ଭୁବନେଶ୍ବର: ରାଜଧାନୀରେ ମିଳୁନି ପିଇବା ପାଣି । ପାଣି ପାଇଁ ବିକ୍ଷୋଭ ସହ ଧାରଣାରେ ବସ୍ତି ବାସିନ୍ଦା । ନିର୍ବାଚନ ସମୟରେ ମୌଳିକ ସୁବିଧା ଲୋକଙ୍କ ପାଇଁ ସାଜିଛି ସାତ ସପନ । ପାଣି ପାଇଁ ଆହାକାର ଭୁବନେଶ୍ୱର ଆଚାର୍ଯ୍ୟ ବିହାର ନିକଟସ୍ଥ ବିଶେଶ୍ୱର ବସ୍ତି । ପାଣିର ଘୋର ସମସ୍ୟାରେ ୫ ଦିନ ହେବ ଯୁଝି ହେଉଛି ରାଜଧାନୀର ଏହି ବିଶେଶ୍ୱର ବସ୍ତି । ପାଞ୍ଚରୁ ଛଅ ଦିନ ହେବ ଟୋପାଏ ପାଣି ଆସୁନଥିବାବେଳେ ଆଜି ଧାରଣାରେ ବସିଛନ୍ତି ବସ୍ତିବାସିନ୍ଦା । ହୋହାଲ୍ଲା ନାରାବାଜି ସହ ରାସ୍ତାରୋକ କରିବା ପରେ ମିଳିଲା ପାଣି ।
ଯାହା ଫଳରେ ଗାଡି ମଟର ଯାତାୟତ ଠପ ହୋଇଥିବା ବେଳେ ବହୁ ବାଇକ ଆରୋହୀ, ଅଟୋ ,ମୋ ବସ, ଭଳି ଯାନବାହାନ କିଛି ସମୟ ପାଇଁ ଅଟକି ଯାଇଥିଲେ । ଏଥିପଇଁ ଆପୋଲୋ ହସ୍ପିଟାଲ ରାସ୍ତାରେ ଲୋକଙ୍କର ଯିବା ଆସିବା ବନ୍ଦ ହୋଇଯାଇଥିଲା ।ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ । ପୋଲିସ ଆସି ବୁଝାସୁଝା କରିବା ପରେ ଧାରଣାରୁ ହଟିଥିଲେ ଧାରଣାରତ ବସ୍ତି ବାସିନ୍ଦା ।
ବସ୍ତି ବାସିନ୍ଦା ଅଭିଯୋଗ କରିଛନ୍ତି ଯେ, ବର୍ଷେ ହେବ ପାଣି ଯୋଗାଣରେ ବସ୍ତିରେ ସମସ୍ୟା ରହିଛି । କିଛି ଦିନ ପାଣି ଆସିଲେ କିଛି ଦିନ ପାଣି ଆସେନାହିଁ । ଏନେଇ ଅନେକ ଥର ବିଏମସିକୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ । ହେଲେ ଗତ 5 ଦିନ ହେବ ବସ୍ତିରେ ସମ୍ପୂର୍ଣ୍ଣ ପାଣି ଠପ୍ ହୋଇଥିଲା । ପାଣି ସମସ୍ୟାକୁ ନେଇ ବିଏମସି ପକ୍ଷରୁ ପ୍ରତ୍ୟେକ ଦିନ ପାଣି ଯୋଗାଇ ଦିଆଯାଉଥିଲେ ମଧ୍ୟ ପାଣିର ଅଭାବ ଗୋଟିଏ ଟ୍ୟାଙ୍କରରେ ପୂରଣ ହେଉନଥିଲା । ତେଣୁ ଦୁଇ ଘଣ୍ଟା ରାସ୍ତା ଅବରୋଧ କରିବା ପରେ ବିଏମସି ପାଣି ଯୋଗାଇ ଦେଇଛି ।
ଏହା ମଧ୍ୟ ପଢନ୍ତୁ......ଷ୍ଟିଲ ସିଟିରେ ପାନୀୟ ଜଳ ସମସ୍ୟା, ହନ୍ତସନ୍ତ ବସ୍ତି ବାସିନ୍ଦା - Rourkela Water Problem
ସେମାନେ ଆହୁରି କହିଛନ୍ତି ଯେ, ଯଦି ପାଇପରେ ପାଣି ନ ଆସେ ତେବେ ପୁଣି ରାସ୍ତା ଅବରୋଧ କରିବେ । ଅନ୍ୟପଟେ ପାଣି ନ ଆସିବାର ଅଧା ଘଣ୍ଟାରେ ସମସ୍ୟା ଦୂର ହେଉଛି ହେଲେ ଆମେ ଗରିବ ବସ୍ତି ବାସିନ୍ଦା ବୋଲି ଆମ କଥା କେହି ଶୁଣୁନାହାନ୍ତି । ଭୋଟ ସମୟରେ ବି ଆମକୁ ହଇରାଣ କରୁଛନ୍ତି । ପାଣି ସମସ୍ୟାର ସମାଧାନ ନ ହେଲେ ଭୋଟ ଏଥର ଦେବୁ ନାହିଁ ।
ଇଟିଭି ଭାରତ, ଭୁବନେଶ୍ବର
