ପୁରୀ: ନୌସେନା ଦିବସ ଉତ୍ସବ ପାଳନ ନେଇ ମହାପ୍ରଭୁ ଶ୍ରୀଜଗନ୍ନାଥଙ୍କୁ ପ୍ରଥମ ନିମନ୍ତ୍ରଣ ପତ୍ର ଦେଲେ ବରିଷ୍ଠ ନୌସେନା ଅଧିକାରୀ । ନୌସେନା ଦିବସକୁ ଭବ୍ୟ ଢଙ୍ଗରେ ପାଳନ ପାଇଁ ପୁରୀ ବ୍ଲୁ ଫ୍ଲାଗ ବିଚରେ ଚାଲିଛି ଜୋରଦାର ପ୍ରସ୍ତୁତି । ଡିସେମ୍ବର ୪ ତାରିଖରେ ବ୍ଲୁ ଫ୍ଲାଗ ବିଚରେ ଭବ୍ୟ ଢ଼ଙ୍ଗରେ ନୌସେନା ଦିବସକୁ ପାଳନ ପାଇଁ ସମସ୍ତ ପ୍ରସ୍ତୁତି କାର୍ଯ୍ୟ ଜୋରସୋରରେ ଆଗେଇ ଚାଲିଛି ।
ମହାପ୍ରଭୁଙ୍କୁ ଦେଲେ ନିମନ୍ତ୍ରଣ:
ଡିସେମ୍ବର ୪ରେ ନୌସେନା ଦିବସ ପାଇଁ ନୌସେନାର ବରିଷ୍ଠ ଅଧିକାରୀ ମାନେ ମହାପ୍ରଭୁଙ୍କୁ ପ୍ରଥମ ନିମନ୍ତ୍ରଣ ପତ୍ର ପ୍ରଦାନ କରିଛନ୍ତି । ଆଇଏନଏସ୍ କଳିଙ୍ଗର କମାଣ୍ଡିଙ୍ଗ ଅଫିସର ପ୍ରଦୀପ ପଟେଲ ଶ୍ରୀମନ୍ଦିର ଆସି ମହାପ୍ରଭୁଙ୍କ ନିକଟରେ ନିମନ୍ତ୍ରଣ ପତ୍ର ଲାଗି କରିଥିବା ବେଳେ ନୌସେନା ଦିବସ କାର୍ଯ୍ୟକ୍ରମ ସଫଳ ହେବା ନେଇ ପ୍ରାର୍ଥନା କରିଛନ୍ତି ।
ଶକ୍ତିପ୍ରଦର୍ଶନ କରିବେ ନୌବୀର:
ନୌସେନା ଦିବସ ଶକ୍ତିପ୍ରଦର୍ଶନ କରିବେ ନୌବୀର । ସେଥିପାଇଁ ଗୁରୁବାର ନୌବାହିନୀର ଯୁଦ୍ଧ ଜାହାଜ, ଯୁଦ୍ଧ ବିମାନ, ହେଲିକପ୍ଟର ସହିତ ମାର୍କୋସ୍ କମାଣ୍ଡୋ ଏବଂ ପାରାଚ୍ୟୁଟ ଟିମ୍ ବିଭିନ୍ନ ସମରକଳା ପ୍ରଦର୍ଶନ କରିଥିଲେ । ଏପଟେ ଶୁକ୍ରବାର ନୌସେନାର ବ୍ୟାଣ୍ଡ କନସର୍ଟର ରିହରସଲ ହୋଇଥିଲା ବ୍ଲୁ ଫ୍ଲାଗ ବିଚରେ । ନୌସେନାର ବରିଷ୍ଠ ଅଧିକାରୀମାନେ ପୁରୀରେ ପହଞ୍ଚି ସାରିଥିବା ବେଳେ ନୌସେନା ଦିବସ ପ୍ରସ୍ତୁତିକୁ ଆହୁରି ଜୋରଦାର କରିଛନ୍ତି । ଇତି ମଧ୍ୟରେ ୧୫ରୁ ଊର୍ଦ୍ଧ୍ବ ଯୁଦ୍ଧ ଜାହାଜ, ୨୦ରୁ ଊର୍ଦ୍ଧ୍ବ ଏୟାରକ୍ରାଫ୍ଟ ଓ ହେଲିକପ୍ଟର, ୧୫ରୁ ଊର୍ଦ୍ଧ୍ବ ଜେମିନି ବୋଟ, ଚାରୋଟି ଯୁଦ୍ଧ ଟ୍ୟାଙ୍କ ପୁରୀ ଉପକୂଳରେ ପହଞ୍ଚି ସାରିଥିବା ବେଳେ ଆସନ୍ତା ୧ ତାରିଖ ସୁଦ୍ଧା ସମସ୍ତ ୨୫ଟି ଯୁଦ୍ଧ ଜାହାଜ ଓ ୪୦ଟି ଏୟାରକ୍ରାଫ୍ଟ ନୌସେନା ଦିବସ ଉତ୍ସବରେ ସାମିଲ ହେବେ ।
