ଭୁବନେଶ୍ବର: "ଆଜି ଓଡ଼ିଶା ପାଇଁ ଏକ ଐତିହାସିକ ଦିନ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ପ୍ରବାସୀ ଭାରତୀୟ ସମ୍ମିଳନୀକୁ ଉଦଘାଟନ କରିଛନ୍ତି । ଆଜି ପ୍ରଧାନମନ୍ତ୍ରୀ ଉପସ୍ଥିତ ରହି ଆମକୁ ଉତ୍ସାହିତ କରିଛନ୍ତି । ଆଗାମୀ ଦିନରେ ଓଡିଶାକୁ ଆଗକୁ ନେବା ପାଇଁ ମୋଦିଜୀଙ୍କ ଭଲ ପାଇବା ପାଇଛୁ । ଓଡ଼ିଶାର ଭିତ୍ତିଭୂମି, ପର୍ଯ୍ୟଟନ ଏବଂ ଅର୍ଥନୈତିକ କ୍ଷେତ୍ରରେ ବିକାଶ ପାଇଁ ଓଡିଶା ଏକ ବଡ଼ ଭୂମିକା ନେବ ।" ଇଟିଭି ଭାରତକୁ ସ୍ବତନ୍ତ୍ର ସାକ୍ଷାତକାର ଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।
ଓଡ଼ିଶାକୁ ଆଗକୁ ନେବାକୁ ଉତ୍କର୍ଷ ଓଡିଶା ବଡ଼ ଉପଲବ୍ଧି: ମୁଖ୍ୟମନ୍ତ୍ରୀ
ଇଟିଭି ଭାରତକୁ ସାକ୍ଷାତକାର ଦେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି,"ଉତ୍କର୍ଷ ଓଡିଶା ମେକ ଇନ ଓଡିଶା" ଓଡ଼ିଶାକୁ ଆଗକୁ ନେବାକୁ ଏକ ବଡ଼ ଉପଲବ୍ଧି । 2047 ବିକଶିତ ଭାରତର ଲକ୍ଷ୍ୟ ପାଇଁ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ । ଆମ ସରକାର ଆଜି 6 ମାସର ସରକାର । ଶିଶୁ ଅବସ୍ଥାରେ ଥକିବାର ପ୍ରଶ୍ନ ଉଠୁନାହିଁ । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରବାସୀ ଭାରତୀୟ ଦିବସକୁ ଉଦଘାଟନ କରିବା ସହ ଆହ୍ୱାନ ଦେଇଛନ୍ତି । ଗ୍ରୋଥ ଇଞ୍ଜିନକୁ ଆଜି ଆରମ୍ଭ କରିଛନ୍ତି ପ୍ରଧାନମନ୍ତ୍ରୀ ମୋଦି । "
"ପୂର୍ବ ଭାରତର ଦ୍ବାର ହେବ ଓଡ଼ିଶା":
ମୁଖ୍ୟମନ୍ତ୍ରୀ ଏହା ମଧ୍ୟ କହିଛନ୍ତି," ପ୍ରଧାନମନ୍ତ୍ରୀ ଆମକୁ ଆଶୀର୍ବାଦ ଦେଇଛନ୍ତି । ସେହି ଆଶୀର୍ବାଦକୁ ନେଇ ଆମେ ଆଗକୁ ବଢିବୁ । ଆଉ ପଛକୁ ହଟିବାର ନାହିଁ । ପ୍ରଧାମନ୍ତ୍ରୀ ଚତୁର୍ଥ ଥର ପାଇଁ ଆସିଲେ ଏବଂ ଆମକୁ ଉତ୍ସାହିତ କଲେ । ସାରା ବିଶ୍ବର ଲୋକଙ୍କୁ ଏଠାକୁ ଆଣିଲେ । ଏହା ପୂର୍ବରୁ 'ଡିଜି ସମ୍ମିଳନୀ' ଏବଂ 'ନାଭାଲ ଡେ' ଭଳି ସର୍ବ ଭାରତୀୟସ୍ତରର କାର୍ଯ୍ୟକ୍ରମ ଆମକୁ ଦେଇଥିଲେ । ଆମେ ମଧ୍ୟ ନୂଆ ସରକାର ଆସିବା ପରେ ଏହି ସବୁ କାର୍ଯ୍ୟ କରି ସଫଳତା ସାଉଁଟି ପାରିଛୁ । ପୂର୍ବ ଭାରତର ଦ୍ବାର ହେବ ଓଡ଼ିଶା । ଭାରତର ଅର୍ଥନୈତିକ ଅଭିବୃଦ୍ଧିରେ ଆଗ୍ରୀମ ଭୂମିକା ଗ୍ରହଣ କରିବ ଓଡ଼ିଶା । "
୩ ଦିନିଆ ପ୍ରବାସୀ ଭାରତୀୟ ସମ୍ମିଳନୀ:
ଗତକାଲି(ବୁଧବାର)ଠାରୁ ତିନିଦିନିଆ ପ୍ରବାସୀ ଭାରତୀୟ ସମ୍ମିଳନୀ ଆରମ୍ଭ ହୋଇସାରିଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବିଦେଶ ମନ୍ତ୍ରୀ ଏସ.ଜୟଶଙ୍କରଙ୍କ ସମେତ ଏକାଧିକ କେନ୍ଦ୍ରମନ୍ତ୍ରୀ ପ୍ରଥମ କାର୍ଯ୍ୟଦିବସ ସମାରୋହରେ ସାମିଲ୍ ହୋଇଥିବାବେଳେ ଆଜି (ଗୁରୁବାର) ପ୍ରଧାନମନ୍ତ୍ରୀ ମୋଦି ଏହାକୁ ଉଦଘାଟନ କରିଛନ୍ତି । ଆସନ୍ତାକାଲି ଉଦଯାପନୀ କାର୍ଯ୍ୟକ୍ରମରେ ସାମିଲ ହେବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଏହି ଅବସରରେ 27 ଜଣଙ୍କୁ ସମ୍ମାନିତ କରିବେ ରାଷ୍ଟ୍ରପତି । ଏଥିପାଇଁ ଆଜି ଓଡ଼ିଶା ଗସ୍ତରେ ଆସୁଛନ୍ତି ରାଷ୍ଟ୍ରପତି ।
ଇଟିଭି ଭାରତ, ଭୁବନେଶ୍ବର
