ବ୍ରହ୍ମପୁର: ପ୍ରାଚୀନ ବିରଳ ସାମଗ୍ରୀ (ଆଣ୍ଟିକ) ଝୁମର ଦେବା ବାହାନାରେ ବ୍ୟବସାୟୀଙ୍କ ଠାରୁ ବଡ଼ ଧରଣର ଠକେଇ । ବ୍ୟବସାୟୀଙ୍କ ଠାରୁ ୧୯ ଲକ୍ଷ ଟଙ୍କା ନେଇ କାଗଜ ବିଡ଼ା ଭର୍ତ୍ତି ବାକ୍ସ ଧରାଇ ଚମ୍ପଟ ମାରିଲେ ଠକ ଗ୍ୟାଙ୍ଗ । ଏନେଇ ଥାନାରେ ଅଭିଯୋଗ ପରେ ୩ ଜଣ ଅଭିଯୁକ୍ତଙ୍କୁ ଗିରଫ କରିବା ସହ ଟଙ୍କା ଜବତ କରିଛି ପୋଲିସ । ତେବେ ଏଭଳି ଅଭିଯୋଗ ଆସିଛି ବ୍ରହ୍ମପୁର ସହର ବୈଦ୍ୟନାଥପୁର ଥାନା ଅଞ୍ଚଳରୁ ।
କ'ଣ ରହିଥିଲା ଘଟଣା:
ଅଭିଯୋଗ ଅନୁସାର, ବ୍ରହ୍ମପୁର ସହରରେ ଗତ କିଛି ଦିନ ତଳେ ସ୍ଥାନୀୟ ବ୍ରହ୍ମାନଗର ଦ୍ଵିତୀୟ ଲାଇନରେ ରହୁଥିବା ପ୍ରମୋଦ କୁମାର ସାହୁ ନାମକ ଜଣେ ବ୍ୟବସାୟୀଙ୍କ ସହ ସହରର ଗୋଇଲୁଣ୍ଡିର ଶିବଶଙ୍କର ପଟ୍ଟନାୟକ ନାମକ ଜଣେ ବ୍ୟକ୍ତି ପରିଚୟ ହୋଇଥିଲା । ଦୁହିଁଙ୍କ ମଧ୍ୟରେ ଏକ ଝୁମର କିଣାକୁ ନେଇ ଆଲୋଚନା ହୋଇଥିଲା । ଏହି ଆଲୋଚନା ପରେ ଶିବଶଙ୍କର ନିଜର ପରିଚିତ ଥିବା ଦର୍ଶାଇ କଟକ ସାଲେପୁର ଥାନା ଭୀମଦାସପୁରର ଅଜୟ କୁମାର ମହାନ୍ତି ଓ କଟକ କନ୍ଦରପୁର ଥାନା ଅଞ୍ଚଳର ବଟକୃଷ୍ଣ ପ୍ରଧାନଙ୍କ ସହିତ ଆଲୋଚନା କରିଥିଲେ । ପରେ ଉକ୍ତ ଆଣ୍ଟିକ ସାମଗ୍ରୀ ୫୦ ଲକ୍ଷ ଟଙ୍କାର ସାମଗ୍ରୀ ହୋଇଥିବା ବେଳେ ୧୯ ଲକ୍ଷ ଟଙ୍କା ଯୋଗାଡ଼ କରିବାକୁ କହି ସେମାନଙ୍କ ମଧ୍ୟରେ ବ୍ୟବସାୟିକ ସମ୍ପର୍କ ଜାରି ରଖିଥିଲେ ।
ବଦଳାଇ ଦେଲେ ଟଙ୍କା ବ୍ୟାଗ:
