ପୁରୀ: ପୁଣି ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ନେଇ ଉଠିଲା ପ୍ରଶ୍ନ । ହଜାର ହଜାର ଭକ୍ତଙ୍କ ଭିଡ ମଧ୍ୟରେ ପୋଲିସ କର୍ମୀ ଓ ସେବାୟତଙ୍କ ଆଖିରେ ଧୂଳି ଦେଇ ଶ୍ରୀମନ୍ଦିର ନୀଳଚକ୍ର ନିକଟକୁ ଚଢ଼ିଗଲେ ଜଣେ ବୃଦ୍ଧ । ନୀଳଚକ୍ର ଥିବା ଦଧିନଉତି ଉପରେ ବୁଲିଲେ । ଏହା ଦେଖି କିଛି ଭକ୍ତ ପୋଲିସକୁ ଖବର ଦେଲେ । ପରେ ଚୂନରା ସେବାୟତଙ୍କ ଦ୍ବାରା ବୃଦ୍ଧ ଜଣକୁ ମନ୍ଦିର ଚୂଡାରୁ ଉଦ୍ଧାର କରାଯାଇ ସୁରକ୍ଷିତ ତଳକୁ ଅଣାଯାଇଥିଲା । ପରେ ତାଙ୍କୁ ସିଂହଦ୍ବାର ଥାନା ପୋଲିସ ହେପାଜତକୁ ନେଇଛି । ଉଦ୍ଧାର ହୋଇଥିବା ବ୍ୟକ୍ତି ହେଉଛନ୍ତି ବଳରାମ ମହାରଣା ଓ ସେ ଗଞ୍ଜାମ ଛତ୍ରପୁରର ବାସିନ୍ଦା ବୋଲି ପ୍ରାଥମିକ ଭାବେ ଜଣାପଡିଛି । କିଭଳି ଓ କେଉଁପଟେ ସେ ଶ୍ରୀମନ୍ଦିର ଉପରକୁ ଚଢିଲେ ସେ ନେଇ ପୋଲିସ ତାଙ୍କୁ ଜେରା କରୁଛି ।
- ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ନେଇ ପ୍ରଶ୍ନବାଚୀ:
ଶ୍ରୀମନ୍ଦିର ଭିତରେ ଓ ବାହାରେ ସୁରକ୍ଷା ବ୍ୟବସ୍ଥା ପାଇଁ ମାଳ ମାଳ ସୁରକ୍ଷାକର୍ମୀଙ୍କ ସହ ସିସିଟିଭି ମଧ୍ୟ ଲାଗିଛି । ଏହା ସତ୍ତ୍ବେ ମଧ୍ୟ ବୃଦ୍ଧଜଣକ କେମିତି ଓ କେଉଁ ପରିସ୍ଥିତିରେ ମନ୍ଦିର ଉପରକୁ ଚଢିଗଲେ ଓ କେହି କେମିତି ଦେଖି ପାରିଲେ ନାହିଁ, ସେନେଇ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି । ଏହା ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାରେ ବଡ ତ୍ରୁଟି । ଯଦି ଉକ୍ତ ବ୍ୟକ୍ତିଙ୍କର କିଛି ଅସୁବିଧା ହୋଇ ଥାନ୍ତା କି’ଏ ଦାୟୀ ରହିଥାନ୍ତା ବୋଲି ପ୍ରଶ୍ନ ଉଠୁଛି । ଏହା ଅତି ଅଭାବନୀୟ ଘଟଣା । ପୋଲିସ୍ ଓ ପ୍ରଶାସନ ଶ୍ରୀମନ୍ଦିର ସୁରକ୍ଷାକୁ ନେଇ କଡା ପଦକ୍ଷେପ ଗ୍ରହଣ କରିବା ଉଚିତ୍ ବୋଲି କହିଛନ୍ତି ଚୂନରା ସେବାୟତ ।
- କଣ କହିଲେ ଉଦ୍ଧାର କରିଥିବା ଚୂନରା ସେବାୟତ:-
ବଳରାମ ମହାରଣା ଉଦ୍ଧାର କରି ତଳକୁ ଆଣିଥିବା ଚୂନରା ସେବାୟତ କହିଛନ୍ତି, ''ଯେତେବେଳେ ଏହି ଖବର ପାଇଲି, ସାଙ୍ଗେ ସାଙ୍ଗେ ଶ୍ରୀମନ୍ଦିର ଉପରକୁ ଯାଇଥିଲି । ବଳରାମଙ୍କ ସହ କଥା ହୋଇ ତାଙ୍କୁ ବୁଝାସୁଝା କରି ତଳକୁ ଅତି ସତର୍କତା ସହ ଆଣିଥିଲି । ବଳରାମଙ୍କ ମାନସିକ ସ୍ଥିତି ଠିକ୍ ଥିବା ଜଣାପଡୁଛି । ସେ ପୁର୍ବରୁ ଅନେକ ମନ୍ଦିର ଚଢ଼ିଛନ୍ତି । ଶ୍ରୀମନ୍ଦିର ଉପରକୁ ଚଢିବା ତାଙ୍କର ଶେଷ ଇଚ୍ଛା ଥାଇପାରେ । ଏଣୁ ସେ ଶ୍ରୀମନ୍ଦିର ଉପରେ ଚଢ଼ିଥାଇ ପାରନ୍ତି । ଭକ୍ତିରେ ଭାବପ୍ରବଣ ହୋଇ ସେ ଏହି କାର୍ଯ୍ୟ କରିଥାଇପାରନ୍ତି । ତେବେ ସେ ଯାହା ହେଉ ଏହା ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାରେ ବଡ ତ୍ରୁଟି । ଆଗକୁ ଏପରି ଘଟଣା ହେବାର ଆଶଙ୍କା ମଧ୍ୟ ରହିଛି । ଏମିତି କାମ ପୂର୍ବରୁ ଯେମିତି ନହେବ ସେଥି ପ୍ରତି ମନ୍ଦିର ଓ ପୋଲିସ ଦୃଷ୍ଟି ଦେବା ଆବଶ୍ୟକ ।''
- ଥାନାରେ ଜେରା କରୁଛି ପୋଲିସ : MAN CLIMBED SRIMANDIR (ETV Bharat)
ଏନେଇ ପୁରୀ ଏସପି ପିନାକ ମିଶ୍ର କହିଛନ୍ତି ଏହି ଖବର ମିଳିବା ପରେ ସଙ୍ଗେ ସଙ୍ଗେ ପୋଲିସ୍ ଓ ଅଗ୍ନିଶମ ବାହିନୀ ଆଲର୍ଟ ହୋଇଥିଲା । ଶ୍ରୀମନ୍ଦିରର ଜଣେ ଚୂନରା ସେବକଙ୍କୁ ଡକାଯାଇ ଉକ୍ତ ବ୍ୟକ୍ତିଙ୍କୁ ତଳକୁ ଅଣାଯାଇଛି । ତାଙ୍କୁ ସିଂହଦ୍ଵାର ଥାନାରେ ଅଟକ ରଖି ପଚରା ଉଚରା କରାଯାଉଅଛି । କିଭଳି ଓ କେଉଁପଟେ ଶ୍ରୀମନ୍ଦିର ଉପରକୁ ଗଲେ ସେନେଇ ପୋଲିସ୍ ତଦନ୍ତ କରିବ ।
ଇଟିଭି ଭାରତ, ପୁରୀ
