କୋରାପୁଟ: ମଣ୍ଡଳ କାରାଗାର ଭିତରେ ଜଣେ ମହିଳା କଏଦୀ ଅନ୍ୟ ସହ ନାଗିନୀ ଡ୍ୟାନ୍ସ ନାଚିବାର ଭିଡିଓ ସାମାଜିକ ଗଣମାଧ୍ୟମରେ ଘୁରି ବୁଲିବା ଘଟଣା କୋରାପୁଟରେ ଚାଞ୍ଚଲ୍ୟ ସୃଷ୍ଟି କରିଥିଲା । ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହୋଇ ମୋବାଇଲରୁ ମୋବାଇଲକୁ ଘୁରି ବୁଲୁଥିଲା । ଏପରିକି ସାମାଜିକ ଗଣମାଧ୍ୟମ ଏକ୍ସରେ ମଧ୍ୟ ଭାଇରାଲ ହୋଇଥିଲା । ପରେ ପ୍ରଶ୍ନ ଉଠାଇଥିଲେ ଅନେକ ବୁଦ୍ଧିଜୀବୀ । ଭାଇରାଲ ଭିଡିଓକୁ ନେଇ ଅକଳରେ ପଡିଥିଲା ରାଜ୍ୟ ଜେଲ୍ ବିଭାଗ । ତେବେ ଆଜି ସଫେଇ ରଖିଛନ୍ତି ଜେଲ ପରିଚାଳକ ।
କୋରାପୁଟ ମଣ୍ଡଳ କାରାଗାରର ଅଧିକ୍ଷକ ମନୋରଞ୍ଜନ ପ୍ରତିହାରୀ ସାମ୍ବାଦିକ ସମ୍ମିଳନୀ କରି ଏହାର ସ୍ପଷ୍ଟୀକରଣ ଦେଇଛନ୍ତି । ସେ ସୂଚନା ଦେଇଛନ୍ତି ଯେ ଜେଲରେ ଅନେକ ସମୟରେ କଏଦୀ ମାନଙ୍କର ମାନସିକ ସ୍ତରରେ ପରିବର୍ତ୍ତନ ଆଣିବା ପାଇଁ ଅନେକ ପ୍ରକାର ସାଂସ୍କୃତିକ କାର୍ଯ୍ୟକ୍ରମ କରାଯାଇଥାଏ । ସମ୍ପୃକ୍ତ ଭିଡିଓ ଭାଇରାଲ ପ୍ରସଙ୍ଗରେ ସେ କହିଛନ୍ତି ଯେ, ଏହି ଭିଡିଓଟି ହୋଲିରେ ଜେଲର ଚାରିକାନ୍ଥ ଭିତରେ କାର୍ଯ୍ୟକ୍ରମ କରାଯାଇଥିଲା । ଯାହାର ଭିଡିଓ ମଧ୍ୟ ରେକର୍ଡ କରାଯାଇଛି କିନ୍ତୁ କେଉଁ ପରିପେକ୍ଷୀରେ ତାହା ସାମାଜିକ ଗଣମାଧ୍ୟମକୁ କାହା ଦ୍ୱାରା ଗଲା ତାହାର ତଦନ୍ତ ଜାରି ରହିଛି ।
ଜେଲ ଭିତରେ ମୋବାଇଲ ନେବାକୁ ନେଇ କଡା ନିର୍ଦ୍ଦେଶ ରହିଛି । କିନ୍ତୁ ହୋଲି ଉତ୍ସବ ସମୟରେ କଏଦୀମାନେ ଅଭ୍ୟାସ କରୁଥିବା ସମୟରେ ଜେଲ କର୍ତ୍ତୃପକ୍ଷ ତାର ରେକର୍ଡ ରଖିବା ଉଦ୍ଦେଶ୍ୟରେ ଭିଡିଓ ଉତ୍ତୋଳନ କରିଥିବା ଭିଡିଓ କିପରି ସାମାଜିକ ଗଣମାଧ୍ୟମକୁ ଗଲା ତାର ତଦନ୍ତ କରାଯାଉଛି । କିଛି ନ୍ୟସ୍ତ ସ୍ୱାର୍ଥ ବ୍ୟକ୍ତି ବିଶେଷ ମଣ୍ଡଳ କାରାଗାରକୁ ବଦନାମ କରିବା ପାଇଁ ବ୍ୟକ୍ତିଗତ ସ୍ୱାର୍ଥ ରଖି ଏପରି କରିଥିବା ସନ୍ଦେହ କରାଯାଉଛି ।
ଅନ୍ୟପଟେ ଏକ ମହିଳା ବିଚାରାଧିନ କଏଦୀ ଜେଲ ହାଜତରେ ଥାଇ ଗର୍ଭବତୀ ହୋଇଥିବା ଘଟଣା ସମ୍ପର୍କରେ କାରାଗାର ଅଧିକ୍ଷକ ମଧ୍ୟ ସ୍ପଷ୍ଟୀକରଣ ରଖିଛନ୍ତି । ମନୋରଞ୍ଜନ ପ୍ରତିହାରୀ କହିଛନ୍ତି ଯେ, ସମ୍ପୃକ୍ତ ଘଟଣାଟି ଏକ ମିଥ୍ୟା ଓ କପୋଳକଳ୍ପିତ । ମହିଳା କଏଦୀ ଜଣକ ଜେଲ ହାଜତକୁ ଆସିବା ପୂର୍ବରୁ ସେ ଗର୍ଭବତୀ ଥିଲେ । ସେ ସାଢେ ୫ ମାସ ହେଲା କାରାଗାରକୁ ଆସିଥିବା ବେଳେ ବର୍ତ୍ତମାନ ସାଢେ ୮ ମାସର ଗର୍ଭବତୀ ଅଛନ୍ତି । ଗର୍ଭବତୀ ବୋଲି ଜାଣିବା ପରେ ତାଙ୍କର ଟେଷ୍ଟ କରାଯାଇଥିଲା । ତାଙ୍କର ସମସ୍ତ ଚିକିତ୍ସା ଜେଲ ତରଫରୁ କରାଯାଇଛି । ପ୍ରସବ ପାଇଁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଛି ଏବଂ ତାଙ୍କର ସ୍ୱାସ୍ଥ୍ୟ ଅବସ୍ଥା ଭଲ ରହିଛି ।
ଇଟିଭି ଭାରତ, କୋରାପୁଟ
