ଭୁବନେଶ୍ବର: ମୋହନ ମାଝୀ ନେତୃତ୍ବାଧୀନ ବିଜେପି ସରକାରର ବହୁଚର୍ଚ୍ଚିତ ‘ସୁଭଦ୍ରା ଯୋଜନା’କୁ ନେଇ ଚର୍ଚ୍ଚା ଓ ବିବାଦ ଲାଗି ରହିଥିବା ବେଳେ ଆଜି ‘ସୁଭଦ୍ରା ସଚେତନତା ରଥ’ ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏହି ଭ୍ୟାନ ସମସ୍ତ ଜିଲ୍ଲା ମୁଖ୍ୟାଳୟ ଓ ଅନ୍ୟ ସମସ୍ତ ଅଞ୍ଚଳ ପରିଭ୍ରମଣ କରିବ । ଏହି ଯୋଜନା ସମ୍ପର୍କରେ ମହିଳା ଓ ଯୁବତୀଙ୍କୁ ସଚେତନ କରିବା ଲକ୍ଷ୍ୟରେ ଏହାକୁ ରାଜ୍ୟ ସରକାର ଆରମ୍ଭ କରିଛନ୍ତି । ଆଜି ମୁଖ୍ୟମନ୍ତ୍ରୀ ମୋହନ ମାଝୀ, ଉପମୁଖ୍ୟମନ୍ତ୍ରୀ ତଥା ମହିଳା ସଶକ୍ତିକରଣ ମନ୍ତ୍ରୀ ପ୍ରଭାତୀ ପରିଡା, ମୁଖ୍ୟ ଶାସନ ସଚିବ ମନୋଜ ଆହୁଜା ଓ ଭୁବନେଶ୍ବର ମେୟର ସୁଲୋଚନା ଦାସ ଉପସ୍ଥିତ ରହି ଏହି ରଥର ଶୁଭାରମ୍ଭ କରିଛନ୍ତି ।
- କ’ଣ କହିଲେ ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀ
କାର୍ଯ୍ୟକ୍ରମ ଅବସରରେ ଗଣମାଧ୍ୟମରେ ପ୍ରତିକ୍ରିୟା ରଖି ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି,‘‘ଚଳିତମାସ (ସେପ୍ଟେମ୍ବର) 17 ତାରିଖରୁ ଏହି ଯୋଜନା କାର୍ଯ୍ୟକାରୀ ହେବାକୁ ଯାଉଛି । ଏଥିରେ ରାଜ୍ୟର ମହିଳାମାନେ ସ୍ବାବଲମ୍ବୀ ହେବେ । ଗଣେଶ ଚତୁର୍ଥୀର ପବିତ୍ର ଅବସରରେ ଆଜି ‘ସୁଭଦ୍ରା ସଚେତନତା ରଥ’ର ଶୁଭାରମ୍ଭ କରାଯାଇଛି । ଏଥିରେ ଉପକୃତ ହେବାକୁ ଯାଉଥିବା ମହିଳାଙ୍କ ମଧ୍ୟରେ ସଚେତନତା ସୃଷ୍ଟି କରିବ । ରାଜ୍ୟର ପ୍ରାୟ ଏକ କୋଟି ମହିଳା ଏଥିରେ ଲାଭାନ୍ବିତ ହେବେ ।’’ ସେହିପରି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା କହିଛନ୍ତି, ‘‘ଏହି ପବିତ୍ର ଅବସରରେ ଶୁଭାରମ୍ଭ ହୋଇଥିବା ରଥ ରାଜ୍ୟର 338 ଟି ସ୍ଥାନ ପରିକ୍ରମା କରିବ । ଆମ ସରକାର ମହିଳାଙ୍କ ଉତ୍ଥାନ ପାଇଁ ପ୍ରତିବଦ୍ଧ । ଏଥିରେ ରାଜ୍ୟର ପ୍ରାୟ 1 କୋଟି ମହିଳା ଉପକୃତ ହେବେ । ପ୍ରତ୍ୟେକ ଘରେ ଏହି ରଥ ପହଞ୍ଚି ମହିଳାଙ୍କୁ ଯୋଜନା ସମ୍ପର୍କରେ ସଚେତନ କରିବ ।’’
#WATCH | Odisha CM Mohan Charan Majhi to shortly flag off 'Subhadra Awareness Van' in the presence of Deputy CM and Minister of Women and Child Development Pravati Parida, in Bhubaneswar pic.twitter.com/Z5DOQTdPbk
