ମ ଦେଖିବେ କଏଦୀ, ଝାରପଡ଼ା ଜେଲରେ ଖୋଲିଲା ହଲ

ଫିଲ୍ମ ଦେଖିଲେ ହ୍ରାସ ହେବ ମାନସିକ ଚାପ । ଆଚରଣରେ ଆସିବ ସୁଧାର । କାଲି ଚାଲିଲା ସ୍ପେଶାଲ ସ୍କ୍ରିନିଂ । ମହିଳା କଏଦୀଙ୍କ ପାଇଁ ରବିବାର ।

ଭୁବନେଶ୍ବର: ଏଣିକି ଜେଲ ଭିତରେ କଏଦୀ ଦେଖିପାରିବେ ସିନେମା । ମନୋରଞ୍ଜନ ପାଇଁ ଝାରପଡ଼ା ସ୍ବତନ୍ତ୍ର ଜେଲରେ ଖୋଲିଲା ନୁତନ ସିନେମା ହଲ । ଅନ୍ତର୍ଜାତୀୟ ମାନବାଧିକାର ଦିବସ ତଥା ରାଜ୍ୟ କଏଦୀ କାରାଗାର ପ୍ରତିଷ୍ଠା ଦିବସ ଅବସରରେ ଏହି ନୁତନ ସିନେମା ହଲର ଉଦଘାଟନ କରାଯାଇଛି ।ଯେଉଁଠି ଅନଲାଇନରେ ବିଗ-ସ୍କ୍ରିନରେ ସିନେମା ଦେଖିବା ପାଇଁ ସମସ୍ତ ସୁବିଧା ସୁଯୋଗ ମିଳିପାରିବ ।

• ମାନସିକ ଚାପ ହ୍ରାସ ପାଇଁ ପ୍ରୟାସ

ଝାରପଡ଼ା ଜେଲ ସୁପରିଟେଣ୍ଡଣ୍ଟ ଏମ.ଆର ପ୍ରତିହାରୀ କହିଛନ୍ତି,‘‘ବିଗୁଡୁଥିବା କଏଦୀଙ୍କ ମାନସିକ ଚାପ ଓ ସ୍ଥିତିକୁ ଦୃଷ୍ଟିରେ ରଖି ଏହି ନିଷ୍ପତ୍ତି ଗ୍ରହଣ କରାଯାଇଛି । ମନୋରଞ୍ଜନର ସୁଯୋଗ ମିଳିଲେ ସେମାନଙ୍କର ମାନସିକ ସ୍ଥିତିରେ ସୁଧାର ଆସିବ । ସେମାନେ ନିଜକୁ ସଂସ୍କାରମୂଳକ ସ୍ଥିତିରେ କିପରି ପରିବର୍ତ୍ତନ କରିବେ, ସେନେଇ ଏଭଳି ଏକ ପଦକ୍ଷେପ ଜେଲ କର୍ତ୍ତୃପକ୍ଷଙ୍କ ଦ୍ବାରା ନିଆଯାଇଛି । ଏନେଇ 100 କ୍ଷମତା ଥିବା କଏଦୀଙ୍କ ପାଇଁ ଉଦ୍ଦିଷ୍ଟ ଏହି ସିନେମାର ହଲରେ ପ୍ରଥମ ଫିଲ୍ମ 12 ଟାରୁ 3ଟା ପର୍ଯ୍ୟନ୍ତ ସ୍କ୍ରିନଂ କରାଯାଇଛି । ଏନେଇ ପ୍ରତ୍ୟେକ ଦିନ ଏଭଳି ସିନେମା ପରିବେଷଣର ସୁବିଧା ହେବ । କେବଳ ରବିବାର ଦିନ ମହିଳା କଏଦୀଙ୍କ ପାଇଁ ସିନେମା ପରିବେଷଣ ପାଇଁ ସମୟ ସ୍ଥିରୀକୃତ କରାଯାଇଛି ।’’

ଜେଲରେ ଫିଲ୍ମ ଦେଖିବେ କଏଦୀ, ଝାରପଡ଼ା ଜେଲରେ ଖୋଲିଲା ହଲ (ETV Bharat Odisha)

