ପୁରୀ: ହୋଟେଲ ମାଲିକ ଓ ଉଠା ଦୋକାନୀଙ୍କ କବଜାରେ 'ଡ୍ରିଙ୍କ ଫ୍ରମ ଟ୍ୟାପ' । ବିଶୁଦ୍ଧ ପାନୀୟ ଜଳରୁ ବଞ୍ଚିତ ହେଉଛନ୍ତି ପର୍ଯ୍ୟଟକ । ଦୃଢ଼ କାର୍ଯ୍ୟାନୁଷ୍ଠାନ ପାଇଁ ବୁଦ୍ଧିଜୀବୀ ମହଲରେ ଦାବି । ଶ୍ରୀକ୍ଷେତ୍ରକୁ ଆସୁଥିବା ଭକ୍ତମାନଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ରାଜ୍ୟ ସରକାର ବଡ଼ ଦାଣ୍ଡର ଉଭୟ ପାର୍ଶ୍ୱରେ 'ଡ୍ରିଙ୍କ ଫ୍ରମ ଟ୍ୟାପ' ବ୍ୟବସ୍ଥା କରିଛନ୍ତି । ବଡ ଦାଣ୍ଡର ଉଭୟ ପାର୍ଶ୍ୱରେ ଅତ୍ୟାଧୁନିକ ଷ୍ଟାଣ୍ଡ ପୋଷ୍ଟ ବ୍ୟବସ୍ଥା ହୋଇଛି । ହେଲେ ଦୁର୍ଭାଗ୍ୟର ବିଷୟ କିଛି ହୋଟେଲ ମାଲିକ ଏହାକୁ କବଜା କରିଛନ୍ତି ।
ଏହି ବିଶୁଦ୍ଧ ପାନୀୟ ଜଳକୁ ହୋଟେଲର ବିଭିନ୍ନ ଅଇଁଠା ବାସନ ମାଜିବା ସହ ଅନ୍ୟାନ୍ୟ ଧୁଆ କାର୍ଯ୍ୟ କରୁଛନ୍ତି । ଯାହାକୁ ନେଇ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି । ଯେଉଁ ଉଦ୍ଦେଶ୍ୟ ଏହି 'ଡ୍ରିଙ୍କ ଫ୍ରମ ଟ୍ୟାପ' ଲାଗିଥିଲା, ତାହା ପୂରଣ ନ ହେବାକୁ ନେଇ ବୁଦ୍ଧିଜୀବୀ ମହଲାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଏହି ଭଳି କିଛି ଦୃଶ୍ୟ ପୁରୀ ବଡଦାଣ୍ଡରେ ଦେଖିବାକୁ ମିଳିଛି ।
ବଡଦାଣ୍ଡରେ ଥିବା ପାପୁଡିଆ ମଠ ତଳେ ଥିବା ଏକ ହୋଟେଲ ବେଧଡକ ଭାବେ ଲୋକଙ୍କ ପାଇଁ ଉଦ୍ଧିଷ୍ଟ ପାନୀୟ ଜଳ ପୋଷ୍ଟ ତଥା ଡ୍ରିଙ୍କ ଫ୍ରମ ଟ୍ୟାପକୁ କବଜା କରି ହୋଟେଲର ଅଇଁଠା ବାସନ ସଫା କରାଯାଉଛି । ତେବେ ଶ୍ରୀମନ୍ଦିରକୁ ପ୍ରତିଦିନ ଏକାଧିକ ଥର ପୁରୀ ଜିଲ୍ଲା ପ୍ରଶାସନର ସବୁ ଅଧିକାରୀ ଏକାଧିକ କାର୍ଯ୍ୟ ପାଇଁ ଆସୁଥିବା ବେଳେ କିଭଳି ଏହା କାହାର ଦୃଷ୍ଟି ପଡୁନାହିଁ ତାହାକୁ ନେଇ ପ୍ରଶ୍ନ ଉଠିଛି । 'ଡ୍ରିଙ୍କ ଫ୍ରମ ଟ୍ୟାପ'କୁ ଯେଉଁ ବ୍ୟକ୍ତି, ଅନୁଷ୍ଠାନ ଅପବ୍ୟବହାର କରିବ ସେମାନଙ୍କ ବିରୋଧରେ କାର୍ଯ୍ୟନୁଷ୍ଠାନ ନିଆଯିବା ବୋଲି ପୁରୀ ଜିଲ୍ଲାପାଳ ପୂର୍ବରୁ ଚେତାବନୀ ଦେଇ ସାରିଛନ୍ତି ।
ଗତ ରଥ ଯାତ୍ରା ସମନ୍ଵୟ ବୈଠକରେ ଆଇନମନ୍ତ୍ରୀ ମଧ୍ୟ 'ଡ୍ରିଙ୍କ ଫ୍ରମ ଟ୍ୟାପ'କୁ ବ୍ୟବସ୍ଥିତ କରିବା, ଜବର ଦଖଲରୁ ମୁକ୍ତ ସହ ପରିସ୍କାର ପରିଛନ ରଖିବା, ନିୟମ ଉଲଘଂନ କରୁଥିବା ବ୍ୟକ୍ତି, ଅନୁଷ୍ଠାନ ବିରୋଧରେ କଡ଼ା କାର୍ଯ୍ୟନୁଷ୍ଠାନ ନେବାକୁ ନିର୍ଦ୍ଦେଶ ଦେଇଥିଲେ । ହେଲେ ଏହି ନିର୍ଦ୍ଦେଶକୁ ପୁରୀ ଜିଲ୍ଲା ପ୍ରଶାସନ ଭୁଲି ଯାଇଛି । ପୂର୍ବ ଭଳି ପୁରୀ ବଡ଼ ଦାଣ୍ଡରେ 'ଡ୍ରିଙ୍କ ଫ୍ରମ ଟ୍ୟାପ'କୁ ବିଭିନ୍ନ ହୋଟେଲ ମାଲିକ, ଉଠା ଦୋକାନୀ କବଜା କରି ନିଜ ବ୍ୟବସାୟ ପ୍ରତିଷ୍ଠାନରେ ପାନୀୟ ଜଳକୁ ଅପବ୍ୟବହାର ସହ ଅଇଁଠା ବାସନ ସହ ବିଭିନ୍ନ ଧୁଆ କାର୍ଯ୍ୟ କରୁଛନ୍ତି ।
ତେବେ ଭକ୍ତଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ଉଦ୍ଦେଶ୍ୟରେ ଏହି ମହତ୍ ଯୋଜନା କରାଯାଇଥିବା ବେଳେ ପୁରୀ ଜିଲ୍ଲା ପ୍ରଶାସନର ଅବହେଳାକୁ ଏହା ସମ୍ପୂର୍ଣ୍ଣ ସାମ୍ନାକୁ ଆଣିଛି । ଏବେ ଭକ୍ତ 'ଡ୍ରିଙ୍କ ଫ୍ରମ ଟ୍ୟାପ'ରୁ ବିଶୁଦ୍ଧ ପାନୀୟ ଜଳ ବ୍ୟବହାର କରିବା ପରିବର୍ତ୍ତେ ଦୋକାନରୁ ପାଣି ବୋତଲ କିଣି ଥିବା ଅଭିଯୋଗ ହୋଇଛି । ତେବେ ପୁରୀ ବଡ଼ ଦାଣ୍ଡ କାହିଁକି ପୁରୀ ସମୁଦ୍ର କୂଳ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଛି ।
ଇଟିଭି ଭାରତ, ପୁରୀ