— ANI (@ANI) September 7, 2024
- ଯୋଜନାରେ ଆବେଦନ ପାଇଁ ବଭିନ୍ନ ସ୍ଥାନରେ ଅବ୍ୟବସ୍ଥା:-
ତେବେ ଯୋଜନା ପାଇଁ ଆବେଦନ କରିବାକୁ ବିଭିନ୍ନ ସ୍ଥାନରେ ମହିଳା ଓ ଯୁବତୀଙ୍କ ମଧ୍ୟରେ ମାତ୍ରାଧିକ ଉତ୍ସାହ ଦେଖିବାକୁ ମିଳିଛି । ଆଧାର କାର୍ଡ ଓ ଅନ୍ୟ ପ୍ରମାଣପତ୍ରରେ ଥିବା ତ୍ରୁଟି ସଂଶୋଧନ କରିବା ପାଇଁ ବିଭିନ୍ନ ଜନସେବା କେନ୍ଦ୍ର ଓ ଡାକଘରେ ନାହିଁନଥିବା ଭିଡ ମଧ୍ୟ ଦେଖିବାକୁ ମିଳିଛି । କିଛି ସ୍ଥାନରେ ବ୍ୟାପକ ଅବ୍ୟବସ୍ଥା ମଧ୍ୟ ସାମ୍ନାକୁ ଆସିଛି । ଲୋକେ ରାତି ରାତି ଲାଇନରେ ଛିଡା ହେଉଛନ୍ତି । ଧସ୍ତାଧସ୍ତିରେ ଆହତ ମଧ୍ୟ ହେଉଥିବାର ଚିତ୍ର ବିଭିନ୍ନ ସ୍ଥାନରୁ ଆସିବାରେ ଲାଗିଛି ।
#WATCH | Bhubaneswar: Odisha Deputy CM Pravati Parida says, " it is my good fortune that on the auspicious occasion of ganesh chaturthi, the subhadra yojana has been started by cm mohan charan majhi... we are committed to empowering women... today, this 'rajrath' has come to the… https://t.co/lCSr4p2ZRt pic.twitter.com/CPEwBLec9N
— ANI (@ANI) September 7, 2024
- ଆବେଦନ ଶେଷ ପାଇଁ କୌଣସି ନିର୍ଦ୍ଦିଷ୍ଟ ତାରିଖ ନାହିଁ
ଏପରି ସ୍ଥିତି ମଧ୍ୟରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା, ‘ସୁଭଦ୍ରା ଯୋଜନା’ ରେ ଆବେଦନ ପାଇଁ କୌଣସି ଶେଷ ତାରିଖ ଘୋଷଣା ହୋଇନାହିଁ ବୋଲି ସ୍ପଷ୍ଟୀକରଣ ରଖିଛନ୍ତି । 17 ତାରିଖ ପରେ ମଧ୍ୟ ଆବେଦନ କରିପାରିବେ ଓ ହିତାଧିକାରୀ ଯୋଜନାରେ ସମାନ ଅନୁଦାନ ପାଇବେ ବୋଲି ପ୍ରଭାତୀ କହିଥିଲେ । ଯିଏ ସୁଭଦ୍ରା ଯୋଜନା ନାଁରେ ଟଙ୍କା ମାଗୁଥିବ କିମ୍ବା ସାଧାରଣ ହିତାଧିକାରୀକୁ ହଇରାଣ କରୁଥିବ ତାଙ୍କ ନାମରେ ଅଭିଯୋଗ ହେଲେ ତୁରନ୍ତ କାଯ୍ୟନୁଷ୍ଠାନ ନିଆଯିବ l ସେମାନେ 14678 ହେଲ୍ପ ଲାଇନକୁ ଫୋନ କରନ୍ତୁ । ଉକ୍ତ ବ୍ୟକ୍ତିଙ୍କ ନାମରେ ଅଭିଯୋଗ କରନ୍ତୁ ବୋଲି ଉପମୁଖ୍ୟମନ୍ତ୍ରୀ କହିଥିଲେ l
ବ୍ୟୁରୋ ରିପୋର୍ଟ, ଇଟିଭି ଭାରତ
