ଭୁବନେଶ୍ବର: ପଶ୍ଚିମ ଓଡ଼ିଶାରେ ହେବ ଚିଡ଼ିଆଖାନା । ଏନେଇ ଆରମ୍ଭ ହୋଇଯାଇଛି ପ୍ରକ୍ରିୟା । ବହୁ ବର୍ଷରୁ ପର୍ଯ୍ୟଟକମାନେ କେବଳ ନନ୍ଦନକାନନରେ ପଶୁ ପକ୍ଷୀଙ୍କୁ ଦେଖିବାର ମଜା ନେଉଥିବାବେଳେ ଆଗକୁ ପଶ୍ଚିମ ଓଡ଼ିଶାରେ ଚିଡିଆଘର ବୁଲିବାର ସୁଯୋଗ ପାଇବେ ପର୍ଯ୍ୟଟକ ବୋଲି କହିଛନ୍ତି ମନ୍ତ୍ରୀ ପ୍ରଭାତୀ ପରିଡା । ବିଶ୍ବ ପର୍ଯ୍ୟଟନ ଦିବସ ଅବସରରେ ଓଡିଶା ରାଜ୍ୟ ଟୁରିଷ୍ଟ ଗାଇଡ ଆସୋସିଏସନ ତରଫରୁ ଆୟୋଜିତ କାର୍ଯ୍ୟକ୍ରମରେ ଏଭଳି କହିଛନ୍ତି ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡା । ଏହି କାର୍ଯ୍ୟକ୍ରମରେ ରାଜ୍ୟପାଳ ରଘୁବର ଦାସ ମୁଖ୍ୟ ଅତିଥି ଭାବେ ଯୋଗ ଦେଇଥିବାବେଳେ ବାଚସ୍ପତି ସୁରମା ପାଢୀ, ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା,ବିଧାୟକ ବାବୁ ସିଂ ଓ ସମ୍ବାଦ ଅଧ୍ୟକ୍ଷ ସୌମ୍ୟରଞ୍ଜନ ପଟ୍ଟନାୟକ ମୁଖ୍ୟ ବକ୍ତା ଭାବରେ ଯୋଗଦେଇଥିଲେ ।
ପଶ୍ଚିମ ଓଡ଼ିଶାରେ ହେବ ଚିଡ଼ିଆଖାନା:
ପ୍ରଭାତୀ ପରିଡା କହିଛନ୍ତି,"ଓଡିଶାର ପର୍ଯ୍ୟଟନ ବିକାଶ ପାଇଁ ଅନେକ ଯୋଜନା କରିଛି ରାଜ୍ୟ ସରକାର । ଓଡିଶା ଟୁରିଜିମ ହବ ହେଲେ ହିଁ ଆର୍ଥିକ କ୍ଷେତ୍ରରେ ବିକାଶ ହେବ । ଏନେଇ ରାଜ୍ୟ ସରକାର ବିଭିନ୍ନ ଯୋଜନା କରୁଥିବା ବେଳେ ଓଡିଶାରେ ଆଡଭେଞ୍ଚର ସ୍ପୋର୍ଟ୍ସର ପଲିସି ଆଣିବାର ଆବଶ୍ୟକତା ରହିଛି । ଏହାଦ୍ୱାରା ପର୍ଯ୍ୟଟନର ବିକାଶ ସହ ରୋଜଗାର ସୃଷ୍ଟି ହେବ । ଏଥିପାଇଁ କେନ୍ଦ୍ର ସରକାର ବି ଟଙ୍କା ଯୋଗାଉଛନ୍ତି । ବହୁ ବର୍ଷରୁ ପର୍ଯ୍ୟଟକମାନେ କେବଳ ନନ୍ଦନକାନନରେ ପଶୁ ପକ୍ଷୀଙ୍କୁ ଦେଖିବାର ମଜା ନେଉଛନ୍ତି । ଆଗକୁ ପଶ୍ଚିମ ଓଡ଼ିଶାରେ ଚିଡିଆଘର ବୁଲିବାର ସୁଯୋଗ ପାଇବେ ପର୍ଯ୍ୟଟକ । "
ଓଡିଶାରେ ଆଡଭେଞ୍ଚର ସ୍ପୋର୍ଟ୍ସ:
ସେ ଆହୁରି ମଧ୍ୟ କହିଛନ୍ତି,"ବଡ କଥା ହେଉଛି ଓଡିଶାରେ ଆଡଭେଞ୍ଚର ସ୍ପୋର୍ଟ୍ସ ପାଇଁ ଅନେକ ସୁଯୋଗ ରହିଛି । ଆଡଭେଞ୍ଚର ସ୍ପୋର୍ଟ୍ସ ତଥା ଏହାର ପଲିସି ବିଷୟରେ ଅଧିକ ଜାଣିବା ପାଇଁ ଆସନ୍ତା ସପ୍ତାହ ବା ଅକ୍ଟୋବର ୩ ତାରିଖରେ ମୁଁ ମେଘାଳୟ ଗସ୍ତରେ ଯିବି । ଓଡିଶା ଫେରିବା ପରେ ଆଡଭେଣ୍ଚର ସ୍ପୋର୍ଟ୍ସ ଉପରେ ଅନେକ କାମ କରାଯିବ । ଏହାସହ ଓଡିଶାରେ ବୁଦ୍ଧିଷ୍ଟ କରିଡର ପ୍ରତି ଗୁରୁତ୍ୱ ଦିଆଯିବା ସହ ପର୍ଯ୍ୟଟକମାନଙ୍କୁ ଆକୃଷ୍ଟ କରିବା ପାଇଁ ଅଧିକରୁ ଅଧିକ ଇକୋ ଟୁରିଜମର ବ୍ୟବସ୍ଥା କରାଯିବ । ଏହା ସହ ଧଉଳିକୁ 'ମୋ ବସ ଗଡ଼ିବା ନେଇ ଦାବି ଆସିଛି । ବସ ଯାତାୟାତ ନେଇ ଆଲୋଚନା କରାଯିବ । ସେହିପରି କୋଣାର୍କରେ 'ଲାଇଟ ଆଣ୍ଡ ସାଉଣ୍ଡ ସୋ' ପୁଣି ଆରମ୍ଭ ହେବ । ଏଥିପାଇଁ ଭିତ୍ତିଭୂମିର ବିକାଶର ଆବଶ୍ୟକତା ରହିଛି ଯେଉଁଥି ପାଇଁ କେନ୍ଦ୍ରସରକାର ସହାୟତାର ହାତ ବଢ଼ାଇଛନ୍ତି । ପର୍ଯ୍ୟଟନ ବିକାଶର ଅନେକ ଯୋଜନା ୩ ମାସ ଭିତରେ ସାମ୍ନାକୁ ଆସିବ ।"
'ବିକଶିତ ପର୍ଯ୍ୟଟନ ଦ୍ବାରା ରୋଜଗାର ବଢିବ':
ରାଜ୍ୟପାଳ ରଘୁବର ଦାସ କହିଛନ୍ତି," ବିକଶିତ ପର୍ଯ୍ୟଟନ ଦ୍ବାରା ରୋଜଗାର ବଢିବ। ଫଳରେ ରାଜ୍ୟର ଅର୍ଥ ବ୍ୟବସ୍ଥା ମଧ୍ୟ ସୁଦୃଢ ହେବ । "ପର୍ଯ୍ୟଟନ କ୍ଷେତ୍ରରେ ସଂଯୋଗ (କନେକ୍ଟିଭିଟି) ଏବଂ ଭିତ୍ତିଭୂମି ବିକାଶ ଉପରେ ଗୁରୁତ୍ୱ ଦେବାକୁ ସେ ରାଜ୍ୟ ସରକାରଙ୍କୁ ପରାମର୍ଶ ଦେଇଛନ୍ତି । କାର୍ଯ୍ୟକ୍ରମରେ ସସ୍ତି ଗ୍ରୁପ୍ ପ୍ରତିଷ୍ଠାତା ଡ. କିତେନ୍ଦ୍ର କୁମାର ମହାର୍ଷିଙ୍କୁ ଟୁରିଜମ୍ ରତ୍ନ ଆୱାର୍ଡ ଦିଆଯାଇଥିବା ବେଳେ ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ଵବିଦ୍ୟାଳୟ ସମେତ ୧୮ ଜଣଙ୍କୁ ଟୁରିଜମ୍ ଗୌରବ ସମ୍ମାନ ପ୍ରଦାନ କରାଯାଇଛି ।
'ପର୍ଯ୍ୟଟନ ବିକାଶର ମେରୁଦଣ୍ଡ ହେଉଛନ୍ତି ଗାଇଡ଼':
କାର୍ଯ୍ୟକ୍ରମରେ ବାଚସ୍ପତି ସୁରମା ପାଢୀ ସମ୍ମାନିତ ଅତିଥି ଭାବେ ଯୋଗଦେଇ ନିଜ କହିଛନ୍ତି," ଓଡ଼ିଶାରେ ପର୍ଯ୍ୟଟନ ବିକାଶର ସମ୍ଭାବନା ରହିଛି । ଯାହାର ପରିଚୟ ଜଗନ୍ନାଥ ଓ ଯେଉଁ ରାଜ୍ୟ ପ୍ରକୃତିର କୋଳରେ ଶୁଏ ସେଠି ପର୍ଯ୍ୟଟନର ବିକାଶ ଅବଶ୍ୟମ୍ଭାବୀ । ଏଥିପାଇଁ ରାଜ୍ୟ ସରକାର ପ୍ରଚେଷ୍ଟା ଜାରି ରଖିଥିବା ବେବେଳେ ଏକ ଗୁରଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିବ । ବଡ କଥା ହେଉଛି ଓଡିଶା ପର୍ଯ୍ୟଟନ ବିକାଶର ବିଚାର ଓ ବିସ୍ତାର ଘଟକ ବା ମେରୁଦଣ୍ଡ ହେଉଛନ୍ତି ଗାଇଡ଼ । ତେଣୁ ଟୁରିଷ୍ଟ ଗାଇଡଙ୍କ ଲାଗି ସ୍ୱତନ୍ତ୍ର ପାଠ୍ୟକ୍ରମ ଏବଂ ବିଦ୍ୟାଳୟ, ବିଶ୍ବବିଦ୍ୟାଳୟ ସ୍ଥାପନ କରିବାର ଆବଶ୍ୟକତା ରହିଛି । "
ଇଟିଭି ଭାରତ, ଭୁବନେଶ୍ବର