ଏହା ମଧ୍ୟରେ ଉକ୍ତ ଆଣ୍ଟିକ ସାମଗ୍ରୀ ନେବା ପାଇଁ ଆଗ୍ରହ ରଖିଥିବା ପ୍ରମୋଦ କୁମାର ସାହୁ ଟଙ୍କା ଯୋଗାଡ଼ କରିଥିବା କହିଥିଲେ । ପରେ ଶିବଶଙ୍କର ପଟ୍ଟନାୟକ, ଅଜୟ କୁମାର ମହାନ୍ତି ଓ ବଟକୃଷ୍ଣ ପ୍ରଧାନ ଗତ ୨୮ ତାରିଖରେ ବ୍ରହ୍ମପୁରର ପ୍ରମୋଦ ସାହୁଙ୍କ ସହିତ ପୂର୍ବ ଆଲୋଚନା ମୁତାବକ ଆସି ଟଙ୍କା ରହିଥିବା ହ୍ୟାଣ୍ଡ୍ ବ୍ୟାଗ୍କୁ ଦେଖି ଚାଲିଯାଇଥିଲେ । ପରେ ସହରର ନୂତନ ବସଷ୍ଟାଣ୍ଡ ସ୍ଥିତ ଏକ ଲଜ୍କୁ ଟଙ୍କା ଧରି ଆସିବା ପାଇଁ କହିଥିଲେ । ପ୍ରମୋଦ ଟଙ୍କା ଧରି ଆସିଥିବା ୧୯ ଲକ୍ଷ ଟଙ୍କାର ହ୍ୟାଣ୍ଡ ବ୍ୟାଗକୁ ଅତ୍ୟନ୍ତ କୈଶଳକ୍ରମେ ଟଙ୍କା ଗଣିବାର ଆଳ ଦେଖାଇ ତାହାକୁ ପରିବର୍ତ୍ତନ କରିଦେଇଥିଲେ । ଅସଲି ଟଙ୍କା ଥିବା ବ୍ୟାଗକୁ ବଦଳାଇ ନକଲି ନୋଟ୍ ରହିଥିବା ବ୍ୟାଗକୁ ରଖି ଝୁମର ଆଣିବାକୁ ଯାଇଥିବା କହି ବ୍ୟବସାୟୀଙ୍କ ଟଙ୍କା ବ୍ୟାଗ୍ ନେଇ ଫେରାର ହୋଇଯାଇଥିଲେ ।
୩ ଗିରଫ:
ସେପଟେ ଦୀର୍ଘ ସମୟ ଧରି ଆଣ୍ଟିକ ସାମଗ୍ରୀ ଯୋଗାଇବା ପାଇଁ କହିଥିବା ବ୍ୟକ୍ତିମାନେ ନ ଆସିବାକୁ ପ୍ରମୋଦ ସନ୍ଦେହ କରିଥିଲେ । ପରେ ପ୍ରମୋଦ ନିଜ ପାଖରେ ରହିଥିବା ଟଙ୍କା ବ୍ୟାଗକୁ ଖୋଲିଥିଲେ । କିନ୍ତୁ ବ୍ୟାଗରେ ଟଙ୍କା ବଦଳରେ କାଗଜ ବ୍ୟାଣ୍ଡଲ ରହିଥିବା ଦେଖିଥିଲେ । ଏନେଇ ତୁରନ୍ତ ବ୍ରହ୍ମପୁର ସହରର ବୈଦ୍ୟନାଥପୁର ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ଠକେଇ ଗ୍ୟାଙ୍ଗକୁ ଧରିବାକୁ ବ୍ରହ୍ମପୁର ପୋଲିସର ବିଭିନ୍ନ ଥାନା ଅଞ୍ଚଳର ପୋଲିସ ଟିମ ବିଭିନ୍ନ ସ୍ଥାନରେ ଚଢାଉ କରିଥିଲେ । ପରେ ଏହି ଗ୍ୟାଙ୍ଗର ୩ ଜଣଙ୍କୁ ଗିରଫ କରିଛି ପୋଲିସ । ଗିରଫ ଅଭିଯୁକ୍ତମାନେ ପୂର୍ବରୁ ଅନ୍ୟ ଏକ ମାମଲାରେ ସଂପୃକ୍ତ ରହିଥିବା ପୋଲିସ ତଦନ୍ତ ସମୟରେ ଜାଣିବାକୁ ପାଇଛି ।
କିପରି ଟଙ୍କା ବ୍ୟାଗକୁ ବଦଳାଇଥିଲେ ଏହି ଗ୍ୟାଙ୍ଗ:
