କେନ୍ଦ୍ରାପଡା: କଥାରେ ଅଛି 'ଯାହାକୁ ରଖିବ ଅନନ୍ତ କେ କରି ପାରେ ବଳବନ୍ତ ' । ଯାହା ପ୍ରମାଣିତ ହୋଇଛି କେନ୍ଦ୍ରାପଡା ଜିଲ୍ଲାର ଜଣେ ଦିବ୍ୟାଙ୍ଗ ଯୁବକଙ୍କ କ୍ଷେତ୍ରରେ । ନଦୀକୁ ଗାଧୋଇବାକୁ ଯାଇଥିବା ବେଳେ ଗୋଟିଏ ଗୋଡକୁ ଟାଣି ନେଇ ନଦୀ ମଝିକୁ ନେଇଯାଇଥିଲା କୁମ୍ଭୀର । ଜୀବିତ ଅବସ୍ଥାରେ ଆଉ ଫେରିବେ ବୋଲି ସେ କେବେ ବି ଭାବି ନଥିଲେ । କିନ୍ତୁ ଶେଷରେ ପ୍ରାଣପଣେ ଉଦ୍ୟମ କରି ମଣିଷ ଖିଆ କୁମ୍ଭୀର ମୁହଁରୁ ଅଳ୍ପକେ ବର୍ତ୍ତି ଯାଇଛନ୍ତି କେନ୍ଦ୍ରାପଡା ପେଟଛେଲା ପଞ୍ଚାୟତ ଶବରପଡା (ଜଙ୍ଗଳଘେରି) ଗାଁର ଦିପୁ ଆହାଡ଼ି ।
କଣ ଥିଲା ସମ୍ପୂର୍ଣ୍ଣ ଘଟଣା ?
ଗୁରୁବାର(ନଭେମ୍ବର ୭) ଅପରାହ୍ନରେ ଦିପୁ ଗାଧୋଇବା ପାଇଁ ଗାଁ ଦେଇ ପ୍ରବାହିତ ହେଉଥିବା ଗୋବରୀ ନଦୀର ଶାଖା ନଦୀ ପେଟଛେଲା ନଦୀକୁ ଯାଇଥିଲେ । ଗାଧୋଇବା ବେଳେ ହଠାତ ଏକ କୁମ୍ଭୀର ତାଙ୍କ ବାମ ଗୋଡ଼କୁ ଟାଣି ନେଇ ନଦୀ ମଧ୍ୟକୁ ଚାଲିଯାଇଥିଲା । ଜୀବନ ବଞ୍ଜାଇବା ପାଇଁ ଦିପୁ ଡାହାଣ ଗୋଡ଼ ଓ ହାତକୁ ପାଣିରେ ପାରୁ ପର୍ଯ୍ୟନ୍ତ ବାଡେଇଥିଲେ।ଏହାପରେ କୁମ୍ଭୀର ପାଟିରୁ ଯୁବକଙ୍କ ଗୋଡଟି ଖସି ଆସିଥିବାରୁ ସେ ଅଳ୍ପକେ ବର୍ତ୍ତି ଯାଇଥିଲେ । ନଦୀ କୂଳକୁ ଆସି ଗାଁ ଲୋକଙ୍କୁ ଡାକ ପକାଇଥିଲେ । ଗାଁ ଲୋକେ ଘଟଣାସ୍ଥଳରେ ପହଞ୍ଚିବା ପରେ ପୂରା ଘଟଣା ସମ୍ପର୍କରେ କହିବା ପରେ ତାଙ୍କ ପରିବାର ଲୋକଙ୍କୁ ଫୋନର ଯୋଗାଯୋଗ କରିଥିଲେ । ତାଙ୍କ ସ୍ତ୍ରୀ ଆସି ପହଞ୍ଚିବା ପରେ ଗାଁ ଲୋକେ ଦିପୁଙ୍କୁ ମହାକାଳପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ।
ଜନ୍ମରୁ ଦିବ୍ୟାଙ୍ଗ :
କୁମ୍ଭୀର ଆକ୍ରମଣରେ ଆହତ ହୋଇଥିବା ଦିପୁ ଜନ୍ମରୁ ଦିବ୍ୟାଙ୍ଗ । ୨୦୧୧ ମସିହାରେ ଜିଲ୍ଲା ମେଡିକାଲ କର୍ତ୍ତୃପକ୍ଷ ତାଙ୍କର ସମସ୍ତ ମେଡିକାଲ ଟେଷ୍ଟ କରି ତାଙ୍କର ବାମ ଗୋଡ଼ ଓ ହାତ ଅଚଳ ବୋଲି ସାର୍ଟିଫିକେଟ ପ୍ରଦାନ କରିଥିବା କହିଛନ୍ତି ଦିପୁ । ସାର୍ଟିଫିକେଟ ଥାଇ ସୁଦ୍ଧା ମାତ୍ର ୪୫% ଭିନ୍ନକ୍ଷମ ଲେଖା ଥିବାରୁ ଦିପୁଙ୍କୁ ନା ମିଳୁଛି ଘର ନା ମିଳିଛି ଟ୍ରାଇ ସାଇକେଲ, ଯେଉଁଥିପାଇଁ ସେ ଅସନ୍ତୋଷ ବ୍ୟକ୍ତ କରିଛନ୍ତି ।
କୁମ୍ଭୀର ଆକ୍ରମଣରେ ମହିଳା ମୃତ:
ଗତ ଅଗଷ୍ଟ ମାସ 13 ତାରିଖରେ କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ଡାଇ ଅନ୍ତର୍ଗତ ଅଳପୁଆଡିଆ ଗାଁରେ କୁମ୍ଭୀର ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ହୋଇଥିଲା । ନଈକୁ ବାସନ ମାଜିବାକୁ ଯାଇଥିବାବେଳେ ମହିଳାଙ୍କୁ ଟାଣିନେଲା କୁମ୍ଭୀର । ମୃତ ମହିଳା ହେଲେ ମୁଞ୍ଜୁଲତା ଭଞ୍ଜ ।
ଇଟିଭି ଭାରତ, କେନ୍ଦ୍ରାପଡା