ଯୋଗ ଦେବେ ରାଷ୍ଟ୍ରପତି:
ତେବେ ଆସନ୍ତା ୩ ତାରିଖରେ ନୌବାହିନୀ ପକ୍ଷରୁ ବିଭିନ୍ନ ସମରକଳାର ଡେମୋ ପ୍ରଦର୍ଶିତ ହେବ । ଏଥିରେ ୨୨ ପ୍ରକାରର ସମରକଳା ପ୍ରଦର୍ଶିତ ହେବାର କାର୍ଯ୍ୟକ୍ରମ ରହିଛି । କାର୍ଯ୍ୟକ୍ରମରେ ମୁଖ୍ୟ ଅତିଥି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ନୌସେନାର ପାରାଚ୍ୟୁଟ ଟିମ୍ ସ୍ବାଗତ କରିବାର କାର୍ଯ୍ୟକ୍ରମ ରହିଛି । ଏହି ଭବ୍ୟ କାର୍ଯ୍ୟକ୍ରମକୁ ଦେଖିବା ପାଇଁ ସମସ୍ତେ ଅପେକ୍ଷାରେ ଅଛନ୍ତି ।
ଲାଲ କାର୍ପେଟରେ ବ୍ଲୁ ଫ୍ଲାଗ ବିଚ:
ଡିସେମ୍ବର ୪ରେ ନୌସେନା ଦିବସରେ ନୌସେନା ପକ୍ଷରୁ ଆକର୍ଷଣୀୟ ଲେଜର ସୋ ମଧ୍ୟ ପ୍ରଦର୍ଶିତ କରାଯିବ । ଲାଲ୍ କାର୍ପେଟରେ ଅତି ଆକର୍ଷଣୀୟ ଭାବରେ ବ୍ଲୁ ଫ୍ଲାଗ ବିଚକୁ ସଜ୍ଜା ଯାଇଛି । ନୌସେନାର ଯବାନ ମାନେ କଲ୍ଚରାଲ ଷ୍ଟେଜରେ କଣ୍ଟିନ୍ୟୁଙ୍ଗ ପରେଡ ଅଭ୍ୟାସ କରୁଛନ୍ତି । ବ୍ଲୁ ଫ୍ଲାଗ ବିଚ୍ ରେ ନୌସେନା ଦିବସ ପାଳନରେ ରାଷ୍ଟ୍ରପତି, ପ୍ରତିରକ୍ଷା ମନ୍ତ୍ରୀ ଓ ତିନି ସେନାର ମୁଖ୍ୟ ମାନେ ବସିବା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି । ସୁରକ୍ଷା ଦାୟିତ୍ବରେ ସମୁଦାୟ ୮୦ ପ୍ଲାଟୁନ ପୋଲିସ ଫୋର୍ସ ସହ ୩୦୦ ବରିଷ୍ଠ ଅଧିକାରୀ ମୁତୟନ ହେବେ । ଭୁବନେଶ୍ୱର ଠାରୁ ପୁରୀ ଏବଂ ସମ୍ପୂର୍ଣ୍ଣ ପୁରୀ ସହରରେ ଟ୍ରାଫିକ ଓ ପାର୍କିଂ ବ୍ୟବସ୍ଥା ଉପରେ ବିଶେଷ ଦୃଷ୍ଟି ଦିଆଯାଇଛି। ସେପଟେ ଭିଆଇପି ଓ ଭିଭିଆଇପିଙ୍କ ସୁରକ୍ଷାକୁ ମଧ୍ୟ ପ୍ରଧାନ୍ୟ ଦିଆଯାଇଛି । ପୁରୀ ସହର ସମେତ ବିଭିନ୍ନ ପ୍ରବେଶ ପଥରେ ବ୍ୟାପକ ସିସିଟିଭି କ୍ୟାମେରା ଲଗାଯାଇଥିବା ବେଳେ ମୁଖ୍ୟ ରାସ୍ତା ଗୁଡିକରେ ବ୍ୟାରିକେଡ଼ିଙ୍ଗ ବ୍ୟବସ୍ଥା କରାଯାଉଛି ।
