ମାଲକାନଗିରି: ଗାଁ ଗୋଟିଏ କିନ୍ତୁ ଜିଲ୍ଲା ଦୁଇଟି । କଥାଟି ଶୁଣିବାକୁ ଟିକିଏ ଆଶ୍ଚର୍ଯ୍ୟ ଲାଗିଥିଲେ ବି ସତ । ଏଭଳି ଏକ ଗାଁ ହେଉଛି କୁଲାବେଡ଼ା ଗାଁ । ଏହି ଗାଁ ଉଭୟ ମାଲକାନଗିରି ଓ କୋରାପୁଟ ଜିଲ୍ଲାରେ ରହିଛି । ଗ୍ରାମରେ ପାଖାପାଖି ଶହେ ପରିବାର ବସବାସ କରନ୍ତି । ତେବେ ୬୦ ପରିବାର ମାଲକାନଗିରି ଜିଲ୍ଲାର ମାଥିଲି ବ୍ଲକ ଅନ୍ତର୍ଗତ କୁଟନିପାଲି ଗ୍ରାମପଞ୍ଚାୟତ ଅଧିନରେ ରହିଥିବା ବେଳେ ଅନ୍ୟ ୪୦ ପରିବାର କୋରାପୁଟ ଜିଲ୍ଲା ବୈପାରିଗୁଡ଼ା ବ୍ଲକର ଦଣ୍ଡାବାଡ଼ି ଗ୍ରାମପଞ୍ଚାୟତରେ ସାମିଲ ରହିଛନ୍ତି । ଏପରିକି ଗାଁ ମଝିରେ ଦୁଇଟି ଜିଲ୍ଲାର ବୋର୍ଡ ଲାଗିଛି । ଗାଁ ମଝିରେ ଲାଗି ଲାଗି ରହିଛି ଦୁଇଟି ଜିଲ୍ଲାର ଅଙ୍ଗନବାଡ଼ି କେନ୍ଦ୍ର । ଆବାସ ଯୋଜନା ଘର ମଧ୍ୟ ଠିକ୍ ସେହିପରି । କିଛି କୋରାପୁଟ ଜିଲ୍ଲାରେ ଏବଂ କିଛି ମାଲକାନଗିରି ଜିଲ୍ଲାରେ ରହିଛି । ଗ୍ରାମପଞ୍ଚାୟତ, ବ୍ଲକ କାର୍ଯ୍ୟାଳୟ, ଏବଂ ଜିଲ୍ଲା ମୁଖ୍ୟାଳୟ ସବୁ ଦୁଇଟି ।
କୋରାପୁଟ ଜିଲ୍ଲା ଅପେକ୍ଷା ମାଲକାନଗିରି ଜିଲ୍ଲା ଅଧିନରେ ରହିଥିବା ଲୋକଙ୍କୁ ଅଧିକ ସୁବିଧା ମିଳୁଥିବା କହିଛନ୍ତିି ଗ୍ରାମବାସୀ । କାରଣ ମାଲକାନଗିରିବାସୀଙ୍କ ପାଇଁ ଗ୍ରାମପଞ୍ଚାୟତ, ବ୍ଲକ କାର୍ଯ୍ୟାଳୟ ଏବଂ ଜିଲ୍ଲା ମୁଖ୍ୟାଳୟ ପାଖରେ ଥିବାବେଳେ କୋରାପୁଟବାସୀଙ୍କ ପାଇଁ ଗ୍ରାମ ପଞ୍ଚାୟତ, ବ୍ଲକ କାର୍ଯ୍ୟାଳୟ ଏବଂ ଜିଲ୍ଲାର ଦୂରତା ଅଧିକ ରହିଛି । କୋରାପୁଟ ଜିଲ୍ଲା ମୁଖ୍ୟାଳୟକୁ ଜରୁରୀ କାର୍ଯ୍ୟ ପାଇଁ ଯିବାକୁ ହେଲେ ଅଧିକ ସମୟ ଲାଗୁଥିବା ବେଳେ ମାଲକାନଗିରିବାସୀଙ୍କ ପାଇଁ ତାହା ସହଜ ହୋଇଥାଏ ।
