ଭବାନୀପାଟଣା: ସ୍ତ୍ରୀକୁ ନୃଶଂସ ଭାବେ ପିଟି ପିଟି ହତ୍ୟା କରିବା ମାମଲାରେ ସ୍ବାମୀକୁ ଜେଲ୍ । ପତ୍ନୀହନ୍ତାକୁ ଆଜୀବନ ଜେଲ୍ ପଠାଇଲେ ଅଦାଲତ । ୬ ବର୍ଷ ପୂର୍ବେ କଳାହାଣ୍ଡି ଜିଲ୍ଲା ସଦର ଥାନା ଅନ୍ତର୍ଗତ ଡାହାଣୀ ପଦର ଗାଁରେ ଏହି ଜଘନ୍ୟ ହତ୍ୟାକାଣ୍ଡ ଘଟିଥିଲା । ସ୍ତ୍ରୀ ପାଣି ଦେବାରେ ଟିକେ ଡେରି କରିବାରୁ ତାଙ୍କୁ ଠେଙ୍ଗାରେ ଆକ୍ରମଣ କରି ହତ୍ୟା କରିଥିଲା ସ୍ବାମୀ । କଳାହାଣ୍ଡି ଜିଲ୍ଲା ଦୌରାଜଜ ଏବେ ଏହି ମାମଲାର ଶୁଣାଣି କରି ହତ୍ୟାକାରୀ ସ୍ବାମୀକୁ ଆଜୀବନ ଜେଲଦଣ୍ଡ ସହ ୨୦ ହଜାର ଟଙ୍କା ଜରିମାନ ନିର୍ଦ୍ଦେଶ ଦେଇଛନ୍ତି । ଜରିମାନା ଅନାଦେୟ ହେଲେ ଅତିରିକ୍ତ ୬ ମାସ ଜେଲଦଣ୍ଡ ଭୋଗିବାକୁ ପଡିବ ବୋଲି ନିର୍ଦ୍ଦେଶ ହୋଇଛି ।
ସୂଚନା ଅନୁଯାୟୀ, ୨୦୧୮ ମସିହା ଅକ୍ଟୋବର ୧୯ ତାରିଖରେ ଏହି ହତ୍ୟାକାଣ୍ଡ ଘଟିଥିଲା । ସେଦିନ ଡାହାଣୀ ପଦର ଗାଁର କାନ୍ଦ୍ରା ମାଝୀ ବିଳମ୍ବିତ ରାତିରେ ଘରକୁ ଆସି ସ୍ତ୍ରୀକୁ ପାଣି ମାଗିଥିଲା । ସେହି ସମୟରେ ସ୍ତ୍ରୀ ଆଦ୍ରାଣୀ ମାଝୀ ଶୋଇଥିଲେ । ନିଦରେ ଥିବାରୁ ପାଣି ଦେବାରେ ଟିକିଏ ବିଳମ୍ବ ହୋଇଯାଇଥିଲା । ଏଥିରେ ଉତକ୍ଷିପ୍ତ ହୋଇ ସ୍ବାମୀ କାନ୍ଦ୍ରା ଶୋଇବା ଖଟ କଡ଼ରେ ଥିବା ଏକ ଠେଙ୍ଗାରେ ଅତି ନିର୍ଦ୍ଦୟ ଭାବେ ନିଜ ସ୍ତ୍ରୀର ମୁଣ୍ଡକୁ ବାରମ୍ବାର ଆଘାତ ଦେଇଥିଲା । ଏଥିରେ ଘଟଣାସ୍ଥଳରେ ହିଁ ସ୍ତ୍ରୀ ଆଦ୍ରାଣୀ ମାଝୀଙ୍କ ମୃତ୍ୟୁ ହୋଇଯାଇଥିଲା ।
ଏହା ମଧ୍ୟ ପଢନ୍ତୁ: ଜେଲ ଗଲେ ଭଣ୍ଡ ବାବା, ଗୁଣିଗାରେଡ଼ି ନାଁରେ ଲଗାଉଥିଲେ ଚୂନା - Fraud Baba Arrested
ଏହା ମଧ୍ୟ ପଢନ୍ତୁ: ଦିବ୍ୟାଙ୍ଗ ଯୁବତୀଙ୍କୁ ଦୁଷ୍କର୍ମ ଘଟଣା, ଅଭିଯୁକ୍ତକୁ ୧୦ ବର୍ଷ ଜେଲ ଦଣ୍ଡାଦେଶ
ପଡୋଶୀ ଠାରୁ ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ପତ୍ନହନ୍ତା ସ୍ବାମୀକୁ ଗିରଫ କରି କୋର୍ଟ ଚାଲାଣ କରିଥିଲା । ଦୀର୍ଘ ୬ ବର୍ଷ ପରେ ଏହି ମାମଲାର ଶୁଣାଣି କରିଛନ୍ତି ଜିଲ୍ଲା ଦୌରାଜଜ । ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତି କରି ବିଚାରପତି ଦୀପ୍ତି ରଞ୍ଜନ କାନୁନଙ୍ଗୋ କାନ୍ଦ୍ରା ମାଝୀକୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡ ଏବଂ ୨୦ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି । ଜରିମାନା ଅନାଦେୟ ହେଲେ ଅତିରିକ୍ତ ୬ ମାସ ଜେଲଦଣ୍ଡ ଭୋଗିବାକୁ ପଡିବ । ସରକାରଙ୍କ ପକ୍ଷରୁ ଏହି ମାମଲାକୁ ପିପି ନିଦର୍ଶିନୀ ରଥ ପରିଚାଳନା କରିଥିଲେ ।
ଇଟିଭି ଭାରତ, କଳାହାଣ୍ଡି
