ଭୁବନେଶ୍ୱର: ଓଡିଶା ଉପକୂଳମୁହାଁ ହେଉଥିବା ସାମୁଦ୍ରିକ ବାତ୍ୟା ‘ଦାନା’କୁ ଦୃଷ୍ଟିରେ ରଖି ରାଜ୍ୟର ୩ ପ୍ରମୁଖ ବନ୍ଦରରେ ଜାରି ହେଲା ୧ ନମ୍ବର ବିପଦ ସଙ୍କେତ । ଜଗତସିଂହପୁରର ପାରାଦ୍ବୀପ, ଗଞ୍ଜାମର ଗୋପାଳପୁର ଏବଂ ଭଦ୍ରକ ଜିଲ୍ଲାର ଧାମରା ବନ୍ଦର ପାଇଁ ଏହି ନିର୍ଦ୍ଦେଶାବଳି ଜାରି କରାଯାଇଛି । ଅତିରିକ୍ତ ସ୍ବତନ୍ତ୍ର ରିଲିଫ କମିଶନର (ASRC) ଏହି ତିନି ଜିଲ୍ଲାର ମାଜିଷ୍ଟ୍ରେଟଙ୍କୁ ବନ୍ଦର କର୍ତ୍ତୃପକ୍ଷଙ୍କୁ ୧ ନମ୍ବର ବିପଦ ସଙ୍କେତ (ସିଗନାଲ ଡିସି-1) ଲାଗୁ କରିବା ପାଇଁ ନିର୍ଦ୍ଦେଶ ଦେବାକୁ ଚିଠିରେ ଉଲ୍ଲେଖ କରିଛନ୍ତି ।
- ବନ୍ଦରରେ ବିପଦ ସଙ୍କେତ
ସ୍ବତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟରୁ ପ୍ରକାଶ ପାଇଥିବା ନିର୍ଦ୍ଦେଶାବଳୀରେ ଦର୍ଶାଯାଇଛି ଯେ, ବଙ୍ଗୋପସାଗରରେ ସୃଷ୍ଟ ଲଘୁଚାପ ଅବପାତର ରୂପ ନେଇସାରିଛି । ଏହା 24 ତାରିଖରେ ଅତିଭୀଷଣ ବାତ୍ୟା ଭାବେ ଓଡିଶା ଉପକୂଳ ନିକଟତର ହେବା ନେଇ ପୂର୍ବାନୁମାନ କରାଯାଉଛି । ସେହି ସମୟରେ ପବନର ବେଗ ପ୍ରାୟ 100 ରୁ 120 ମଧ୍ୟରେ ରହିବ । ତେଣୁ ଏହି ତିନି ବନ୍ଦରରେ ଏକ ନମ୍ବର ବିପଦ ସଙ୍କେତ ଲାଗୁ କରିବାକୁ ଜିଲ୍ଲାପାଳମାନେ ବନ୍ଦର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେବେ । ଏହା ସହ ଗୋପାଳପୁର, ପାରାଦୀପ ଏବଂ ଧାମର ବନ୍ଦର କର୍ତ୍ତୃପକ୍ଷଙ୍କ ସହ ଏହି ତିନି ଜିଲ୍ଲାର ଜିଲ୍ଲା ପ୍ରଶାସନ ସମନ୍ୱୟ ରକ୍ଷା କରିବାକୁ ମଧ୍ୟ ଚିଠିରେ ଅନୁରୋଧ କରାଯାଇଛି । ଏହି ନିର୍ଦ୍ଦେଶନାମାକୁ ଜରୁରୀ ବୋଲି ଦର୍ଶାଯିବା ସହ ପ୍ରାଥମିକତା ଭିତ୍ତିରେ କାର୍ଯ୍ୟକାରୀ କରିବାକୁ ଚିଠିରେ ଉଲ୍ଲେଖ କରିଛି ଏସଆରସି କାର୍ଯ୍ୟାଳୟ ।
- ବଙ୍ଗୋପସାଗରରେ ସୃଷ୍ଟ ଲଘୁଚାପ ଅବପାତର ରୂପ ନେଇଛି
- ୨୪ ତାରିଖରେ ଅତିଭୀଷଣ ବାତ୍ୟା ଭାବେ ଓଡିଶା ଉପକୂଳ ନିକଟତର ହେବା ନେଇ ପୂର୍ବାନୁମାନ
- ସେହି ସମୟରେ ପବନର ବେଗ ପ୍ରାୟ 100 ରୁ 120 କିଲୋମିଟର ରହିବ
- ତିନି ବନ୍ଦରରେ ଏକ ନମ୍ବର ବିପଦ ସଙ୍କେତ ଲାଗୁ କରିବାକୁ ବନ୍ଦର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ
- ଗୋପାଳପୁର, ପାରାଦୀପ ଏବଂ ଧାମର ବନ୍ଦର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ
- ଜଗତସିଂହପୁର ଜିଲ୍ଲାର ପାରାଦ୍ବୀପ ବନ୍ଦର
- ଗଞ୍ଜାମ ଜିଲ୍ଲାର ଗୋପାଳପୁର ବନ୍ଦର
- ଭଦ୍ରକ ଜିଲ୍ଲାର ଧାମରା ବନ୍ଦର
ପାରାଦୀପଠାରୁ ପ୍ରାୟ 730 କିମି ଦୂରରେ ଅବପାତ:-
ଭାରତୀୟ ପାଣିପାଗ ବିଭାଗ (ଆଇଏମଡି)ର ପୂର୍ବାନୁମାନ ଅନୁଯାୟୀ, ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ଲଘୁଚାପ ଆଜି ପୂର୍ବାହ୍ନ ସୁଦ୍ଧା ଅବପାତରେ ପରିଣତ ହୋଇସାରିଛି । ଏହା ଏବେ ପାରାଦୀପଠାରୁ ପ୍ରାୟ 730 କିଲୋମିଟର ଦକ୍ଷିଣ-ପୂର୍ବରେ ଓ ବାଂଲାଦେଶର ଖେପୁପାରାଠାରୁ 740 କିଲୋମିଟର ଦକ୍ଷିଣ, ଦକ୍ଷିଣ-ପୂର୍ବରେ ସମୁଦ୍ର ମଝିରେ କେନ୍ଦ୍ରୀଭୂତ ରହିଛି । ଏହା ଆଜି ସଂଧ୍ୟା କିମ୍ବା ରାତି ସୁଦ୍ଧା ଗଭୀର ଅବପାତରେ ପରିଣତ ହେବା ସହ ଆସନ୍ତାକାଲି ସୁଦ୍ଧା ବାତ୍ୟାରେ ପରିଣତ ହେବ ଓ ଉତ୍ତର, ଉତ୍ତର-ପଶ୍ଚିମ ଦିଗରେ ସ୍ଥଳଭାଗମୁହାଁ ହେବ । ଏହାର ପ୍ରାରମ୍ଭିକ ଗତିପଥ ପୁରୀ ଓ ପଶ୍ଚିମବଙ୍ଗର ସାଗରଦ୍ବୀପ ମଧ୍ୟରେ ରହିବ ବୋଲି ପୂର୍ବାନୁମାନ ପ୍ରକାଶ ପାଇଛି । ସମୟ ଅତିବାହିତ ହେବା ସହ ଏହାର ଗତିପଥ ଓ ତୀବ୍ରତାରେ ମଧ୍ୟ କ୍ରମଶଃ ସ୍ପଷ୍ଟତା ଆସିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
