ବାଲେଶ୍ବର: ଜଳସେଚନ ବିଭାଗର କୁବେର ଯନ୍ତ୍ରୀ ପ୍ରଭାସ ପ୍ରଧାନଙ୍କ ଘରେ ଚଢାଉ ଘଟଣା । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସମ୍ପୃକ୍ତ ଯନ୍ତ୍ରୀଙ୍କୁ ଗିରଫ କରାଯାଇଛି । ଭିଜିଲାନ୍ସ ପକ୍ଷରୁ ତଦନ୍ତ ଜାରି ରହିଛି ।
କେଉଁଠି ହୋଇଥିଲା ରେଡ୍:
"ଯନ୍ତ୍ରୀ ପ୍ରଭାସ ପ୍ରଧାନଙ୍କ ଘର, ଅଫିସ, ସମ୍ପର୍କୀୟଙ୍କ ଘର ଏମିତି 7ଟି ସ୍ଥାନରେ ଭିଜିଲାନ୍ସ ଟିମ ଚଢ଼ାଉ କରିଥିଲା। ଦୁଇ ଦିନ ଧରି ଚଢ଼ାଉ ଚାଲିବା ପରେ ଭିଜିଲାନ୍ସ ଆଜି ସମ୍ପୃକ୍ତ ଯନ୍ତ୍ରୀଙ୍କୁ ଗିରଫ କରି କୋର୍ଟ ଚାଲାଣ କରିଛି । ଆବଶ୍ୟକ ପଡ଼ିଲେ ରିମାଣ୍ଡରେ ଅଣାଯିବ ବୋଲି" ସୂଚନା ଦେଇଛନ୍ତି ଭିଜିଲାନ୍ସ ଏସପି ନରହରି ନାୟକ ।
ଚଢାଉରେ କିଏ ସାମିଲ ଥିଲେ:
ସୂଚନା ଅନୁସାରେ, ବାଲେଶ୍ୱର ଜଳସେଚନ ବିଭାଗର ଅଧିକ୍ଷଣ ଯନ୍ତ୍ରୀ ତଥା ପଦୋନ୍ନତି ପାଇ ବୈତରଣୀ ବ୍ୟାରେଜର ମୁଖ୍ୟ ନିର୍ମାଣ ଯନ୍ତ୍ରୀ ପ୍ରଭାସ ପ୍ରଧାନଙ୍କ ପାଖରେ ଆୟବହିର୍ଭୂତ ସମ୍ପତ୍ତି ଥିବା ନେଇ ବାଲେଶ୍ୱର ଭିଜିଲାନ୍ସ ନିକଟରେ ଅନେକ ଅଭିଯୋଗ ହୋଇଥିଲା । ଅଭିଯୋଗ ଆଧାରରେ, ଭିଜିଲାନ୍ସର 7ଟି ଟିମ ଏକକାଳୀନ ବାଲେଶ୍ୱରରେ ଥିବା ଅଫିସ, ଜଳେଶ୍ବର ବାସଭବନ ଆଦି ସ୍ଥାନରେ ଚଢ଼ାଉ କରିଥିଲା । ଚଢ଼ାଉରେ ଅନେକ ବ୍ୟାଙ୍କ ପାସବୁକ, ଜମି କାଗଜପତ୍ର ସହ ନଗଦ 11 ଲକ୍ଷରୁ ଊର୍ଦ୍ଧ୍ଵ ଟଙ୍କା ଜବତ କରାଯାଇଥିଲା । ରାତିଯାଏ ଚଢ଼ାଉ ଚାଲିବା ସହ ଭିଜିଲାନ୍ସ ଟିମ ପ୍ରଭାସଙ୍କ ସାଙ୍ଗ ସାଥି ଏବଂ ସହଯୋଗୀଙ୍କ ଘରେ ଚଢ଼ାଉ କରିଥିଲା । ଚଢ଼ାଉରେ 7ଟି ଟିମର 45 ଜଣ ଅଧିକାରୀ ସାମିଲ ହୋଇଥିବାବେଳେ ୨ ଅତିରିକ୍ତ ଏସପି,୪ଜଣ ଡିଏସପି, ୬ଜଣ ଇନସପେକ୍ଟର ଓ ୭ଜଣ ଏଏସଆଇ ସାମିଲ ଥିଲେ । ବାଲେଶ୍ଵର ଭିଜିଲାନ୍ସ ଏସପି ନରହରି ନାୟକଙ୍କ ତତ୍ତ୍ଵାବଧାନରେ ଏହି ଚଢ଼ାଉ ଚାଲିଥିଲା।