୧୯ ଲକ୍ଷ ଟଙ୍କା ଧରି ଚମ୍ପଟ ମାରିଥିବା ଗ୍ୟାଙ୍ଗକୁ ପୋଲିସ ଧରିବା ପରେ କିପରି ଅଭିଯୁକ୍ତମାନେ ଟଙ୍କା ଭର୍ତ୍ତି ବ୍ୟାଗକୁ ବଦଳାଇଥିଲେ ତାକୁ ନେଇ ବ୍ରହ୍ମପୁର ଆରକ୍ଷୀ ଅଧିକ୍ଷକ ଗଣମାଧ୍ୟମକୁ ସୂଚନା ଦେଇଛନ୍ତି । ଗିରଫ ଅଭିଯୁକ୍ତମାନେ ଆଣ୍ଟିକ ସାମଗ୍ରୀ ନେବା ପାଇଁ ଆଗ୍ରହ ପ୍ରକାଶ କରିଥିବା ପ୍ରମୋଦ ସାହୁଙ୍କ ସହିତ ଆଲୋଚନା ସମୟରେ ସେ ଟଙ୍କା ରଖିଥିବା ବ୍ୟାଗର ରଙ୍ଗ ଓ ଆକୃତି ଦେଖିଥିଲେ । ଠିକ ସେଭଳି ଅନୁରୂପ ଅନ୍ୟ ଏକ ରଙ୍ଗର ବ୍ୟାଗରେ ଅଭିଯୁକ୍ତମାନେ ଟଙ୍କା ବଦଳରେ କାଗଜ ବ୍ୟାଣ୍ଡଲ ରଖି ସାଥିରେ ନେଇ ଆସିଥିଲେ । ହେଲେ ଅଭିଯୁକ୍ତମାନଙ୍କ ଏଭଳି ଟଙ୍କା ଠକେଇ କରି ଲୁଟି ନେବା ପାଇଁ କରିଥିବା ଚକ୍ରାନ୍ତକୁ ପ୍ରମୋଦ ସାହୁ ଜାଣିପାରିନଥିଲେ । ଫଳରେ ତାଙ୍କ ଠାରୁ ଟଙ୍କା ଗଣତି କରିବାର ବାହାନାରେ ଅଭିଯୁକ୍ତମାନେ ବ୍ୟାଗକୁ ବଦଳାଇ ଦେଇଥିଲେ ।
ଟଙ୍କା ଲୁଟ ପାଇଁ ବଡ଼ ଚକ୍ରାନ୍ତ:
ଏନେଇ ବ୍ରହ୍ମପୁର ଏସପି ଶ୍ରର୍ବଣା ବିବେକ ଏମ କହିଛନ୍ତି, "ଏହି ଠକ ଗ୍ୟାଙ୍ଗ ଟଙ୍କା ହଡ଼ପ କରିବା ପାଇଁ ବଡ଼ ଚକ୍ରାନ୍ତ କରିଥିଲେ । ବ୍ୟବସାୟୀଙ୍କୁ ଟାର୍ଗେଟ କରିବା ସହ ପ୍ରାଚୀନ ବିରଳ ସାମଗ୍ରୀ ଝୁମର ବିକ୍ରି କରିବାର ଯୋଜନା କରି ଏହି ଗ୍ୟାଙ୍ଗ ୨ଟି ଟିମରେ ଭାଗ ହୋଇଯାଇଥିଲେ । ଏହି ଗ୍ୟାଙ୍ଗର ଗୋଟିଏ ଟିମ ବ୍ୟବସାୟୀଙ୍କୁ ଆଣ୍ଟିକ ସାମଗ୍ରୀ ଝୁମରକୁ ୧୯ ଲକ୍ଷ ଟଙ୍କାରେ ବିକିବାକୁ ପାଇଁ ଚାହୁଁଥିବା କହିଥିଲେ । ସେପଟେ ଅନ୍ୟ ଏକ ଟିମ୍ ବ୍ୟବସାୟୀଙ୍କ ଠାରୁ ଆଣ୍ଟିକ ସାମଗ୍ରୀକୁ ୫୦ ଲକ୍ଷରୁ ୧ କୋଟି ଟଙ୍କା ମଧ୍ୟରେ କିଣିବାକୁ ଚାହୁଁଥିବା କହିଥିଲେ । ତେବେ ବ୍ୟବସାୟୀ ଜଣକ ଆଣ୍ଟିକ ଝୁମରକୁ ଜଣଙ୍କ ଠାରୁ ୧୯ ଲକ୍ଷ ଟଙ୍କାରେ କ୍ରୟ କରି ଏହାକୁ ୫୦ ଲକ୍ଷ ଟଙ୍କାରେ ବିକ୍ରି କରି ଲାଭବାନ ହେବେ ବୋଲି ଭାବିଥିଲେ । ତେଣୁ ସେ ଝୁମରକୁ ୧୯ ଲକ୍ଷ ଟଙ୍କାରେ କିଣିବାକୁ ରାଜି ହୋଇଯାଇଥିଲେ ।"
| ଏହା ମଧ୍ୟ ପଢ଼ନ୍ତୁ...ଡିଜିଟାଲ ଆରେଷ୍ଟରେ ଲୁଟିଥିଲା କୋଟିଏ, ତେଲେଙ୍ଗାନାର ଅବଦୁଲ ସଲିମ ଗିରଫ ଏହା ମଧ୍ୟ ପଢ଼ନ୍ତୁ...ଇନଭେଷ୍ଟମେଣ୍ଟ ନାଁରେ ସାଇବର ଠକେଇ, ତାମିଲନାଡୁ ଫିଲ୍ମ ପ୍ରଯୋଜକ ଗିରଫ |
ଗ୍ୟାଙ୍ଗକୁ ଧରିବାକୁ ୩ ଥାନା ଅଧିକାରୀଙ୍କୁ ନେଇ ଗଠିତ ଟିମ୍:
ଏହି ଠକ ଗ୍ୟାଙ୍ଗକୁ ଧରିବାକୁ ବୈଦ୍ୟନାଥପୁର ଥାନା ପୋଲିସ ସହିତ ୩ ଥାନା ଅଧିକାରୀଙ୍କୁ ନେଇ ଗଠିତ ହେଇଥିଲା ଟିମ୍ । ବ୍ରହ୍ମପୁର ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶ କ୍ରମେ ବୈଦ୍ୟନାଥପୁର ଥାନାଧିକାରୀ ଆଇଆଇସି ସୁଚିତ୍ରା ପରିଡ଼ା, ଗୋଳନ୍ଥରା ଥାନା ଆଇଆଇସି ବିବେକାନନ୍ଦ ସ୍ୱାଇଁ, ଗୋପାଳପୁର ଥାନାଧିକାରୀ ପ୍ରଶାନ୍ତ କୁମାର ମଲ୍ଲିକଙ୍କ ନେତୃତ୍ବରେ ୩ଟି ଟିମ୍ ଗଠନ କରାଯାଇଥିଲା । ଏହି ୩ଟି ଟିମ୍ ବିଭିନ୍ନ ସ୍ଥାନରେ ଚଢ଼ାଉ କରିଥିଲେ । ଚଢ଼ାଉ ବେଳେ ଅଭିଯୁକ୍ତ ଶିବଶଙ୍କର ପଟ୍ଟନାୟକ, ଅଜୟ କୁମାର ମହାନ୍ତି ଓ ବଟକୃଷ୍ଣ ପ୍ରଧାନଙ୍କୁ ଧରିବାରେ ସକ୍ଷମ ହୋଇଥିଲେ । ପୋଲିସ ଟିମ୍ ଗିରଫ ଶିବଶଙ୍କର ଠାରୁ ୧୪ ଲକ୍ଷ ୫୦ ହଜାର ଟଙ୍କା, ଅଜୟଙ୍କ ଠାରୁ ଏକ ଲକ୍ଷ ୮୧ ହଜାର ୯୫୦ ଟଙ୍କା ଓ ବଟକୃଷ୍ଣ ପ୍ରଧାନଙ୍କ ଠାରୁ ୨ ଲକ୍ଷ ୫୦ହଜାର ଟଙ୍କା ସହିତ ଟଙ୍କା ବ୍ୟାଗକୁ ଜବତ କରିଛି ।
ଇଟିଭି ଭାରତ, ବ୍ରହ୍ମପୁର
