ଭୁବନେଶ୍ବର: ପରିଣତ ବୟସରେ ଚାରି ଧାମ ତୀର୍ଥଯାତ୍ରାରେ ଯିବା ପାଇଁ ଅନେକ ବୃଦ୍ଧ ବୃଦ୍ଧାଙ୍କର ସ୍ବପ୍ନ ଥାଏ । ଏନେଇ ଏକାଧିକ ଟୁର-ଟ୍ରାଭେଲ ଏଜେନ୍ସି ନିଜ ବ୍ୟବସାୟ ଜାରି ରଖିଛନ୍ତି । ମାତ୍ର ଏହି ଆଳରେ ବୟସ୍କଙ୍କୁ ଠକୁଥିବା ଜଣେ ଠକକୁ ଅପରେଟରକୁ ଗିରଫ କରିଛି କମିଶନରେଟ ପୋଲିସ । ତୀର୍ଥଯାତ୍ରା ଆଳରେ ସେ ଏକାଧିକ ବୟସ୍କଙ୍କୁ ଠକିଥିବା ପୋଲିସ ପ୍ରାଥମିକ ତଦନ୍ତରେ ଜାଣିବାକୁ ପାଇଛି ।
- ଖୋଲିଥିଲା ମିଛ ଓ୍ବେବ-ସାଇଟ୍
ଏନେଇ ‘ସାଇ ପାରାଡାଇଜି ଓ୍ବାର୍ଲଡ ଟୁର ଆଣ୍ଡ ଟ୍ରାଭେଲସ’ ନାମକ ଏକ ସଂସ୍ଥାର ମାଲିକ ସଂହାରି ବେହେରାକୁ ଗିରଫ କରିଛି କମିଶନରେଟ୍ ପୋଲିସ । ଲିଙ୍ଗରାଜ ଥାନାରେ ଅଭିଯୁକ୍ତ ବିରୋଧରେ ୧୭୯/୨୪ ରେ ଏକ ମାମଲା ରୁଜୁ ହୋଇଛି । ଗିରଫ ଅଭିଯୁକ୍ତ ଠାରୁ ଦୁଇଟି ମୋବାଇଲ ଜବତ କରାଯାଇଛି । ଯେଉଁଥିରେ ସେ ନିଜର ଓ୍ବେବସାଇଟ ଖୋଲି ମିଛ ବୁକିଂ କରୁଥିଲା । ତାର ଘର ବୈଦେଶ୍ବର ଥାନା ଅଞ୍ଚଳରେ ସେ ଭୁବନେଶ୍ୱର ପାଣ୍ଡବ ନଗରରେ ରହି ଏଭଳି ଠକେଇ କରୁଥିବା ପ୍ରାଥମିକ ତଦନ୍ତରେ ଜଣାପଡିଛି ।
- ବୃଦ୍ଧଙ୍କଠାରୁ ଚମ୍ପଟ ମାରିଥିଲା 30 ହଜାର
ଏନେଇ ଜୋନ ୩ ଏସିପି କୃଷ୍ଣଚନ୍ଦ୍ର ପଲେଇ କହିଛନ୍ତି, ‘‘ସାଇ ପାରାଡାଇଜ ଓ୍ବାର୍ଲଡ ଟୁର ଆଣ୍ଡ ଟ୍ରାଭେଲସ’ ସଂସ୍ଥା ନାମରେ ଏକ ଓ୍ବେବ-ସାଇଟ ଖୋଲି ଏଭଳି ସଂହାରି ବେହେରା ଚାରି ଧାମ ବୁଲାଇ ନେବାର ଟିକେଟ ବୁକି କରୁଥିବା ଅଫର୍ ଦେଉଥିଲା । ଯାହାକୁ ନେଇ ଗତ ମାର୍ଚ୍ଚ ମାସରେ ରଞ୍ଜିତ ମହାନ୍ତି ନାମକ ୬୭ ବର୍ଷୀୟ ବୃଦ୍ଧ ଚାରି ଧାମ ଯାତ୍ରା ପାଇଁ ୩୦ହଜାର ଟଙ୍କା ଆଡଭାନସ୍ ଦେଇ ବୁକିଂ କରିଥିଲେ । ଏନେଇ ସଂସାରି ମୋବାଇଲକୁ ଫୋନ ପେ‘ ଜରିଆରେ ୩୦ହଜାର ପେମେଣ୍ଟ ପଠାଇଥିଲେ । ତେବେ ଟଙ୍କା ପାଇବା ପରେ ଆଉ ଧରା ଛୁଆଁ ଦେଇନଥିଲା ଠକ ଅପରେଟର । ଏନେଇ ସେ ଲିଙ୍ଗରାଜ ଥାନାରେ ଅଭିଯୋଗ କରିଥିଲେ ବୃଦ୍ଧ । ପରେ ପୋଲିସ ତଦନ୍ତ ବେଳେ ଜଣାପଡିଥିଲା ଯେ ସେ ଅଭିଯୁକ୍ତଜଣକ ଭୁବନେଶ୍ୱର ଖଣ୍ଡଗିରି, ଚନ୍ଦ୍ରଶେଖରପୁର, ବଡଗଡ ଥାନା ଅଞ୍ଚଳରେ ଏଇଭଳି ଟୁର-ଟ୍ରାଭେଲସ ନାଁରେ ପ୍ରାୟ ୨.