ସମ୍ୱଲପୁର: କ୍ଷତିପୂରଣ ଦାବିରେ ଲୋୟର ଶୁକତେଲ ନଦୀବନ୍ଧ ପ୍ରକଳ୍ପ ବିସ୍ଥାପିତ । ବଲାଙ୍ଗୀର ଜିଲ୍ଲାର ଲୋୟର ଶୁକତେଲ ନଦୀବନ୍ଧ ପ୍ରକଳ୍ପକୁ ଗତ ଜାନୁଆରୀ ମାସରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକାର୍ପିତ କରିଥିଲେ । ଏହି ପ୍ରକଳ୍ପରେ ମୋଟ 29ଟି ଗାଁର ଲୋକେ ବିସ୍ଥାପିତ ହୋଇଥିବା ସୂଚନା ରହିଛି । ତେବେ ବିସ୍ଥାପିତ ହେବା ପରେ ରାଜ୍ୟ ସରକାର ବିସ୍ଥାପିତ ପରିବାର ଗୁଡିକୁ ଆଇନ ଓ ସମ୍ବିଧାନ ହିସାବରେ ଉଚିତ ନ୍ୟାୟ ଦେଇ ନଥିବା ଅଭିଯୋଗ ଆଣିଛି ନ୍ୟାସନାଲ ଏଲାଇନ୍ସ ଫର ପିପୁଲସ ମୁଭମେଣ୍ଟ (NAPM) l
ବିସ୍ଥାପିତଙ୍କୁ ନ୍ୟାୟ ଦାବି:
ଏନେଇ ସୋମବାର ସମ୍ବଲପୁର ସହରର ଅରବିନ୍ଦ ସ୍କୁଲ ନିକଟରେ ଥିବା ସାମ୍ବାଦିକ ଭବନରେ NAPM ପକ୍ଷରୁ ଏକ ସାମ୍ବାଦିକ ସମ୍ମିଳନୀ କରାଯାଇ ସୂଚନା ଦେଇଛନ୍ତି NAPMର ଆବାହକ ପ୍ରଫୁଲ୍ଲ ସାମନ୍ତରାୟ ଓ ପଶ୍ଚିମ ଓଡିଶା କୃଷକ ସଂଗଠନ ସମନ୍ବୟ ସମିତିର ପ୍ରମୁଖ ସଦସ୍ୟ ଚାଷୀନେତା ଲିଙ୍ଗରାଜ l ପ୍ରଫୁଲ୍ଲ ସାମନ୍ତରାୟ କହିଛନ୍ତି," ଲୋୟର ଶୁକତେଲ ନଦୀବନ୍ଧ ଯୋଜନାରେ ବିସ୍ଥାପିତ ହୋଇଥିବା ଲୋକଙ୍କୁ ଆଇନ ଓ ସମ୍ବିଧାନ ହିସାବରେ ନ୍ୟାୟ ଦିଆଯାଇ ନାହିଁ l ଲୋକଙ୍କ ମାନବିକ ଅଧିକାର ଉଲ୍ଲଂଘନ କରି ଜୋର ଜବରଦସ୍ତ ବିସ୍ଥାପିତ କରାଯାଇଛି l ଏଥିପାଇଁ ନୂଆ ରାଜ୍ୟ ସରକାର ଯଥାଶୀଘ୍ର ଏହି ସମସ୍ୟାର ପ୍ରତିକାର କରିବା ସହ ଯେଉଁ ମାନେ ଏହି କାର୍ଯ୍ୟରେ ଲିପ୍ତ ଅଛନ୍ତି ସେମାନଙ୍କ ବିରୁଦ୍ଧରେ ସରକାର କାର୍ଯ୍ୟାନୁଷ୍ଠାନ ନିଅନ୍ତୁ।"
ସେ ଆଉ ମଧ୍ୟ କହିଛନ୍ତି, " ବିସ୍ଥାପିତମାନଙ୍କୁ 2013ର ଆଇନ ମୁତାବକ କ୍ଷତିପୂରଣ ଦେବା କଥା କିନ୍ତୁ ସମସ୍ତଙ୍କୁ 2013 ଅନୁସାରେ କ୍ଷତିପୂରଣ ଦିଆଯାଇନାହିଁ l ଏହାସହ ଜମିହରା ବିସ୍ଥାପିତମାନଙ୍କୁ ଯେଉଁ ଅସ୍ଥାୟୀ କଲୋନୀରେ ରଖାଯାଇଛି ସେଠାରେ ଥିବା ଘର ଟିଣରେ ତିଆରି ହୋଇଛି l ଏହିଭଳି ଘରେ ରହିବା ବହୁତ କଷ୍ଟକର l ଫରେଷ୍ଟ ଆକ୍ଟ ଲାଗୁ କରାଯାଇ ନାହିଁ ଓ ଜମି ବଦଳରେ ଜମି ଦିଆଯାଇନାହିଁ l"
ଅନ୍ୟପଟେ ଲୋଇସିଂହା ବ୍ଲକ ରେଙ୍ଗାଲି ଗ୍ରାମ ପଞ୍ଚାୟତର କମିହାପାଲି ଗାଁର ବିସ୍ଥାପିତ ପ୍ରେମରାଜ ବରିହା କହିଛନ୍ତି," ଆମର ଆଦିବାସୀ 50 ପରିବାର ଅଛୁ l 50ଟି ପରିବାରର ଅତି କମରେ 18ଟି ପଟ୍ଟା ( ପାରଚା ) ରହିଛି l 170 ଏକର ଜମି ରହିଛି l ଆମର ଜମି ସବୁ ଯିବ କିନ୍ତୁ ଆମେ ସରକାରଙ୍କୁ 2013 ଆକ୍ଟ ଅନୁସାରେ କ୍ଷତିପୂରଣ ଦାବି କରୁଛୁ । ସରକାର ଶୁଣୁନାହାନ୍ତି ଆଉ ସେଥିପାଇଁ ଆମର ସର୍ଭେ ହେଉନାହିଁ । ଆଉ ଆମେ କ୍ଷତିପୂରଣ ପାଉନାହୁଁ । ଆମର 20 ଏକର ଜମି ଅଛି ତେବେ ସେଥିମଧ୍ୟରୁ 4 ଏକର ଜମିର ଫସଲରେ ପାଣି ମାଡିଯାଉଛି । ସେହିପରି ଆମ ଗାଁର 50 ଜଣ ଚାଷୀଙ୍କ 20 ଏକର ଜମିର ଫସଲରେ ପାଣି ମାଡି ଯାଉଛି ।"
ଇଟିଭି ଭାରତ, ସମ୍ବଲପୁର
