ନିଆଳି: ମାଟି ଓ କଚା ରାସ୍ତା ନବକଳେବର ହେବ ଏବଂ ପିଚୁ ଏବଂ କଂକ୍ରିଟ ରାସ୍ତା ନିର୍ମାଣ ହେବ । ଏଥିପାଇଁ ପୂର୍ବ ସରକାର ତଥା ବିଜେଡି ସରକାର ସମୟରେ ୧୬ କୋଟି ୬୬ ଲକ୍ଷ ଟଙ୍କା ମଞ୍ଜୁର ହେଲା । ରାସ୍ତା କାମ ଆରମ୍ଭ ହେଲା । ହେଲେ ଅଧା ବାଟରେ ରାସ୍ତା ନିର୍ମାଣ ବନ୍ଦ । ଯାହା ଫଳରେ କଟକ ଜିଲ୍ଲା ନିଆଳି ବ୍ଳକର ଜଲ୍ଲାରପୁର ଠାରୁ ପହଙ୍ଗା ରାସ୍ତା ଏବେ ମରଣଯନ୍ତା ପାଲଟିଛି । ଜଲ୍ଲାରପୁରଠାରୁ ପହଙ୍ଗା ରାସ୍ତା ନିର୍ମାଣରେ ଅହେତୁକ ବିଳମ୍ବକୁ ନେଇ କ୍ଷୋଭ ପ୍ରକାଶ କରିଛନ୍ତି ସ୍ଥାନୀୟ ଲୋକ ।
ଅଭିଯୋଗ ଅନୁସାରେ କଟକ ଜିଲ୍ଲା ନିଆଳି ବ୍ଲକ ଜଲ୍ଲାରପୁର ଠାରୁ ପହଙ୍ଗା ରାସ୍ତା ନିର୍ମାଣ ପାଇଁ ବିଜେଡି ସରକାର ଅମଳରେ ୧୬ କୋଟି ୬୬ ଲକ୍ଷ ଟଙ୍କା ମଞ୍ଜୁର ହୋଇଥିବା ନେଇ ସୂଚନା ଫଳକରୁ ସୂଚନା ମିଳିଛି । ମାଟି ଓ କଚା ରାସ୍ତାକୁ ପିଚୁ ଏବଂ କଂକ୍ରିଟ ଢଳେଇ ହେବ । ନିଆଳି ବ୍ଲକ ସମେତ ଚାରିଗୋଟି ଜିଲ୍ଲାର ଲୋକଙ୍କ ଗମନାଗମନ ସୁଗମ ହେବ । କଟକ, ଜଗତସିଂହପୁର, ପୁରୀ ଓ ଖୋର୍ଦ୍ଧା ଜିଲ୍ଲାକୁ ଯାତାୟତରେ ସୁବିଧା ହେବ । ଏଥିପାଇଁ ଆର୍ ଆଣ୍ତ ବିଭାଗ (Road and Buildings Department) ଗତ କିଛି ମାସ ତଳେ ଜଲ୍ଲାରପୁର ଠାରୁ ପହଙ୍ଗା ରାସ୍ତା ନିର୍ମାଣ ଆରମ୍ଭ କରି ଅଧା ବାଟରେ ଛାଡି ଦେଇଛି । ଫଳରେ ରାସ୍ତା ଉପରେ ନିର୍ଭରଶୀଳ ସାଧାରଣ ଜନତା, ରୋଗୀ, ସ୍କୁଲ ଓ କଲେଜ ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ବ୍ୟବସାୟୀ ଓ ଦୁଇ ଚକିଆ ଯାନ ଠାରୁ ଛ' ଚକିଆ ଯାନ ଯାତୟାତରେ ବ୍ୟାଘାତ ସୃଷ୍ଟି ହେଉଛି ବୋଲି ଅଭିଯୋଗ କରିଛନ୍ତି ସ୍ଥାନୀୟ ଲୋକେ । ଅସରାଏ ବର୍ଷାରେ କାଦୁଅ ପଚ ପଚକୁ ରାସ୍ତା ମଝିରେ ଗାତ ସୃଷ୍ଟି ହୋଇଛି । ଯାହାଫଳରେ ଯାତାୟାତରେ ଅସୁବିଧା ହେବା ସହିତ ଦୁର୍ଘଟଣା ବଢ଼ୁଛି ବୋଲି କହିଛନ୍ତି ସ୍ଥାନୀୟ ବାସିନ୍ଦା ।
ଜଲ୍ଲାରପୁର ଓ ପହଙ୍ଗା ରାସ୍ତା ଦେଇ ଚାରି ଜିଲ୍ଲାକୁ ବହୁ ଗାଡିମଟର ଚଳାଚଳ ହେବା ସହିତ ପ୍ରତ୍ୟେକ ଦିନ ଲକ୍ଷାଧିକ ଲୋକ ଏହି ରାସ୍ତାରେ ଯାତାୟତ ପାଇଁ ନିର୍ଭର କରିଥାନ୍ତି । ଦାୟିତ୍ବରେ ଥିବା ଯନ୍ତ୍ରୀ ଏବଂ ଅଧିକାରୀଙ୍କ ମନମୁଖୀ କାର୍ଯ୍ୟ ଯୋଗୁଁ ଜଲ୍ଲାରପୁର ଓ ପହଙ୍ଗା ରାସ୍ତା ନିର୍ମାଣ ହେଉନଥିବା ଅଭିଯୋଗ କରି ଅସନ୍ତୋଷ ପ୍ରକାଶ କରିଛନ୍ତି ଜଲ୍ଲାରପୁର ପଞ୍ଚାୟତ ସରପଞ୍ଚ ମଞ୍ଜୁଲତା ପଣ୍ତା । ସେ କହିଛନ୍ତି, "ମୋ ଘର ସମ୍ମୁଖରେ କାଦୁଅ ଓ ପଙ୍କ । ରାସ୍ତା ଏପରି ଅବସ୍ଥା ହୋଇଛି ଯେ ଯାତାୟତ କରିବା ସମ୍ଭବପର ନୁହେଁ । ଗାଡି ଅନୁପାତରେ ଜଲ୍ଲାରପୁର ଠାରୁ ପହଙ୍ଗା ରାସ୍ତାକୁ ସମ୍ପୂର୍ଣ୍ଣ କଂକ୍ରିଟ ଢଳେଇ କରାଗଲେ ରାସ୍ତା ଅବସ୍ଥା ସୁଧିରିବ ।" ନଚେତ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେବେ ବୋଲି କହିଛନ୍ତି ସ୍ଥାନୀୟ ସରପଞ୍ଚ । ଏ ସମ୍ପର୍କରେ ଆର୍ ଆଣ୍ଡ ବି ବିଭାଗର ଅଧିକାରୀଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।
ଇଟିଭି ଭାରତ, ନିଆଳି