ଏହାମଧ୍ୟ ପଢନ୍ତୁ..ପୁଣି କୋଟିଆରେ ଆନ୍ଧ୍ରର ଜବରଦଖଲ, ଲାଗିଲା ଜଗନଙ୍କ ଦଳୀୟ ପତାକା
ଗ୍ରାମବାସୀଙ୍କ କହିବାନୁଯାୟୀ,"ସାର୍ଟିଫିକେଟ କିମ୍ବା ଅନ୍ୟ କୌଣସି ପ୍ରମାଣ ପତ୍ର ବାହାର କରିବା ପାଇଁ ହେଲେ ସମସ୍ୟାର ସମ୍ମୁଖୀନ ହେବାକୁ ପଡିଥାଏ । ଆଉ ମଧ୍ୟ ଧାନ ବିକ୍ରି ପାଇଁ ମଣ୍ଡି କାର୍ଡ କରିବାକୁ ଗଲେ ମଧ୍ୟ ହଇରାଣ ହେବାକୁ ପଡେ । କାରଣ ଜମି ପଟ୍ଟା ସବୁ ମାଲକାନଗିରି ଜିଲ୍ଲାରେ ଥିବା ବେଳେ ଭୋଟର ଆଇଡି କାର୍ଡ ତଥା ଆଧାର କାର୍ଡ ସବୁ କୋରାପୁଟ ଜିଲ୍ଲାରେ ରହିଛି ।" ତେବେ ଏହି ଜିଲ୍ଲା ବିବାଦର ସମାଧାନ ପାଇଁ ଉଭୟ କୋରାପୁଟ ଓ ମାଲକାନଗିରି ଜିଲ୍ଲା ପ୍ରଶାସନର ଦ୍ୱାରସ୍ଥ ହୋଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନଥିବା ଅଭିଯୋଗ କରିଛନ୍ତି ଗ୍ରାମବାସୀ ।
ଅନ୍ୟପଟେ ମାଲାକାନଗିରି ଅତିରିକ୍ତ ଜିଲ୍ଲାପାଳ ବେଦବର ପ୍ରଧାନ କହିଛନ୍ତି, "ଜିଲ୍ଲା ସୀମାରେ ରହିଥିବାରୁ ଏଭଳି ସମସ୍ୟା ଦେଖାଯାଇପାରେ । ଏନେଇ ତଦନ୍ତ କରାଯାଇ ଉଚିତ ପଦକ୍ଷେପ ଗ୍ରହଣ କରାଯିବ ।
ସୂଚନା ଯୋଗ୍ୟ ୧୯୯୨ ମସିହା କୋରାପୁଟ ଜିଲ୍ଲା ବିଭକ୍ତ ହୋଇ ମାଲକାନଗିରି ଜିଲ୍ଲା ହେବା ପର ଠାରୁ ଏହି ସମସ୍ୟା ଦେଖାଯାଇଛି । ୧୯୯୨ ମସିହା କୋରାପୁଟ ଜିଲ୍ଲା ବିଭକ୍ତ ହୋଇ କୋରାପୁଟ ଓ ମାଲକାନଗିରି ଜିଲ୍ଲା ସୃଷ୍ଟି ହୋଇଥିଲା । ହେଲେ କୁଲାବେଡ଼ା ଗାଁ କେଉଁ ଜିଲ୍ଲାରେ ରହିବ ତାହା ବିଭାଜନ ହୋଇପାରିନଥିଲା । ଯେଉଁଥିପାଇଁ 2 ଜିଲ୍ଲାରେ ରହିଛି ଏହି କୁଲାବେଡ଼ା ଗାଁ ।
ଇଟିଭି ଭାରତ, ମାଲକାନଗିରି
