କଟକ: ପୁରୀ ବାଣ ବିସ୍ପୋରଣ ଘଟଣା । ଏସସିବି ମେଡିକାଲରେ ପହଞ୍ଚି ଆହତଙ୍କୁ ଭେଟିଲେ ରାଜ୍ୟ ଉନ୍ନୟନ କମିଶନର ଅନୁ ଗର୍ଗ । ମେଡିକାଲ ଅଧୀକ୍ଷକ ଓ କୁଳ ସଚିବଙ୍କ ସହ ଆଲୋଚନା କରିବା ସହ ଆହତଙ୍କ ପରିବାରକୁ ଭେଟିଛନ୍ତି ଅନୁ ଗର୍ଗ । ଉନ୍ନୟନ କମିଶନର ଅନୁ ଗର୍ଗ କହିଛନ୍ତି, "ଏଭଳି ଘଟଣା ବେଶ ଦୁଃଖଦ । ଏସସିବି ମେଡିକାଲରେ ସମସ୍ତ ଆହତଙ୍କ ଚିକିତ୍ସା ଚାଲିଛି । ଡାକ୍ତରମାନେ ବହୁତ ତତ୍ପରତା ସହ ଚିକିତ୍ସା କରୁଛନ୍ତି । ବର୍ତ୍ତମାନ 4 ଜଣ ଆହତ ପ୍ଲାଷ୍ଟିକ ସର୍ଜରୀ ଆଇସିୟୁରେ ଚିକିତ୍ସା ହେଉଛନ୍ତି । ଏହାବ୍ୟତୀତ ଅନ୍ୟ 3 ଜଣ ସର୍ଜରୀ ବିଭାଗରେ ଭଲ ଅଛନ୍ତି ଓ ଚିକିତ୍ସା ଜାରି ରହିଛି ।"
ସେ ଆହୁରି କହିଛନ୍ତି, "ସେଥିମଧ୍ୟରୁ 2 ଆହତ ପ୍ଲାଷ୍ଟିକ ସର୍ଜରୀ ଭେଣ୍ଟିଲେଟରେ ରହିଛନ୍ତି । କାହିଁକି ନା ସେମାନେ ଗୁରୁତର ରହିଛନ୍ତି । 24 ଘଣ୍ଟିଆ ସ୍ପେଶାଲ ଡାକ୍ତରୀ ଟିମ ଏହି ଆହତ ମାନଙ୍କର ଚିକିତ୍ସା ଜାରି ରଖିଛନ୍ତି । ତେବେ ସୁସ୍ଥ ହେବା ପାଇଁ ସମୟ ଲାଗିବ । ସେନେଇ ଏସସିବି ପକ୍ଷରୁ ସମସ୍ତ ଚେଷ୍ଟା ଜାରି ରହିଥିବା କହିଛନ୍ତି ମେଡିକାଲ ଅଧିକ୍ଷକ ପ୍ରଫେସର ସୁଧାଂଶୁ ଶେଖର ମିଶ୍ର । ଯେଉଁ ୨ ଜଣ ଗୁରୁତର ଆହତ ପୂର୍ବରୁ ଆଇସିୟୁରେ ଥିଲେ ସେମାନଙ୍କ ଶରୀରର ଶତ ପ୍ରତିଶତ ପୋଡିଯାଇଛି ।"
ଗୁରୁତର ଅବସ୍ଥାରେ ଥିବା ବ୍ୟକ୍ତିଙ୍କର ଚିକିତ୍ସା କରାଯାଉଥିବା ନେଇ ପ୍ଲାଷ୍ଟିକ ସର୍ଜରୀ ବିଭାଗର ବିଶେଷଜ୍ଞ ଡାକ୍ତର ସୂଚନା ଦେଇଥିଲେ। ଅନ୍ୟ ଜଣେ ଆହତଙ୍କ ଶରୀର ୫୦ରୁ ୬୦ ପ୍ରତିଶତ ପୋଡି ଥିବାବେଳେ ଆଉ କେତେକ ଆହତଙ୍କ ଶରୀର ୩୦ରୁ ୪୦ ପ୍ରତିଶତ ଜଳିଯାଇଥିବା ଏସସିବି ସୁପରିଟେଣ୍ଡେଣ୍ଟ ସୂଚନା ଦେଇଥଲେ। ଆହତଙ୍କୁ ସମସ୍ତ ପ୍ରକାର ଚିକିତ୍ସା ସେବା ଯୋଗାଇ ଦିଆଯାଉଥିବା କହିଛନ୍ତି ସୁପରିଟେଣ୍ଡେଣ୍ଟ। ଗତକାଲି (ବୁଧବାର) ଘଟିଥିଲା ଏହି ଲୋମ ଟାଙ୍କୁରା ଘଟଣା। ଏସସିବିକୁ 8 ଜଣ ଚିକିତ୍ସା ପାଇଁ ଆସିଥିଲାବେଳେ ଜଣଙ୍କର ମୃତ୍ୟୁ ଘଟିଥିଲା। ବର୍ତ୍ତମାନ 7 ଜଣ ଏସସିବିରେ ଚିକିତ୍ସାଧୀନ ରହିଛନ୍ତି।
ଇଟିଭି ଭାରତ, କଟକ