ଶୁଭ କାର୍ଯ୍ୟ ହୁଏ ପ୍ରଥମେ ମହାପ୍ରଭୁଙ୍କୁ ନିମନ୍ତ୍ରଣ:
ଶ୍ରୀମନ୍ଦିର ବରିଷ୍ଠ ସେବାୟତ ଗୌରହରି ପ୍ରଧାନ କହିଛନ୍ତି, "ମହାପ୍ରଭୁ ଶ୍ରୀ ଜଗନ୍ନାଥ ହେଉଛନ୍ତି କେବଳ ଓଡ଼ିଶାର ନୁହନ୍ତି । ସେ ହେଉଛନ୍ତି ଜଗତର ନାଥ । ଯେ କୌଣସି ଶୁଭ କାର୍ଯ୍ୟ ହୁଏ ପ୍ରଥମେ ମହାପ୍ରଭୁଙ୍କୁ ନିମନ୍ତ୍ରଣ କରାଯାଇଥାଏ । ଏହା ହେଉଛି ଆମ ଓଡ଼ିଆଙ୍କ ପରମ୍ପରା । ବାହାର ଲୋକମାନେ ମଧ୍ୟ ଏହି ପରମ୍ପରାକୁ ମାନି ଯେ କୌଣସି ଶୁଭ କାର୍ଯ୍ୟ ଆରମ୍ଭ କରନ୍ତି ପ୍ରଥମେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ପ୍ରଥମେ ନିମନ୍ତ୍ରଣ ପତ୍ର ଦେଇ ଅବଗତ କରାଇ ମହାପ୍ରଭୁଙ୍କ ଆଶୀର୍ବାଦ ଲୋଡ଼ିଥାନ୍ତି । ଭକ୍ତି ଓ ନିଷ୍ଠାର ସହ ଏହି କାର୍ଯ୍ୟ ଯିଏ କରିଥାଏ ମହାପ୍ରଭୁ ସବୁ କାର୍ଯ୍ୟ ନିଜେ ସୁଚାରୁରୂପେ ସମ୍ପାଦନା କରିଥାନ୍ତି । ତେବେ ପୁରୀରେ ନୌସେନା ଦିବସ ପାଳନ ଅବସରରେ ନୌସେନା ଅଧିକାରୀମାନେ ମହାପ୍ରଭୁଙ୍କ ଦର୍ଶନ କରି କାର୍ଯ୍ୟକ୍ରମର ପ୍ରଥମ ନିମନ୍ତ୍ରଣ ପତ୍ର ଦେଇ ଥିବାରୁ ଏହା ଏକ ସ୍ଵାଗତ ଯୋଗ୍ୟ ପଦକ୍ଷେପ । ’
🌊 Celebrate #NavyDay2024 with the Indian Navy’s spectacular Operational Demonstration #OpDemo2024 at the Blue Flag Beach, Puri on 04 December!🌊
— IN (@IndiannavyMedia) November 17, 2024
✨ Witness a breathtaking display of maritime strength⚓️, set against the majestic shoreline of Odisha🐚.