• ଜେଲ ବିଭାଗରେ 30 ପ୍ରତିଶତ ପଦବୀ ଖାଲି

ରାଜ୍ୟରେ ମୋଟ 87ଟି ଜେଲରେ ଏବେ 30 ପ୍ରତିଶତ କର୍ମଚାରୀ ପଦବି ଖାଲି ପଡ଼ିଛି । ବିଭିନ୍ନ ଜେଲ ଓ ସବ-ଜେଲରେ କର୍ମଚାରୀ ଅଭାବରୁ କିଛି ଜେଲକୁ ସମିଶ୍ରଣ କରିବା ପାଇଁ ସରକାରଙ୍କୁ ପ୍ରସ୍ତାବ ଦେଇଛି ଜେଲ ବିଭାଗ । ଏହି ଅନୁପାତରେ ଦେଖିଲେ, 1856 ଓ୍ବାର୍ଡର କ୍ଷମତାରୁ 466 ଟି ପଦବୀ ଖାଲି ପଡ଼ିଛି । ସେହିପରି 266 ଟି ଚିପ ଓ୍ବାର୍ଡର ମଧ୍ୟରୁ 166ଟି ପଦବି ଖାଲି ପଡ଼ିଛି । ଖାଲି ସେତିକି ନୁହେଁ, ଅଧିକାଂଶ ଜିଲ୍ଲା ଜେଲ ଓ ସର୍କଲ ଜେଲ ବିଶେଷ କରି ଜେଲ ସୁପରିଟେଣ୍ଡଣ୍ଟଙ୍କ ତତ୍ତ୍ବାବଧାନରେ ଚାଲିଥାଏ ସେମାନଙ୍କ ସଂଖ୍ୟା ମଧ୍ୟ 27 ଥିବା ବେଳେ ଏବେ 16 ଟି ପଦବୀ ଖାଲି ପଡ଼ିଛି । ଅର୍ଥାତ୍ ମାତ୍ର 11 ଜଣ ଜେଲ ସୁପରିଟେଣ୍ଡଣ୍ଟ ଏବେ କାର୍ଯ୍ୟରତ ରହିଛନ୍ତି ।

ଜେଲ ଫିଲ୍ମ ଦେଖିବେ କଏଦୀ, ଝାରପଡ଼ା ଜେଲରେ ଖୋଲିଲା ନୁଆ ଫିଲ୍ମ ହଲ (ETV Bharat Odisha)

• କଏଦୀ ସଂଖ୍ୟା କମ ଥିବା ଜେଲର ମିଶ୍ରଣ କରିବାକୁ ଯୋଜନା

ସେହିପରି ଯଦି ଦେଖିବେ 25 ଗୋଟି ଜେଲରେ କଏଦୀ ସଖ୍ୟା ମାତ୍ର 20ରୁ 25 ରହିଛି । ସେହି ସବୁ ଜେଲକୁ ଅନ୍ୟ ଜେଲ ସହିତ ମିଶ୍ରଣ କରିବାପାଇଁ ଜେଲ ବିଭାଗ ସରକାରଙ୍କ ନିକଟରେ ପ୍ରସ୍ତାବ ରଖିଛି ।ତା’ମଧ୍ୟରେ ଅଧିକାଂଶ ଜେଲରେ ମାତ୍ର 7ଜଣ ଲେଖାଏଁ କର୍ମଚାରୀ କାର୍ଯ୍ୟରତ ଅଛନ୍ତି । ଯାହକି ତିନି ସିଫ୍ଟରେ ଜେଲ ପରିଚାଳନା କରିବା ଅସମ୍ଭବ ହୋଇପଡୁଛି । ଏନେଇ‌ ସେହି ସବୁ ଜେଲକୁ ନିକଟସ୍ଥ ଜେଲ ସହିତ ମିଶ୍ରଣ କରିବା ପାଇଁଁ ଯୋଜନା ଚାଲିଛି । ତା’ମଧ୍ୟରୁ ନରସିଂହପୁର ଜେଲରେ 23 ଜଣ କଏଦୀ, ନୀଳଗିରିରେ 24 ଜଣ, ରଣପୁର 22 ଜଣ, ପାଲଲହଡ଼ାରେ 12 ଜଣ, ହିନ୍ଦୋଳରେ 11 ଜଣ ଲେଖାଏଁ କଏଦୀ କ୍ଷମତା ରହିଛି । ତେଣୁ ସେସବୁ ଜେଲ ଚଳାଇବା କଷ୍ଟକର ବ୍ୟାପାର ହୋଇପଡିଛି ।

ବିଶେଷ କରି କାରଗାରରେ କଏଦୀଙ୍କ ସ୍ବାସ୍ଥ୍ୟାବସ୍ଥା ପାଇଁ ମଧ୍ୟ କେତେକ ଜେଲରେ ହସ୍ପିଟାଲ ବା ଡାକ୍ତର ସୁବିଧା ରହିଛି । ଏଥିସହ ଅତ୍ୟାଧୁନିକ ମେସିନ୍‌ ମଧ୍ୟ ବ୍ୟବସ୍ଥା ରହିଛି । ତୁରନ୍ତ ଚିକିତ୍ସା ପାଇଁ 45ଟି ଆମ୍ବୁଲାନସର ଆବଶ୍ୟକତା ରହିଛି । ଏନେଇ 15ଟି ଆମ୍ବୁଲାନ୍ସ ରହିଥିଲା।ଆହୁରି 10ଟି ଆମ୍ବୁଲାନ୍ସ ଅଣାଯାଇଛି।ବର୍ତମାନ 25ଟି ଆମ୍ବୁଲାନ୍ସ କ୍ଷମତା ଥିବା ବେଳେ‌ଆଗକୁ ଆହୁରି 20ଟି ଆମ୍ବୁଲାନ୍ସ ଆଣିବା ପାଇଁ ମଧ୍ୟ ଯୋଜନା ଚାଲିଥିବା ଜେଲ ଡିଜି ଅରୁଣ ରାୟ କହିଛନ୍ତି।

ଇଟିଭି ଭାରତ, ଭୁବନେଶ୍ବର