ଭୁବନେଶ୍ୱର: ନିଜକୁ ସୁସ୍ଥ, ସୁନ୍ଦର ରଖିବାକୁ ସମସ୍ତେ ଚେଷ୍ଟା କରନ୍ତି । କିଏ ଯୋଗ କରନ୍ତି ତ ଆଉ କିଏ ଜିମ୍ ଯାଆନ୍ତି । ଯୋଗ କାହିଁ କେଉଁ ପୁରାତନ କାଳରୁ ଲୋକଙ୍କୁ ସୁସ୍ଥ ରଖିବାରେ ଏକ ବଡ଼ ଭୂମିକା ତୁଲାଇ ଆସିଛି । ଯୋଗ ଅଭ୍ୟାସ ଶରୀର ଓ ମନ ମଧ୍ୟରେ ସନ୍ତୁଳନ ସ୍ଥାପନ କରିଥାଏ । ଯୋଗ କେବଳ ଏକ ବ୍ୟାୟାମ ନୁହଁ, ନିଜ ସହିତ ବିଶ୍ବ ଓ ପ୍ରକୃତିକୁ ଏକତ୍ର କରିବାର ଏକ ଭାବ । ଯୁବ ସମୟରୁ ବୃଦ୍ଧ ଯାଏ ଅନେକ ଯୋଗକୁ ସୁଖୀ ଜୀବନର ମନ୍ତ୍ର ଭାବେ ମାନିଥାନ୍ତି । ଏବେ ଯୋଗପ୍ରତି ଲୋକଙ୍କ ଆଗ୍ରହ ବଢ଼ୁଛି । ଅନ୍ତର୍ଜାତୀୟ ଯୋଗ ଦିବସ ଅବସରରେ ସକାଳୁ ରାଜଧାନୀର ବିଭିନ୍ନ ଯୋଗକେନ୍ଦ୍ର ଓ ପାର୍କରେ ଯୋଗ ପାଇଁ ଭିଡ଼ ବଢୁଛି । ସହରରେ ଦୀର୍ଘ ବର୍ଷ ଧରି କେତେକ ଯୋଗକେନ୍ଦ୍ର ଲୋକମାନଙ୍କୁ ଯୋଗ ଶିକ୍ଷା ଦିଆଯାଉଛି ।
କେଉଁ ବୟସରେ ଯୋଗ କରିବା ଆବଶ୍ୟକ: ଯୋଗ କରିବା ପାଇଁ କୌଣସି ବୟସର ଆବଶ୍ୟକତା ନାହିଁ । ଯେଉଁ ବୟସରେ ମଧ୍ୟ ଯୋଗ କରିପାରିବେ । ଛୋଟ ପିଲାଠାରୁ ଆରମ୍ଭ କରି ବୟସ୍କ ଲୋକମାନେ ଯୋଗ କରିପାରିବେ । କିନ୍ତୁ ଯୋଗ କରିବା ପୂର୍ବରୁ ଅନେକ ଜିନିଷ ଦେଖିବାକୁ ପଡ଼ିଥାଏ । ଜଣେ ଲୋକର ସ୍ୱାସ୍ଥ୍ୟ ଅବସ୍ଥା କିପରି ରହିଛି, ଜଟିଳ ରୋଗ ରହିଛି କି ନାହିଁ । ଏପରିକି ଉଚ୍ଚ ରକ୍ତଚାପ, ହୃଦରୋଗ, ଶ୍ବାସ ରୋଗ ଭଳି ଅନେକ ରୋଗ ରହିଥିଲେ ସେମାନଙ୍କ ପାଇଁ ଭିନ୍ନ ଭିନ୍ନ ଯୋଗ ରହିଛି । ସେମାନେ ସମସ୍ତ ଯୋଗର ଅଭ୍ୟାସ କରିପାରିବେ ନାହିଁ । ଅନେକ ଲୋକମାନେ ୟୁଟ୍ୟୁବ ଯୋଗ କରିଥାନ୍ତି କିନ୍ତୁ ଏହା ଦ୍ଵାରା ଅନେକ ମାତ୍ରାରେ ଶରୀରରେ କ୍ଷତି ଘଟିଥାଏ । ଶରୀରରେ ଯନ୍ତ୍ରଣା ହୋଇଥାଏ । ଯାହା ଫଳରେ କୌଣସି କିଛି କାର୍ଯ୍ୟ କରିବାରେ ବିଫଳ ହେବାକୁ ପଡ଼ିଥାଏ ।
ଯୋଗ ଶିକ୍ଷା ଦେଉଛନ୍ତି ସୌମ୍ୟା ଦାଶ: ରାଜଧାନୀର ଜଣେ ଜଣାଶୁଣା ଯୋଗ ଗୁରୁ ହେଉଛନ୍ତି ସୌମ୍ୟା ଦାଶ । ଭୁବନେଶ୍ୱରର ନିୟୁ ଫରେଷ୍ଟ ପାର୍କ ନିକଟରେ ସୌମ୍ୟାଙ୍କ ନିଜର ଏକ ଯୋଗ ସେଣ୍ଟର ରହିଛି । ଯେଉଁଠାରେ ଶହ ଶହ ଛୋଟ ପିଲାଙ୍କଠାରୁ ଆରମ୍ଭ କରି ବୟସ୍କ ଲୋକମାନେ ଏହି କେନ୍ଦ୍ରରେ ସାମିଲ ହୋଇଥାନ୍ତି । ତେବେ ବିଶେଷ ଭାବରେ ଏହି ଯୋଗ କେନ୍ଦ୍ରରେ ଆସନ, ପ୍ରାଣାୟମ, ଧ୍ୟାନ, ମୁଦ୍ରା, ଧାରଣା, ବନ୍ଧ, ଯୋଗନିଦ୍ରା ପ୍ରମୁଖ ସିଖାଯାଇଥାଏ ।
ଏହା ମଧ୍ୟ ପଢନ୍ତୁ-ଯୋଗାଭ୍ୟାସ ମନ ଓ ଶରୀରକୁ ସୁସ୍ଥ ରଖେ - Yogotsav
ଯୋଗରୁ ଲାଭ କ’ଣ ମିଳିବ ? : ଯୋଗ ମାଧ୍ୟମରେ ଲୋକଙ୍କ ଜୀବନ ଶୈଳୀ ପରିବର୍ତ୍ତନ ହୋଇଥାଏ । ମାନସିକ ଚାପରୁ ମୁକ୍ତି ମିଳିଥାଏ । ଦେଖାଯାଏ ଅନେକ ଲୋକମାନେ ମାନସିକ ଚିନ୍ତାଗ୍ରସ୍ତ ମଧ୍ୟରେ ରହିଥାନ୍ତି । ଯୋଗ ମାଧ୍ୟମରେ ଧୀରେ ଧୀରେ ସେଗୁଡିକ ଦୂର ହୋଇଥାଏ ଏବଂ ଏକ ପ୍ରକାରର ଏକାଗ୍ରତା ବଢ଼ିଥାଏ । ଯୋଗ କଲେ ମାନସିକ ଓ ଶାରିରୀକ ଭାବରେ ଶାନ୍ତି ମିଳିଥାଏ ।
ଇଟିଭି ଭାରତ, ଭୁବନେଶ୍ୱର
