ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କ ସୁରକ୍ଷାରେ ତ୍ରୁଟି । କାର୍କେଡ ସାମ୍ନାକୁ ଆସି ମହିଳାଙ୍କ ହଙ୍ଗାମା । ମୁଖ୍ୟମନ୍ତ୍ରୀଙ୍କୁ ଅଟକାଇବାକୁ ପ୍ରୟାସ । ମଙ୍ଗଳବାର ଅପରାହ୍ନରେ ରାଜଧାନୀ ଭୁବନେଶ୍ୱର ସ୍ଥିତ ରସୁଲଗଡ ଛକରେ ଜଣେ ଅଜଣା ମହିଳା ପୋଲିସ ସୁରକ୍ଷା ଭାଙ୍ଗି ମୁଖ୍ୟମନ୍ତ୍ରୀଙ୍କୁ ଅଟକାଇବାକୁ ଅପଚେଷ୍ଟା କରିଛନ୍ତି । ରାସ୍ତାମଝିକୁ ଚାଲିଆସି ହଙ୍ଗାମା କରିଥିଲେ । ଘଟଣାସ୍ଥଳରେ ମହିଳା ପୋଲିସ ଆସି ତାଙ୍କୁ କାବୁ କରିବା ପରେ ମୁଖ୍ୟମନ୍ତ୍ରୀଙ୍କ ଗାଡି ଆଗକୁ ଯାଇଥିଲା ।
ମଙ୍ଗଳବାର ଅପରାହ୍ନ ସମୟରେ ରସୁଲଗଡ ଓଭରବ୍ରିଜ ତଳ ରାସ୍ତାରେ ମୁଖ୍ୟମନ୍ତ୍ରୀ ଲୋକସେବା ଭବନ ଅଭିମୁଖେ ଯାଉଥିଲେ । ଯେଉଁଥିପାଇଁ ୧୫ମିନିଟ ପୂର୍ବରୁ ରସୁଲଗଡ ଗୋଲେଇ ଛକରୁ ବାଣୀବିହାରକୁ ଲମ୍ବିଥିବା ସର୍ଭିସ ରାସ୍ତା ବ୍ଲକ କରାଯାଇଥିଲା । ପୋଲିସ କର୍ମଚାରୀ ବାଇକ, କାର୍ ଓ ବସକୁ ରାସ୍ତାରେ ଅଟକାଇଥିଲେ । ତେବେ ଏହି ସମୟରେ ଜଣେ ମହିଳା କାରକେଡ ଆଗରେ ହଙ୍ଗାମା କରିଥିଲେ ।ରସୁଲଗଡ ଛକରେ ଥିବା ପୋଲିସ କର୍ମଚାରୀ ତାଙ୍କୁ ରାସ୍ତା କଡକୁ ଯିବାକୁ କହିଥିଲେ । କିନ୍ତୁ ମହିଳାଜଣକ ସେମାନଙ୍କ ସହ ଯୁକ୍ତିତର୍କ କରିବା ସହ ଅନ୍ୟ ପୋଲିସ ଭ୍ୟାନ ସାମ୍ନାକୁ ଚାଲିଯାଇ କାରକେଡକୁ ଅଟକାଇବାକୁ ଚେଷ୍ଟା କରିଥିଲେ ।ଉକ୍ତ ଭ୍ୟାନରେ ବସିଥିବା ପୁରୁଷ ପୋଲିସ ଅଧିକାରୀ ଓହ୍ଲାଇ ମହିଳାଙ୍କୁ ବୁଝାସୁଝା କରିଥିଲେ। କିନ୍ତୁ ମହିଳା ଜଣକ ମାନିନଥିଲେ ।
ପାଖାପାଖି ୫ ମିନିଟ ଧରି ଏଭଳି ଚାଲିବା ପରେ ସେଠାରେ କାର୍ଯ୍ୟରତ ଜଣେ ମହିଳା ପୋଲିସ କର୍ମଚାରୀ ଏହାଦେଖି ତୁରନ୍ତ ଘଟଣାସ୍ଥଳକୁ ଆସି ମହିଳାଙ୍କୁ ଟାଣି ଟାଣି ନେବାକୁ ଉଦ୍ୟମ କରିଥିଲେ ।କିଛି ମିନିଟ ଅଟକିବା ପରେ ମୁଖ୍ୟମନ୍ତ୍ରୀଙ୍କ କାରକେଡ୍ ସ୍ୱାଭାବିକ ଭାବେ ଯାଇଥିଲା ।
ଅନ୍ୟପଟେ ମହିଳା ଜଣକ କିଏ ଓ କାହିଁକି ଏଭଳି କରିଛନ୍ତି ସେନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ । ମହିଳାଜଣକ ଏକ ହଳଦିଆ ରଙ୍ଗର ପୋଷାକ ପିନ୍ଧିଥିବା ବେଳେ ତାଙ୍କ କଥାବାର୍ତ୍ତାରୁ ଶିକ୍ଷିତ ଭଳି ମନେ ହେଉଥିବା କୁହାଯାଇଛି । ଅନ୍ୟପଟେ ଏଠାରେ ପ୍ରଶ୍ନ ଉଠୁଛି ଯେ ମୁଖ୍ୟମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥାରେ ଏତେ କର୍ମଚାରୀ ନିୟୋଜିତ ଥାଇ ମଧ୍ୟ କିଭଳି ସୁରକ୍ଷା ବ୍ୟବସ୍ଥାରେ ତ୍ରୁଟି ଘଟିଲା ? ମହିଳା କର୍ମଚାରୀ ନିୟୋଜିତ ନଥିବାରୁ ଏଭଳି ଅଘଟଣ ଘଟିଲା କି ? ଉଚ୍ଚପଦାଧିକାରୀ ବ୍ୟକ୍ତିଙ୍କ ସୁରକ୍ଷା କ୍ଷେତ୍ରରେ ମହିଳା କର୍ମଚାରୀ ନିୟୋଜିତ ହେବାର ଆବଶ୍ୟକତା ରହିଛି କି ? ଯଦି ମୁଖ୍ୟମନ୍ତ୍ରୀଙ୍କ ସୁରକ୍ଷାରେ ମହିଳା କର୍ମଚାରୀ ଥାଆନ୍ତେ ତେବେ ଏତେ ସମୟ ଧରି ଏହି ହଙ୍ଗାମା ଦେଖିବାକୁ ମିଳିଥିବା କୁହାଯାଇଛି । ମହିଳା ପୋଲିସ ଉପସ୍ଥିତ ଥିଲେ ସମୟ ମଧ୍ୟରେ ମହିଳାଙ୍କୁ ଆୟତ୍ତ କରିପାରିଥାନ୍ତେ ବୋଲି କୁହାଯାଉଛି ।
ଇଟିଭି ଭାରତ, ଭୁବନେଶ୍ୱର
