କେନ୍ଦୁଝର: ସୁନାର ଜିଲ୍ଲା ପାଲଟିବ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଜନ୍ମମାଟି କେନ୍ଦୁଝର ଜିଲ୍ଲା । "କେନ୍ଦୁଝରର ବିକାଶର ରାସ୍ତା ଖୋଲିବ । କେନ୍ଦୁଝର ଜିଲ୍ଲାରୁ ହିଁ ଆରମ୍ଭ ହେବ ଓଡ଼ିଶା ବିକାଶର ରଥ । ମା' କାଳୀଙ୍କ କୃପାରୁ କେନ୍ଦୁଝରର ପ୍ରଗତି ହେବ" ବୋଲି କେନ୍ଦୁଝର ଗସ୍ତର ଶେଷ ଦିନରେ ଆଜି ଏଭଳି କହିଛନ୍ତି ମୁଖ୍ୟମନ୍ତ୍ରୀ ।
କେନ୍ଦୁଝରରୁ ଓଡ଼ିଶାର ବିକାଶ ଆରମ୍ଭ:
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, "କେନ୍ଦୁଝରର ସବୁଠାରୁ ବଡ଼ପର୍ବ କାଳୀପୂଜା । କେନ୍ଦୁଝରର ସର୍ବ ପୂରାତନ କାଳି ପଡ଼ିଆରେ ମା'ଙ୍କ ଦର୍ଶନ କଲି । ମା'ଙ୍କ ପାଖରେ କେନ୍ଦୁଝରବାସୀଙ୍କ ସୁଖ, ଶାନ୍ତି ସମୃଦ୍ଧି କାମନା କଲି । କେନ୍ଦୁଝରର କେମିତି ଉନ୍ନତି ହେବ ମା'ଙ୍କ ପାଖରେ ପ୍ରାର୍ଥନା କରିଛି । ମା' ମୋତେ ଆଶୀର୍ବାଦ କରିଛନ୍ତି, ଓଡ଼ିଶାର ଦାୟିତ୍ବ ଦେଇଛନ୍ତି । ତେଣୁ ଓଡ଼ିଶାର ବିକାଶ ଓ ପ୍ରଗତି କେନ୍ଦୁଝରରୁ ଆରମ୍ଭ ହେବ । କେନ୍ଦୁଝର ପାଇଁ ବିକାଶର ରାସ୍ତା ଖୋଲି ଯାଇଛି । ବିଧାନସଭାରେ କେନ୍ଦୁଝର ପାଇଁ ଲଢେଇ କରୁଥିଲି ଓ ମା'ଙ୍କ ନିକଟରେ ପ୍ରାର୍ଥନା କରୁଥିଲି । ଆଜି ମା' ମୋତେ ଓଡ଼ିଶାର ଓ କେନ୍ଦୁଝର ଦାୟିତ୍ବ ଦେଇଛନ୍ତି । ମା'ଙ୍କ ଆଶୀର୍ବାଦରୁ ବିକାଶ ହେବ । କେନ୍ଦୁଝରକୁ ସୁନାର କେନ୍ଦୁଝର କରିବା ପାଇଁ ମୋର ଯେଉଁ ଇଚ୍ଛା ଥିଲା ମା' କାଳୀ ଓ ପ୍ରଭୁ ଜଗନ୍ନାଥଙ୍କ କୃପାରୁ ତାହା ପୂରଣ ହେବ ।"
ଏହା ବି ପଢନ୍ତୁ...ମୁଖ୍ୟମନ୍ତ୍ରୀ ହେବା ପରେ ରାଇକଳାରେ ମୋହନ ମାଝୀଙ୍କ ପ୍ରଥମ ଦୀପାବଳି, ଆଜି ଗୋବର୍ଦ୍ଧନ ପୂଜା ପରେ କାଳୀ ମଣ୍ଡପ ପରିଦର୍ଶନ
ଏହା ମଧ୍ୟ ପଢନ୍ତୁ:- ଜନ୍ମମାଟି ରାଇକଳାରେ ଦୀପାବଳି ପାଳିଲେ ମୁଖ୍ୟମନ୍ତ୍ରୀ: ବାଣ ଫୁଟାଇଲେ,ବାଜା ବଜାଇଲେ
ଏହା ମଧ୍ୟ ପଢ଼ନ୍ତୁ...ରାଜଧାନୀ ଫୁଟପାଥରୁ ଦୀପ କିଣିଲେ ମୁଖ୍ୟମନ୍ତ୍ରୀ, ପୁରୁଣା ସ୍ମୃତିକୁ କଲେ ତାଜା
ପୂଜା ମଣ୍ଡପ ବୁଲିଲେ ମୁଖ୍ୟମନ୍ତ୍ରୀ:
ଦ୍ୱିତୀୟ ଦିନରେ ସକାଳୁ ମୁଖ୍ୟମନ୍ତ୍ରୀ ନିଜ ରାଇକଳା ସ୍ଥିତ ଗ୍ରାମକୁ ଯାଇ ଘରୋଇ ପାରମ୍ପରିକ କାର୍ଯ୍ୟକ୍ରମରେ ଯୋଗ ଦେଇଥିଲେ । ସେଠାରେ ଦୀର୍ଘ ସମୟ ପୂଜାର୍ଚ୍ଚନା କରିବା ପରେ ଗ୍ରାମବାସୀ ଓ ପରିବାର ସହ ପ୍ରସାଦ ସେବନ କରିଥିଲେ । ପରେ ମୁଖ୍ୟମନ୍ତ୍ରୀ ମୋହନ ମାଝୀ କେନ୍ଦୁଝର ସହର ସ୍ଥିତ କାଳୀ ମନ୍ଦିର ଓ ମେଢ଼ ଦର୍ଶନ କରିଥିଲେ । କେନ୍ଦୁଝର ସହରର ସର୍ବ ପୁରାତନ ନେତ୍ରାକାଳୀ ଓ କାଳୀ ତୀର୍ଥ କାଳୀ ମେଢ଼ ଦର୍ଶନ ଓ ପୂଜା କରିବା ସହ ମୀନା ବଜାର ବୁଲିଥିଲେ । ମା'ଙ୍କ ଦର୍ଶନ ପରେ ରାଇସୁଆଁ ଏୟାର ଷ୍ଟ୍ରିପରୁ ମୁଖ୍ୟମନ୍ତ୍ରୀ ଭୁବନେଶ୍ଵର ଅଭିମୁଖେ ଉଡାଣ ଭରିଥିଲେ ।
ଇଟିଭି ଭାରତ, କେନ୍ଦୁଝର