#IndianNavy #Odisha… pic.twitter.com/XxHjNylsvj
ସେ ଆହୁରି କହିଛନ୍ତି, ‘ଆମ ପରମ୍ପରା ଅନୁସାରେ ଶ୍ରୀମନ୍ଦିରରେ ଯେଉଁ ପାଳିଆ ଖୁଣ୍ଟିଆ ଥାଆନ୍ତି ସେମାନେ ଭକ୍ତ ଦେଇଥିବା ନିମନ୍ତ୍ରଣ ପତ୍ର ମହାପ୍ରଭୁଙ୍କ ନିକଟରେ ଲାଗି କରି ନିମନ୍ତ୍ରଣ ପତ୍ରକୁ ମହାପ୍ରଭୁଙ୍କ ସମ୍ମୁଖରେ ପଠନ କରିଥାନ୍ତି । ଗୁଆ, ନଡ଼ିଆ, ଚାଉଳ ସହିତ ନିମନ୍ତ୍ରଣ ପତ୍ର ଦିଆଯାଇ ମହାପ୍ରଭୁଙ୍କୁ ନିମନ୍ତ୍ରଣ କରାଯାଇଥାଏ । ବିଶ୍ଵ ବ୍ରହ୍ମାଣ୍ଡ ଠାକୁରଙ୍କ ନିକଟରେ ଭକ୍ତର କଥା ପହଞ୍ଚିଲେ ନିଶ୍ଚିତ ସେ କାର୍ଯ୍ୟ ସଫଳ ହେବ ତେବେ ଏହି ପରମ୍ପରା ବହୁ ପୁରୁଣା । ତେବେ ପୁରୀରେ ନୌସେନା ଦିବସରେ ମହାମହିମ ରାଷ୍ଟ୍ରପତି ମୁଖ୍ୟ ଅତିଥି ଭାବରେ ଯୋଗ ଦେଉଛନ୍ତି । ତେବେ ମହାପ୍ରଭୁଙ୍କୁ କାର୍ଯ୍ୟକ୍ରମର ପ୍ରଥମ ନିମନ୍ତ୍ରଣ ପତ୍ର ଦିଆଯାଇ ଆଶୀର୍ବାଦ ଲୋଡା ଯାଇଥିବାରୁ ନିଶ୍ଚିତ ଆଗାମୀ ନୌସେନା ଦିବସ ଉତ୍ସବ ବେଶ ସଫଳତାର ସହ ଅନୁଷ୍ଠିତ ହେବ ।"
ଏହା ମଧ୍ୟ ପଢନ୍ତୁ: ପୁରୀରେ ଯୁଦ୍ଧ ଜାହାଜ, ନୌସେନା ଦିବସରେ ପରାକ୍ରମ ଦେଖିବ ଦେଶ ନୌସେନା ଦିବସ: ଆସୁଛନ୍ତି ରାଷ୍ଟ୍ରପତି, ସଜେଇ ହେଲାଣି ପୁରୀ Navy Day ସେଲିବ୍ରେସନ ପାଇଁ ଜୋରଦାର ପ୍ରସ୍ତୁତି, ପୁରୀ ସମୁଦ୍ରରେ ନୌସେନାର ଅଭ୍ୟାସ |
ଶ୍ରୀମନ୍ଦିର ସୁଆର ମହାସୁଆର ନିଯୋଗର ସମ୍ପାଦକ ନାରାୟଣ ମହାସୁଆର କହିଛନ୍ତି, ‘ରାଷ୍ଟ୍ରପତି ଶ୍ରୀମନ୍ଦିର ଗସ୍ତକୁ ଶୃଙ୍ଖଳିତ କରିବା ପାଇଁ ସବୁ ସେବାୟତ ମାନେ ପ୍ରସ୍ତୁତ ହୋଇ ରହିଛନ୍ତି । ତେବେ ଛତିଶା ନିଯୋଗର ନିଷ୍ପତ୍ତି