ଭୁବନେଶ୍ବର: ନିର୍ବାଚନ ଆୟୋଗ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ସ୍ବତନ୍ତ୍ର ସଚିବ ଡିଏସ୍ କୁଟ୍ଟେଙ୍କୁ ନିଲମ୍ବନ ଏବଂ ବରିଷ୍ଠ ଆଇପିଏସ ଅଧିକାରୀ ଆଶିଷ ସିଂହଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ ପାଇଁ ନିର୍ଦ୍ଦେଶ ଦେବା ଘଟଣାରେ ପ୍ରତିକ୍ରିୟା ରଖିଛି ବିଜେପି । ଏହି କାର୍ଯ୍ୟାନୁଷ୍ଠାନକୁ ସ୍ବାଗତ କରି ବିଜେପି ମୁଖପାତ୍ର ପୀତାମ୍ବର ଆଚାର୍ଯ୍ୟ କହିଛନ୍ତି, ''ଆଜି ଗଣତନ୍ତ୍ରର ବିଜୟ ହୋଇଛି । ନିର୍ବାଚନ କମିଶନରଙ୍କ ଏହି ନିଷ୍ପତ୍ତି ଗଣତନ୍ତ୍ରକୁ ଆହୁରି ସୁଦୃଢ କରିଛି ।''
ବିଜେପି ଅଭିଯୋଗ କରିଛି ଯେ, ତାମିଲ ବାବୁଙ୍କ ଇସାରାରେ ଡିଏସ୍ କୁଟ୍ଟେ ଓ ଆଶିଷ ସିଂହ କାର୍ଯ୍ୟ କରୁଛନ୍ତି । ଏମାନେ ବିଜେଡି ଦଳର ଚମଚାଗିରି କରୁଥିଲେ । ୨୦୧୯ ନିର୍ବାଚନରେ ମଧ୍ୟ ଉଭୟ ବିଜେଡି ଲାଗି ଏମିତି କାର୍ଯ୍ୟ କରୁଥିଲେ । ରାଜ୍ୟରେ ହିଂସା ଭିଆଇଥିଲେ । ଆଶିଷ ସିଂ ପୂର୍ବରୁ ନେତାଙ୍କୁ ବନ୍ଧୁକ ମୁନରେ ଡରାଉଥିଲେ । ପୋଲିସ ଗାଡିରେ ଟଙ୍କା ବାଣ୍ଟିଥିଲେ । ସ୍ବାସ୍ଥ୍ୟ ଖରାପ କହି ଛୁଟିରେ ରହି ଭୋଟରଙ୍କୁ ଭୂତାଉଥିଲେ । ଏମାନେ ଭାରତୀୟ ପ୍ରଶାସନିକ ସେବା ନାମରେ କଳଙ୍କ । ଏହା ପୋଲିସକୁ ନିନ୍ଦିତ କରିଛି । ଏପରିକି ବିଜେପି ପ୍ରାର୍ଥୀଙ୍କୁ ଅକଥନୀୟ ଅତ୍ୟାଚାର କରିବା ସହ ପୋଲିସ ବିଭିନ୍ନ ଜାଗାରେ ଧମକ ଦେଇଥିବା ଦଳର ମୁଖପାତ୍ର ଅଭିଯୋଗ କିରଛନ୍ତି ।
ବିଜେପି ପୁଣିଥରେ ଅଭିଯୋଗ କରିଛି ଯେ, ନିର୍ବାଚନ ପ୍ରକ୍ରିୟା ମଧ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଗୃହବନ୍ଦୀ ଭାବେ ରଖାଯାଇଛି । ମୁଖ୍ୟମନ୍ତ୍ରୀ ବର୍ତ୍ତମାନ ରାଜ୍ୟ ଚଳାଇବାକୁ ଅସମର୍ଥ ଅଛନ୍ତି । ସେ ଓଡ଼ିଶାର କୌଣସି ନେତୃତ୍ୱକୁ ସ୍ବୀକାର କରିନାହାନ୍ତି । ହେଲେ ଜଣେ ବାହାର ଲୋକଙ୍କୁ ନିଜ ଉତ୍ତର ଅଧିକାରୀ ଭାବେ ପ୍ରଦର୍ଶନ କରିଛନ୍ତି ।
୫ ତାମିଲଙ୍କୁ ନେଇ 5T ଗଠିତ ହୋଇଛି । ଏମାନେ ମିଶି ଓଡ଼ିଶାକୁ ଖୋଳ କରିବାକୁ ଚେଷ୍ଟା କରିଛନ୍ତି ଏବଂ ବିଜେଡି ଦଳକୁ କବ୍ଜ କରିଛନ୍ତି । ଓଡ଼ିଶାବାସୀ ଏହାର ସଠିକ ଜବାବ ଦେବେ । ନିର୍ବାଚନ କମିଶନର ଉଭୟ ବରିଷ୍ଠ ଆଇପିଏସ ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରି ନିର୍ବାଚନକୁ ନିରପେକ୍ଷ କରିବା କାର୍ଯ୍ୟକୁ ନିର୍ବାହ କରିଛନ୍ତି ବୋଲି ବିଜେପି ପକ୍ଷରୁ କୁହାଯାଇଛି ।
ଇଟିଭି ଭାରତ, ଭୁବନେଶ୍ବର