ଆଖି ଖୋସିଲା ଭଳି ସମ୍ପତ୍ତି:
ବାଲେଶ୍ଵର ସରକାରୀ କ୍ୱାର୍ଟରରୁ ବିପୁଳ ପରିମାଣର ଟଙ୍କା, ସୁନା ଗହଣା, ବହୁ ଜମିବାଡ଼ି, ବ୍ୟାଙ୍କ ପାସବୁକ ଓ ବୀମା କାଗଜପତ୍ର ମିଳିଥିଲା । ଆଜି କୋର୍ଟ ଚାଲାଣ ପରେ ଏସପି ନରହରି ନାୟକ କହିଛନ୍ତି, "ମୁଖ୍ୟ ନିର୍ମାଣ ଯନ୍ତ୍ରୀ ଆନନ୍ଦପୁର ବ୍ୟାରେଜ୍ ପ୍ରୋଜେକ୍ଟ ଦାୟିତ୍ବରେ ଥିବା ପ୍ରଭାସ କୁମାର ପ୍ରଧାନଙ୍କ ନାଁରେ ଆୟବର୍ହିଭୂତ ସମ୍ପତ୍ତି ଠୁଳ ମାମଲା ରହିଛି । ଭିଜିଲାନ୍ସ ତଦନ୍ତ ଚାଲିଥିଲା, ଆଜି ତାଙ୍କୁ ଗିରଫ କରାଯାଇଛି । ତାଙ୍କ ନାମରେ 8 କୋଟିରୁ ଊର୍ଦ୍ଧ୍ବ ଆୟବର୍ହିଭୂତ ସମ୍ପତ୍ତି ବାହାରିଛି । 85ଟି ପ୍ଲଟ ତାଙ୍କ ନାମରେ ବାହାରିଛି । ଏହାସହ ଗୋଟିଏ ଚାରି ଚକିଆ ଗାଡି ଜବତ ହେବା ସହ ବହୁ ଗାଡି ବେନାମୀ ରହିଛି । ଆଗାମୀ ଦିନରେ ତାଙ୍କ ନିକଟ ସମ୍ପର୍କୀୟଙ୍କ ଯଦି ଲିଙ୍କ ଆସିବ ସେମାନଙ୍କୁ ଗିରଫ କରି କୋର୍ଟ ଚାଲାଣ କରାଯିବ । ବର୍ତ୍ତମାନ ଏହି ମାମଲାର ତଦନ୍ତ ଜାରି ରହିଛି । ପରବର୍ତ୍ତୀ ସମୟରେ ଆବଶ୍ୟକ ପଡ଼ିଲେ 14 ଦିନିଆ ରିମାଣ୍ଡରେ ଅଣାଯିବ।" ଅନ୍ୟପଟେ ସମ୍ପୃକ୍ତ ଯନ୍ତ୍ରୀ ନିଜ ପ୍ରତିକ୍ରିୟାରେ କହିଛନ୍ତି, "ଭିଜିଲାନ୍ସ ଚଢ଼ାଉ କରିଛି ହେଲେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ କୌଣସି ସତ୍ୟତା ନାହିଁ।"
ଇଟିଭି ଭାରତ, ବାଲେଶ୍ବର