ମୁତାବକ ଡ଼ିସେମ୍ବର ୪ତାରିଖ ସକାଳ ୫ଟା ରେ ଦ୍ଵାର ଫିଟା ନୀତି ପରେ ମଙ୍ଗଳ ଆଳତି ନୀତି ସହିତ ଅନ୍ୟାନ୍ୟ ନୀତି ଅନୁଷ୍ଠିତ ହେବ । ତେବେ ମହାମହିମ ରାଷ୍ଟ୍ରପତି ମହାପ୍ରଭୁଙ୍କୁ ଦର୍ଶନ କରିବା ନିମନ୍ତେ ଗୋପାଳ ବଲ୍ଲଭ ଭୋଗ ସକାଳୁ ହେବ ନାହିଁ । ବେଶ ସହିତ ମହାପ୍ରଭୁଙ୍କ ଅନ୍ୟ ନୀତି ରହିବ । ରାଷ୍ଟ୍ରପତି ମହାପ୍ରଭୁଙ୍କୁ ଦର୍ଶନ କରିବା ପରେ ଗୋପାଳ ବଲ୍ଲଭ ନୀତି ସହ ଅନ୍ୟାନ୍ୟ ନୀତି ଅନୁଷ୍ଠିତ ହେବ । ସାଢେ଼ ଦଶଟା ରୁ ୧୧ ଟା ଭିତରେ ରାଷ୍ଟ୍ରପତି ଶ୍ରୀମନ୍ଦିରକୁ ଆସିବେ । ଶ୍ରୀମନ୍ଦିର ଭିତର ଗୁମୁଟକୁ କୌଣସି ସେବାୟତ ଯିବେ ନାହିଁ । ବିଭିନ୍ନ ଯାଗାରେ ଯେଉଁ ସେବାୟତ ମାନେ ରହୁଥିଲେ ସେମାନେ ରହି ପାରିବେନାହିଁ । ଶ୍ରୀମନ୍ଦିର ଭିତରେ ଅଧିକ ପ୍ରତିହାରୀ ସେବକଙ୍କୁ ରଖାଯିବ । ସେମାନେ ଶ୍ରୀ ମନ୍ଦିର ଭିତରକୁ କୌଣସି ସେବାୟତଙ୍କୁ ଛାଡିବେ ନାହିଁ । ଗର୍ଭଗୃହ ଭିତରେ ମହାମହିମ ରାଷ୍ଟ୍ରପତି ମହାପ୍ରଭୁଙ୍କୁ ଦର୍ଶନ କରିବେ । ତେବେ ରାଷ୍ଟ୍ରପତିଙ୍କ ପାଇଁ ମହାପ୍ରସାଦ ପ୍ରସ୍ତୁତି ନେଇ ଆମକୁ ପ୍ରଶାସନ ପକ୍ଷରୁ କୌଣସି ସୂଚନା ମିଳିନାହିଁ । ଯଦି କିଛି ନିର୍ଦ୍ଦେଶ ଆସେ ଆମେ ମହାପ୍ରସାଦ ବ୍ୟବସ୍ଥା କରିବୁ । ମହାମହିମ ରାଷ୍ଟ୍ରପତି ଦର୍ଶନ କରି ଶ୍ରୀମନ୍ଦିରରୁ ପ୍ରତ୍ୟାବର୍ତ୍ତନ ପରେ ଭକ୍ତ ମାନେ ମହାପ୍ରଭୁଙ୍କୁ ଦର୍ଶନ ପାଇଁ ଛଡାଯିବ । ସକାଳ ୮ ଟାରେ ଶ୍ରୀମନ୍ଦିରକୁ ଶୋଧ କରାଯିବ । ଭକ୍ତ ମାନଙ୍କୁ ଆଉ ଶ୍ରୀମନ୍ଦିରକୁ ପ୍ରବେଶ କଟକଣା ଲଗାଯିବ ।’
ଇଟିଭି ଭାରତ, ପୁରୀ
