ଭୁବନେଶ୍ବର: ନୂଆ ସରକାରରେ 3ଟି ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ହୋଇଛନ୍ତି ବିଭୁତି ଭୂଷଣ ଜେନା । ବିଭୁତିଙ୍କୁ ପରିବହନ, ଷ୍ଟିଲ ଏବଂ ମାଇନ୍ସ ଭଳି ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ମିଳିଛି । ଜନ ଭାଗିଦାରୀରେ ବିଭାଗ ପରିଚାଳନା ହେବ ବୋଲି କହିଛନ୍ତି ବିଭୁତି । ସେହିପରି ରାଜ୍ୟ ସମସ୍ତ ପ୍ରାକୃତିକ ସମ୍ପଦ ରାଜ୍ୟବାସୀଙ୍କ ସ୍ୱାର୍ଥରେ ଲାଗିବ ଓ ଦେଶରେ ଓଡିଶା ଇସ୍ପାତ ଉତ୍ପାଦନ କ୍ଷେତ୍ରରେ ପ୍ରଥମ ରାଜ୍ୟ ହେବ ବୋଲି ମଧ୍ୟ ସେ କହିଛନ୍ତି ।
ଦାୟିତ୍ବ ବଣ୍ଟନ ପରେ ବିଭୁତି କହିଛନ୍ତି, "ମୋ ମତରେ ସବୁ ବିଭାଗ ସମାନ । କିଛି ଛୋଟ କିମ୍ବା ବଡ଼ ନଥାଏ । ମୋ ମୁଖ୍ୟମନ୍ତ୍ରୀ ମୋତେ ଗୁରୁଦାଇତ୍ୱ ଦେଇଛନ୍ତି । ସେହି ଦାୟିତ୍ୱ ସୁଚାରୁରୂପେ ତୁଲେଇବି । ରାଜ୍ୟବାସୀଙ୍କ ସ୍ୱାର୍ଥ ଦୃଷ୍ଟିକୁ ରଖି କାମ କରିବୁ । ଖଣିଜ ସମ୍ପଦରେ ଭରପୁର ଓଡ଼ିଶା । ଏହି ପ୍ରାକୃତିକ ସମ୍ପଦ ଓ ଉତ୍ପାଦ ଓଡିଶାବାସୀଙ୍କ ସ୍ୱାର୍ଥରେ ଲାଗିବ । ଜନ ଭାଗିଦାରୀରେ ବିଭାଗ ପରିଚାଳନା ହେବ । ମୁଖ୍ୟମନ୍ତ୍ରୀଙ୍କ ଆଲୋଚନା ପରେ ବିସ୍ତୃତ ଭାବେ ଏହାକୁ କାର୍ଯ୍ୟକାରୀ କରିବି ।ବିନା ସମନ୍ୱୟରେ କୌଣସି କାର୍ଯ୍ୟ ଆଗକୁ ଯାଇ ପାରିବନାହିଁ ।"
ସେହିପରି ଆହୁରି ମଧ୍ୟ ସେ କହିଛନ୍ତି, ‘‘ସରକାରଙ୍କ କିଛି ନିଷ୍ପତ୍ତି ଘରୋଇ ବ୍ୟବସାୟୀଙ୍କୁ କଷ୍ଟ ଦିଏ । ଅତୀତ ସରକାରରେ ଏହା ହୋଇଛି ମଧ୍ୟ । ସମସ୍ତଙ୍କ ସହ ଆଲୋଚନା କରାଯାଇ ପଦକ୍ଷେପ ନିଆଯିବ । ପରିବହନ କ୍ଷେତ୍ର ରାଜ୍ୟର ଅଭିବୃଦ୍ଧିରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥାଏ । ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ କହୁଥିଲେ, ଯେଉଁ ଦେଶର ପରିବହନ ଓ ଗମନାଗମନ ବ୍ୟବସ୍ଥା ଠିକ ଅଛି, ସେ ଦେଶର ବିକାଶ ମଧ୍ୟ ଠିକ ଭାବେ ଚାଲିବ । ପରିବହନ ଉପରେ ରାଜ୍ୟର ବିକାଶ ନିର୍ଭର କରେ । ଖଣି ନୀତିର ପରିବର୍ତ୍ତନ ହୋଇଛି । ଓଡ଼ିଶାର ଯେଉଁ ଜିଲ୍ଲାରେ ଖଣି ଉତ୍ତୋଳନ କରାଯାଉଛି, ସେ ଜିଲ୍ଲାବାସୀ ପ୍ରଦୂଷଣ ଯୋଗୁଁ ସମସ୍ୟା ଭୋଗୁଛନ୍ତି । ତେଣୁ ବିକାଶ ସେଠି ନହୋଇ ଆଉ କେଉଁଠି ହେବ ? ଡିଏମଏଫର ତର୍ଜମା ହେବ ।’’
ଏହା ମଧ୍ୟ ପଢନ୍ତୁ :- ଗୃହ-ଅର୍ଥ ବିଭାଗ ରଖିଲେ ମୁଖ୍ୟମନ୍ତ୍ରୀ ମୋହନ ମାଝୀ, ଜାଣନ୍ତୁ ଆଉ କହାକୁ ମିଳିଲା କେଉଁ ବିଭାଗ - CM Mohan Majhi allocates portfolios
ରାଜ୍ୟରେ ଜିଲ୍ଲା ଖଣିଜ ପାଣ୍ଠି (ଡିଏମଏଫ)ର ସଠିକ ଭାବେ ବ୍ୟବହାର ହୋଇପାରିନାହିଁ । ଟଙ୍କା ଖର୍ଚ୍ଚ ହୋଇପାରିନାହିଁ । ଅନେକ ଟଙ୍କା ପଡିକି ରହିଛି । ଯେଉଁ ମାର୍ଗରେ ଖର୍ଚ୍ଚ ହେବା କଥା ହୋଇପାରିନାହିଁ । ଅନ୍ୟ କାର୍ଯ୍ୟରେ ଖର୍ଚ୍ଚ ହୋଇଛି । ପୁରୁଣା ସରକାରର ପୂର୍ଣ୍ଣଛେଦ ପଡିସାରିଛି । ନୂଆ କଥା ହେବ । ଷ୍ଟିଲ ଉତ୍ପାଦନରେ ଓଡିଶା ଏକ ନମ୍ବର କାହିଁକି ହୋଇପାରିବ ନାହିଁ । ଏ ବାବଦରେ ତର୍ଜମା କଲେ ଓଡିଶା ସବୁ ଦିଗରେ ଏକ ନମ୍ବର ହୋଇପାରିବ । ବିଜେପି ସରକାର ହିଁ ଏହା କରିପାରିବ ବୋଲି ମଧ୍ୟ ସେ ଆଶାବ୍ୟକ୍ତ କରିଛନ୍ତି ।
ଇଟିଭି ଭାରତ, ଭୁବନେଶ୍ବର