୫ଲକ୍ଷ ଟଙ୍କା ଠକେଇ କରିଛି । ଏନେଇ ଲିଙ୍ଗରାଜ ଥାନା କେସ ନମ୍ବର-୧୭୯ରେ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି ।
- ପ୍ରଥମେ ବୁଲାଉଥିଲା, ପରେ ଠକୁଥିଲା
ଠକାମୀ ପାଇ ମଧ୍ୟ ସେ ନୂଆ ଟ୍ରିକ ଆପଣାଇ ଥିଲା ଅଭିଯୁକ୍ତ । ଏନେଇ ଚିଟଫଣ୍ଡ କମ୍ପାନୀ ଭଳି ପ୍ରଥମେ ବିଶ୍ବାସ ଜିଣିବାକୁ ପ୍ରଥମେ କିଛି ଲୋକଙ୍କୁ ଟୁର-ଟ୍ରାଭେଲସରେ ବୁକିଂ କରି ବୁଲାଇଛି । ପରେ ବିଶ୍ବାସ ଜନ୍ମାଇ ବୁକିଂ କରାଇ ଅଗ୍ରୀମ ରାଶି ଗ୍ରହଣ କରିବା ଅଭିଯୁକ୍ତ ଧରା ଛୁଆଁ ଦେଉନଥିଲା । ଥାନାରେ ଅଭିଯୋଗ ହେବା ପରେ ଏବେ ସତ୍ୟ ସାମ୍ନାକୁ ଆସିଛି ।
- ପତ୍ନୀଙ୍କ ନାଁରେ ଟଙ୍କା କାରବାର !
ଠକାମୀ ତଦନ୍ତ ବେଳେ ପୋଲିସ ଜାଣିବାକୁ ପାଇଛି ଯେ, ସମସ୍ତ ଟଙ୍କା କାରବାର ନିଜ ପତ୍ନୀଙ୍କ ନାମରେ ଥିବା ଆକାଉଣ୍ଟରେ । ଏଥିରେ ଅଭିଯୁକ୍ତର ପତ୍ନୀର ଭୁମିକା କିଛି ରହିଛି କି ନାହିଁ, କିମ୍ବା ତାଙ୍କ ଅଜାଣତରେ ହୋଇଛି, ତାହା ପୋଲିସ ଯାଞ୍ଚ କରୁଛି ।
- ଫରେନ ଟୁର ଅଫର୍ ଦେଉଥିଲା:-
କେବଳ ଦେଶ ଭିତରେ ନୁହେଁ ବରଂ ବିଦେଶ ଭ୍ରମଣର ଅଫର ମଧ୍ୟ ଦେଉଥିଲା । କୋୖଣସି ଅଫିସ ନଖୋଲି ହେଲ୍ପ-ଲାଇନ ନମ୍ବର ଜରିଆରେ ଗ୍ରାହକଙ୍କୁ ଯୋଗାଯୋଗ କରୁଥିଲା । ଯେଉଁଠି ଅନ୍ୟ ନାମିଦାମି ଟ୍ରାଭେଲସ ସଂସ୍ଥା ଅଧିକ ଟଙ୍କା ଚାର୍ଜ କରୁଥିଲେ, ଅଭିଯୁକ୍ତ ବେଶ କମ ଟଙ୍କାରେ ସେହି ସେବା ଯୋଗାଇଦେବା ନେଇ ଭରସା ଦେଉଥିଲା । ତାର ଏହି ଜାଲରେ କିଛି ବୟସ୍କ ବ୍ୟକ୍ତି ଶିକାର ମଧ୍ୟ ହୋଇଥିଲେ । ଏବେ ଥାନାରେ ଅଭିଯୋଗ ପରେ ପୋଲିସ ଅଭିଯୁକ୍ତକୁ ଗିରଫ କରିବା ପରେ ପୁରା ଘଟଣାର ପର୍ଦ୍ଦାଫାସ ହୋଇଛି ।
ଇଟିଭି ଭାରତ, ଭୁବନେଶ୍ବର
