ଭୁବନେଶ୍ୱର: ମୋଦିଙ୍କ ସମ୍ବଲପୁର ଗସ୍ତକୁ ନେଇ ପ୍ରତିକ୍ରିୟା ରଖିଛି କଂଗ୍ରେସ । ଏହି ଗସ୍ତ ସମୟରେ ମୋଦି ରାଜ୍ୟ ସରକାରଙ୍କ ଉଦ୍ଦେଶ୍ୟରେ କୌଣସି କଡ଼ା ଭାଷା ପ୍ରୟୋଗ କରିନଥିଲେ । ଯାହାକୁ ନେଇ ରାଜ୍ୟ ରାଜନୀତି ସରଗରମ ହେବାରେ ଲାଗିଛି । କଂଗ୍ରେସ ଉଭୟ ବିଜେପି ଏବଂ ବିଜେଡ଼ିକୁ ଟାର୍ଗେଟ କରିଛି । ଉଭୟ ଦଳର ଟିକେଟ କଥା ଅମିତ ଶାହ ନିଷ୍ପତ୍ତି ନେଉଛନ୍ତି ବୋଲି କଂଗ୍ରେସ ଅଭିଯୋଗ କରିଛି । ଆଜି (ରବିବାର) ଏକ ସାମ୍ବାଦିକ ସମ୍ମଳନୀରେ ଖୁବ୍ ବର୍ଷିଛନ୍ତି ରାଜ୍ୟ କଂଗ୍ରେସ ପ୍ରଭାରୀ ଡ଼ ଅଜୟ କୁମାର ।
ପ୍ରଭାରୀ ଅଜୟ କୁମାର କହିଛନ୍ତି," ବିଜେଡ଼ି ସୂତ୍ରରୁ ଖବର ଅଛି ଯେ ଆସନ୍ତା ନିର୍ବାଚନରେ ଅଶ୍ଵିନୀ ବୈଷ୍ଣବ କଟକରୁ ଲଢ଼ିବେ । ପୁରୀରୁ ଲଢ଼ିବେ ସମ୍ବିତ । ଏମାନେ ଡିଲ୍ କରି ଭୋଟ ଜିତିବେ । ସମ୍ବଲପୁର ଆସି ପ୍ରଧାନମନ୍ତ୍ରୀ ପଦେ ବି ରାଜ୍ୟ ସରକାରଙ୍କ ବିଷୟରେ କହିଲେନି । ରାଜ୍ୟ ସରକାର ବିରୋଧରେ ତାଙ୍କର ମୁହଁ ଖୋଲିଲା ନାହିଁ ।" ଏହା ସହ ସେ ପାଣ୍ଡିଆନ, ଅଶ୍ଵିନୀ ବୈଷ୍ଣବ ଓ ପ୍ରଭାକରନ ଭଳି ଲୋକେ ରାଜ୍ୟ ନିର୍ବାଚନରେ ଭୂମିକା ନେବେ ବୋଲି କହିଥିଲେ ।
ସେ ଆହୁରି ମଧ୍ୟ ପହିଛନ୍ତି," ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟରେ ସେଟିଂ ରହିଛି । ପ୍ରଧାନମନ୍ତ୍ରୀ ଗତକାଲି ତାଙ୍କ ଅଭିଭାଷଣରେ ମୁଖ୍ୟମନ୍ତ୍ରୀ କିମ୍ବା ରାଜ୍ୟ ସରକାରଙ୍କ ବିରୋଧରେ କିଛି କହିଲେ ନାହିଁ । ଓଲଟା ନବୀନ ବାବୁ ତାଙ୍କ ମିତ୍ର ବୋଲି କହିଲେ । ଅନ୍ୟ ରାଜ୍ୟକୁ ଗଲେ ସେଠାକାର ମୁଖ୍ୟମନ୍ତ୍ରୀଙ୍କ ବିରୋଧରେ ତ ଅନେକ କଥା କହୁଛନ୍ତି ମୋଦି । ଏଠି କହିକି କହିଲେ ନାହିଁ । ଏହାର ଅର୍ଥ ଦୁଇ ଦଳ ଗୋଟିଏ ଦଳ । ଉଭୟ ବିଜେପି ଏବଂ ବିଜେଡି ଦଳର ନିଷ୍ପତ୍ତି ଅମିତ ଶାହ ନେଉଛନ୍ତି । ନବୀନ ପଟ୍ଟନାୟକ ଏବଂ ପାଣ୍ଡିଆନ ମଧ୍ୟ ସମସ୍ତ ରିପୋର୍ଟ ଅମିତ ଶାହଙ୍କୁ ଦେଉଛନ୍ତି । "
ଏହା ମଧ୍ୟ ପଢନ୍ତୁ ....ସମ୍ବଲପୁର ମୋଦି ଗସ୍ତ, ବିଜେଡି-ବିଜେପିର ହନିମୁନ: କଂଗ୍ରେସ ପ୍ରଭାରୀ
ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସମ୍ବଲପୁର ଗସ୍ତରେ ଆସିଥିଲେ । ମୋଦି ଆଇଆଇଏମର ନବନିର୍ମିତ କ୍ୟାମ୍ପସକୁ ଉଦଘାଟନ କରିବା ସହ ରେମେଡ ପଡ଼ିଆରେ ଦଳୀୟ କାର୍ଯ୍ୟକ୍ରମରେ ଯୋଗ ଦେଇଥିଲେ । ତେବେ ପ୍ରଧାନମନ୍ତ୍ରୀ ମୋଦି ଶାସକ ବିଜେଡ଼ି ଏବଂ ନବୀନଙ୍କ ପ୍ରତି କୌଣସି ସମାଲୋଚନାମୂଳକ ବୟାନ ଦେଇନଥିଲେ । ଏମିତିକି ରାଜ୍ୟ ସରକାର କିମ୍ବା ବିଜେଡି ବିଷୟରେ ପଦଟିଏ ବି କହିନଥିଲେ । ମୋଦି କଂଗ୍ରେସ ଉପରେ ବର୍ଷିଥିବା ଦେଖିବାକୁ ମିଳିଥିଲା ।
ଇଟିଭି ଭାରତ, ଭୁବନେଶ୍ୱର
