ଭୁବନେଶ୍ବର: ଆଜି ଆଜି ଜାତୀୟ ଏକତା ଦିବସ । ମହାନ ଜନନାୟକ ଓ ବିଶିଷ୍ଟ ସ୍ୱାଧୀନତା ସଂଗ୍ରାମୀ ତଥା ଭାରତର ପ୍ରଥମ ଉପପ୍ରଧାନମନ୍ତ୍ରୀ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କର ୧୪୯ ତମ ଜୟନ୍ତୀ । ସେ ଏକତାର ପ୍ରତୀକ ହୋଇଥିବା ବେଳେ ତାଙ୍କ ଜନ୍ମ ଜୟନ୍ତୀଙ୍କୁ ଏକତା ଦିବସ ରୂପେ ପାଳନ ଯାଉଛି । ଆଉ ଆଜିର ଦିନରେ ତାଙ୍କୁ ଶ୍ରଦ୍ଧାଞ୍ଜଳି ସ୍ୱରୂପ ରାଜ୍ୟ ପୋଲିସ ପକ୍ଷରୁ ରାଷ୍ଟ୍ରୀୟ ଏକତା ଦିବସ ୨୦୨୪ ପାଳିତ ହୋଇଯାଇଛି ।
ଲୌହମାନବଙ୍କୁ ଶ୍ରଦ୍ଧାଞ୍ଜଳି:
ଭୁବନେଶ୍ୱରସ୍ଥିତ ଓ.ଏସ.ଏ.ପି. ସପ୍ତମ ବାଟାଲିୟନଠାରେ ରାଜ୍ୟସ୍ତରୀୟ ରାଷ୍ଟ୍ରୀୟ ଏକତା ଦିବସ ପରେଡ ହୋଇଯାଇଛି । ଏହି ଅବସରରେ ମୁଖ୍ୟ ଅତିଥି ଭାବେ ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଯୋଗେଶ ବାହାଦୁର ଖୁରାନିଆ ଯୋଗଦେଇ ମହାପୁରୁଷ ସର୍ଦ୍ଦାର ପଟେଲଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବା ସହ ସମ୍ମିଳିତ ପ୍ୟାରେଡ ଅଭିବାଦନ ଗ୍ରହଣ କରିଥିଲେ । ଏହାସହ ଆରକ୍ଷୀ ମହାନିର୍ଦ୍ଦେଶକ ସର୍ଦ୍ଦାର ପଟେଲଙ୍କ ଜୀବନ ଦର୍ଶନ ଉପରେ ଆଲୋଚନା କରିବା ସହ ତାଙ୍କ କାର୍ଯ୍ୟlବଳୀ, କାର୍ଯ୍ୟଦକ୍ଷତା, ଦେଶପ୍ରେମ ଓ ସ୍ଵାଧୀନତା ସଂଗ୍ରାମରେ ଅତୁଳନୀୟ ଅବଦାନ ସମ୍ପର୍କରେ ଆଲୋକପାତ କରିଥିଲେ । ସ୍ଵାଧୀନତା ପରେ ଅନେକ ରାଜ୍ୟକୁ ଭାରତରେ ମିଶାଇବା ପାଇଁ ସର୍ଦ୍ଦାର ପଟେଲ ଯେଉଁ ଅକ୍ଲାନ୍ତ ପରିଶ୍ରମ କରିଥିଲେ, ତାହା ଅତୁଳନୀୟ ଥିଲା । ଫଳରେ ବିଶ୍ଵରେ ଭାରତ ଆଜି ଏକ ସ୍ଵତନ୍ତ୍ର ରାଷ୍ଟ୍ର ଭାବେ ପରିଚୟ ଲାଭ କରିଛି ଖୁରାନିଆ ମତବ୍ୟକ୍ତ କରିଛନ୍ତି ।
ଶପଥ ନେଲେ ପୋଲିସ ଅଧିକାରୀ:
କାର୍ଯ୍ୟକ୍ରମରେ ରାଷ୍ଟ୍ରୀୟ ଏକତାକୁ ନେଇ ଶପଥ ନେଇଥିଲେ ଉପସ୍ଥିତ ପୋଲିସ ଅଧିକାରୀ । ଦେଶର ଅଖଣ୍ଡତା ଏକତା ବଜାୟ ରଖିବାକୁ ରାଜ୍ୟ ପୋଲିସ ସମ୍ମିଳିତ ଭାବେ ଶପଥ ନେଇଛନ୍ତି । ଏହି ଅବସରରେ ପୋଲିସ ଅଧିକାରୀମାନେ ପ୍ୟାରେଡ ପରିବେଷଣ କରିଛନ୍ତି । ପୋଲିସ ବ୍ୟାଣ୍ଡ ସହ ରାଜ୍ୟ ପୋଲିସର ବିଭିନ୍ନ ଅଧିକାରୀମାନେ ପ୍ୟାରେଡ଼ ପଦର୍ଶନ କରିଛନ୍ତି । ଏହି କାର୍ଯ୍ୟକ୍ରମରେ ବରିଷ୍ଠ ପୋଲିସ ଅଧିକାରୀମାନେ ଉପସ୍ଥିତ ଥିଲେ । ସ୍ୱାଧୀନ ଭାରତର ଲୌହମାନବ ସର୍ଦ୍ଦାର ବଲ୍ଲଭ ପଟେଲଙ୍କ ଜନ୍ମ ତିଥିଙ୍କ ଦିନକୁ ଏକତା ଦିବସ ଭାବେ ଓଡିଶା ପୋଲିସ ପାଳନ କରୁଛି ଓ ତାଙ୍କର ଦେଶ ପ୍ରତି ଥିବା ତ୍ୟାଗ ଓ ସାହସର ପରାକାଷ୍ଠାକୁ ମନେ ପକାଉଛି ବୋଲି ପୋଲିସ ମହାନିର୍ଦ୍ଦେଶକ ଯୋଗେଶ ବାହାଦୁର ଖୁରାନିଆ କହିଛନ୍ତି ।
ଇଟିଭି ଭାରତ, ଭୁବନେଶ୍ବର
