ଭୁବନେଶ୍ବର: ଆସନ୍ତା ବର୍ଷ ଜାନୁଆରୀରେ ମୋହନ ସରକାର ଆୟୋଜନ କରିବେ 'ଉତ୍କର୍ଷ ଓଡ଼ିଶା ମେକ ଇନ ଓଡ଼ିଶା କନକ୍ଲେଭ ୨୦୨୫' । ଏଥିପାଇଁ ପ୍ରାକ ପ୍ରସ୍ତୁତ ଆରମ୍ଭ କରିଛନ୍ତି ଓଡିଶା ସରକାର । ଅକ୍ଟୋବର ୩ ତାରିଖରେ ବିଭିନ୍ନ ଦେଶର ରାଷ୍ଟ୍ରଦୂତ, ହାଇ କମିଶନ, କନସୋଲ ଜେନେରାଲ, ଶିଳ୍ପପତିଙ୍କ ସହ ଆଲୋଚନା କରିବେ ମୋହନ ସରକାର । ଏଥିପାଇଁ ନୂଆଦିଲ୍ଲୀ ଗସ୍ତରେ ଯାଉଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁ, ମୁଖ୍ୟ ଶାସନ ସଚିବ ମନୋଜ କୁମାର ଆହୁଜା, ଶିଳ୍ପ ବିଭାଗର ପ୍ରମୁଖ ଶାସନ ସଚିବ ହେମନ୍ତ ଶର୍ମା ଓ ବରିଷ୍ଠ ଅଧିକାରୀ ।
ଉତ୍କର୍ଷ ଓଡ଼ିଶା ମେକ ଇନ ଓଡ଼ିଶା କନକ୍ଲେଭ ୨୦୨୫:
ଏନେଇ ଶିଳ୍ପମନ୍ତ୍ରୀ ସମ୍ପଦ ସ୍ୱାଇଁ କହିଛନ୍ତି, "ଉତ୍କର୍ଷ ଓଡ଼ିଶା ମେକ ଇନ ଓଡ଼ିଶା କନକ୍ଲେଭ ୨୦୨୫ ପାଇଁ ପ୍ରାକ ପ୍ରସ୍ତୁତ ଆରମ୍ଭ ହୋଇସାରିଛି । ଏହି ପ୍ରକ୍ରିୟାର ପ୍ରଥମ ପର୍ଯ୍ୟାୟରେ ନୂଆଦିଲ୍ଲୀରେ ଓଡିଶା ସରକାରଙ୍କ ପକ୍ଷରୁ ଆୟୋଜିତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କାର୍ଯ୍ୟକ୍ରମରେ ସାମିଲ ହେବେ । ବିଭିନ୍ନ ଦେଶର ରାଷ୍ଟ୍ରଦୂତ, ହାଇ କମିଶନ, କନସୋଲ ଜେନେରାଲ, ଟ୍ରେଡ଼ କମିଶନର ମାନଙ୍କ ସହ ଓଡିଶା ସରକାରଙ୍କର ଆଲୋଚନା ହେବ । ସେହିପରି ବିଭିନ୍ନ ଶିଳ୍ପପତିଙ୍କ ସହିତ ମୁଖ୍ୟମନ୍ତ୍ରୀ ଆଲୋଚନା ୱାନ ଟୁ ୱାନ ଆଲୋଚନା କରିବେ ।"
ଓଡିଶାରେ ଶିଳ୍ପ ପ୍ରତିଷ୍ଠା ଲାଗି ଭିର୍ତ୍ତିଭୂମୀ ବାବଦରେ ଆଲୋଚନା ହେବ:
ଶିଳ୍ପମନ୍ତ୍ରୀ ଆହୁରି ମଧ୍ୟ କହିଛନ୍ତି, "କାର୍ଯ୍ୟକ୍ରମ ଅବସରରେ ଏକ ରୋଡ଼ ସୋ' ଆୟୋଜନ ହେବାର ରହିଛି । ବିଭିନ୍ନ ଶିଳ୍ପ ମୁଖ୍ୟ, ବ୍ୟବସାୟୀକ ମୁଖ୍ୟ ଉପସ୍ଥିତ ରହିବେ । ଆଇଟି, ଆଇଟିଏସ, ଖାଦ୍ୟ ପ୍ରକ୍ରିୟାକରଣ, କେମିକାଲ, ପେଟ୍ରୋକେମିକାଲ, ଟେକ୍ସଟାଇଲ ଓ ଅନ୍ୟାନ୍ୟ ଶିଳ୍ପ ମୁଖ୍ୟଙ୍କ ସହିତ ଆଲୋଚନା ହେବ । ନିବେଶକ ମିଟ ଆୟୋଜନ ହେବ । ଓଡିଶାରେ ବିଜେପିର ସରକାର ଆସିବା ପରେ ଶିଳ୍ପ ଇକୋ ସିଷ୍ଟମକୁ ସୁଦୃଢ କରାଯାଇଛି । ଇଜ ଅଫ ଡୁଇଙ୍ଗ ବିଜନେସରେ ଆମେ ଆଗକୁ ଯାଇଛୁ । ସିଙ୍ଗିଲ ୱଣ୍ଡୋ ବ୍ୟବସ୍ଥାରେ ସହଜ ଓ ସରଳୀକରଣ କରାଯାଇଛି । ଏ ବାବଦରେ ଆମେ ଅବଗତ କରାଇବୁ । ଓଡିଶାରେ ଶିଳ୍ପ ପ୍ରତିଷ୍ଠା ଲାଗି ଭିତ୍ତିଭୂମି ବାବଦରେ ଆଲୋଚନା ମଧ୍ୟ କରିବୁ ।"
