ପୁରୀ: ଶ୍ରୀମନ୍ଦିର ଚାରି ପାର୍ଶ୍ୱରୁ ଲାଇଟ୍ ଖୋଲାଯିବା ଘଟଣାରେ ମାମଲା ରୁଜୁ କରି ପୋଲିସର ତଦନ୍ତ ଆରମ୍ଭ । ୩ଦିନ ତଳେ ଶ୍ରୀମନ୍ଦିରର ଆଲୋକୀକରଣ ପାଇଁ ଲଗାଯାଇଥିଲା ଲାଇଟ୍ ଖୋଲି ଦିଆଯାଇଥିଲା । ଏଭଳି କାର୍ଯ୍ୟ କରିଥିବା ବ୍ୟକ୍ତିଙ୍କ ବିରୋଧରେ ପୁରୀ ସିଂହଦ୍ୱାର ଥାନାରେ ଏକ ମାମଲା ରୁଜୁ କରାଯାଇଛି । ମୁଖ୍ୟ ଶାସନ ସଚିବଙ୍କ ନିର୍ଦ୍ଦେଶ ପରେ ପୁରୀ ପୋଲିସ ଏହି ଘଟଣାକୁ ନେଇ ସିଂହ ଦ୍ବାର ଥାନାରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ପୁରୀ ଏସପି ପିନାକ ମିଶ୍ର ସୂଚନା ଦେଇଛନ୍ତି । ଏହି ଘଟଣାରେ 4 ଜଣଙ୍କୁ ପୋଲିସ ଅଟକ ରଖି ପଚରଉଚରା କରୁଥିବା ଜଣାପଡ଼ିଛି ।
ଶ୍ରୀମନ୍ଦିରକୁ ଉଜ୍ଜ୍ବ ଳ ଆଲୋକରେ ଆଲୋକିତ କରିବା ପାଇଁ ବ୍ୟବସ୍ଥା ହୋଇଥିବା ଉଚ୍ଚମାନର ଲାଇଟକୁ ହଠାତ ପ୍ରଶାସନକୁ ସୂଚନା ଦିଆ ନଯାଇ ଖୋଲି ଦିଆଯିବା ଘଟଣାକୁ ପ୍ରଶାସନ ଗୁରୁତର ସହ ନେଇଛି । କେଉଁ ପରିସ୍ଥିତିରେ ପ୍ରଶାସନକୁ ବିନା ସୂଚନା ଦେଇ ଲାଇଟ ଖୋଲିଦିଆଗଲା ସେ ନେଇ ତଦନ୍ତ ଚାଲିଛି । ପରେ ଆଇନ ଅନୁଯାୟୀ କାର୍ଯ୍ୟନୁଷ୍ଠାନ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି । ତେବେ ଲାଇଟ ଲଗାଇବା ପାଇଁ ଦାୟିତ୍ଵ ନେଇଥିବା ସଂସ୍ଥାର 4 ଜଣ କର୍ମଚାରୀଙ୍କୁ ପୋଲିସ ଅଟକ ରଖି ପଚରଉଚରା କରୁଛି । ସେପଟେ ଏହି ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି ଆମିକସ କ୍ୟୁରି ଏନକେ ମହାନ୍ତି । ଘଟଣାର ସ୍ଥିତି ଅନୁଧ୍ୟାନ ପାଇଁ ଏନକେ ମହାନ୍ତି ପୁରୀ ଆସି ତଦାରଖ କରିଛନ୍ତି ।
ଏନକେ ମହାନ୍ତି ଏନେଇ ମୁଖ୍ୟ ଶାସନ ସଚିବଙ୍କୁ ଜଣାଇବା ପରେ ଲାଇଟ୍ ଲଗାଇବା ନେଇ ପଦକ୍ଷପ ନିଆଯାଇଛି । ତେବେ ଆଜି ସନ୍ଧ୍ୟା 9ଟା ସୁଦ୍ଧା ଲାଇଟ୍ ଲଗାଇବା କାର୍ଯ୍ୟ ଶେଷ ହେବ ବୋଲି ଆମିକସ କ୍ୟୁରୀ କହିଛନ୍ତି । ତେବେ ଶ୍ରୀମନ୍ଦିର ମରାମତି କାର୍ଯ୍ୟ ମଧ୍ୟ ତଦାରଖ କରିଥିଲେ ଏନକେ ମହାନ୍ତି। ସେ କହିଥିଲେ ଯେ, ଶ୍ରୀମନ୍ଦିରର ସବୁ ମରାମତି ଓ ରକ୍ଷଣାବେକ୍ଷଣ କାର୍ଯ୍ୟ ଠିକରେ ଚାଲିଛି । ସେହିପରି ଗୁଣ୍ଡିଚା ମନ୍ଦିରର ମରାମତି କାର୍ଯ୍ଯ ଖୁବ୍ ଶୀଘ୍ର ଶେଷ ହେବ । ଆଗାମୀ ଦିନରେ ଏହା ଭକ୍ତଙ୍କ ପାଇଁ ଖୋଲିବ ବୋଲି ଆମିକାସକ୍ୟୁରି କହିଛନ୍ତି । ସେପଟେ ଶ୍ରୀମନ୍ଦିର ଚାରି ପାଖ ଲାଇଟ ଖୋଲାଯିବା ନେଇ ଚିନ୍ତା ପ୍ରକଟ କଲା ବିଜେପି । ଲାଇଟ ଖୋଲିବା ପଛରେ ଷଡ଼ଯନ୍ତ୍ରର ଗନ୍ଧ ବାରିଲା ବିଜେପି । ମହାପ୍ରଭୁ ଜଗନ୍ନାଥଙ୍କ ମନ୍ଦିରରୁ ଲାଇଟ କାଢ଼ି ନେଇ ଅନ୍ଧାର କରାଯିବା ଚିନ୍ତା ଜନକ ବିଷୟ ବୋଲି କହିଛି ରାଜ୍ୟ ବିଜେପି ।
ଇଟିଭି ଭାରତ, ପୁରୀ