୫ ବର୍ଷରେ ଅଢେ଼ଇ ଲକ୍ଷ କୋଟି ପୁଞ୍ଜିନିବେଶ ଟାର୍ଗେଟ:
ସେ ଆହୁରି ମଧ୍ୟ କହିଛନ୍ତି, "ଓଡିଶାରେ ନିବେଶ କଲେ ନିବେଶକ କିଭଳି ଲାଭବାନ ହେବେ ଓ କ'ଣ ସୁବିଧା ରାଜ୍ୟ ସରକାର ଯୋଗାଇ ଦେବେ ସେ ନେଇ ଅବଗତ କରାଯିବ । ୧୦୦ ଦିନରେ ବିଜେପି ସରକାର ନିବେଶ କ୍ଷେତ୍ରରେ ଅନେକ ସଫଳତା ପାଇଛି । ୪୫ ହଜାର କୋଟିର ପୁଞ୍ଜି ନିବେଶକୁ ମୁଖ୍ୟମନ୍ତ୍ରୀ ଅନୁମୋଦନ ଦେଇଛନ୍ତି । ୫ ବର୍ଷରେ ଅଢେ଼ଇ ଲକ୍ଷ କୋଟି ଟଙ୍କାର ପୁଞ୍ଜିନିବେଶ ଟାର୍ଗେଟ ରହିଛି । ଏହି ଦିଗରେ ପ୍ରଥମ ବର୍ଷ ଟାର୍ଗେଟର ୯୦ ପ୍ରତିଶତ ୧୦୦ ଦିନରେ ପୂରଣ କରିଛୁ । ଯାହା ଆଶା ଅଛି ରାଜ୍ୟରେ ଭଲ ପୁଞ୍ଜିନିବେଶ ହେବ । ଗତବର୍ଷ ତୁଳନାରେ ମେକ ଇନ ଓଡ଼ିଶା ଭଲ ହେବା ସହ ବଡ଼ ନିବେଶକ ଓଡିଶା ଆସିବେ ।"
ଭୁବନେଶ୍ୱର ଠାରେ 'ଉତ୍କର୍ଷ ଓଡ଼ିଶା'- ମେକ ଇନ ଓଡ଼ିଶା କନକ୍ଲେଭ୍ ୨୦୨୫ର ଲୋଗୋ ଉନ୍ମୋଚନ ସମାରୋହରେ ଯୋଗଦେଇ ଲୋଗୋ ଉନ୍ମୋଚନ କଲି।
— Mohan Charan Majhi (@MohanMOdisha) September 27, 2024
ଓଡ଼ିଶାକୁ ନିବେଶର କେନ୍ଦ୍ରବିନ୍ଦୁ କରିବା ଏବଂ ୨୦୩୬ ସୁଦ୍ଧା ବିକଶିତ ଓଡ଼ିଶା ନିର୍ମାଣ ପାଇଁ ଆମ ସରକାର ପ୍ରାଥମିକତା ଦେଇଛନ୍ତି। ନୂତନ ସମ୍ଭାବନାକୁ ସଫଳତାର ରୂପ ଦେବାପାଇଁ ବଜେଟରେ ସ୍ୱତନ୍ତ୍ର… pic.twitter.com/ArHE5nZH2h
ମୋହନ ସରକାରଙ୍କ ରଣନୀତି ପ୍ରସ୍ତୁତି:
ଆସନ୍ତା ବର୍ଷ ଅର୍ଥାତ ୨୦୨୫ ଜାନୁଆରୀ ୨୮ ଓ ୨୯ରେ ଆୟୋଜନ ହେବ ଉତ୍କର୍ଷ ଓଡ଼ିଶା ମେକ ଇନ ଓଡ଼ିଶା କନକ୍ଲେଭ ୨୦୨୫ । କାର୍ଯ୍ୟକ୍ରମରେ ସାମିଲ ହେବେ ଦେଶ ଓ ବିଦେଶର ନିବେଶକ । ଏଥିପାଇଁ ଗତ ଶୁକ୍ରବାର ରାତିରେ ଉତ୍କର୍ଷ ଓଡିଶା ୨୦୨୫ ଲୋଗୋ ଉନ୍ମୋଚିତ କରିଛନ୍ତି ମୁଖ୍ୟମନ୍ତ୍ରୀ ଓ ରାଜ୍ୟ ସରକାର । ପ୍ରଗତିର ନୂତନ ସୂର୍ଯ୍ୟୋଦୟ ୨୦୩୬ ସୁଦ୍ଧା ହେବ ବିକଶିତ ଓଡ଼ିଶାର ଅଭ୍ୟୁଦୟ । ଏଥିପାଇଁ ରଣନୀତି ପ୍ରସ୍ତୁତ କରୁଛନ୍ତି ମୋହନ ସରକାର ।
ଇଟିଭି ଭାରତ, ଭୁବନେଶ୍ବର
