ନିମାପଡା: ଧୋକା ଦେଲା ଫେସବୁକ ପ୍ରେମ । ମିଠା ମିଠା ପ୍ରତିଶୃତି ଦେଇ ପ୍ରେମିକାକୁ ଠକି ଦେଲା ରୋମିଓ ପ୍ରେମିକ । ସୋସିଆଲ ମିଡିଆରେ ଚାଟି ଓ ପରେ ଡେଟିଂ । ପ୍ରେମିକା ଗର୍ଭବତୀ ହେବା ପରେ ଛାଡି ପଳାଇଲା ପ୍ରେମିକ । ଶେଷରେ ପତ୍ନୀର ହକ ପାଇଁ ପ୍ରେମିକ ଘର ସମ୍ମୁଖରେ ଧାରଣାରେ ବସିଛନ୍ତି ଯୁବତୀ । କୋଳରେ 22 ଦିନର କଅଁଳା ଶିଶୁ କନ୍ୟାକୁ ଧରି ପ୍ରବଳ ବର୍ଷାକୁ ଖାତିର ନକରି ଧାରଣା ଦେଇଛନ୍ତି । ଏଭଳି ଘଟଣା ଘଟିଛି ପୁରୀ ଜିଲ୍ଲା ପିପିଲି ଥାନା ଅଞ୍ଚଳର ପୁବା ଶାସନ ଗ୍ରାମରେ ।
ଏହା ମଧ୍ୟ ପଢନ୍ତୁ-ପ୍ରେମ ସପ୍ତାହରେ ପ୍ରେମିକାକୁ ପ୍ରତାରଣା, ପ୍ରେମିକ ଘର ସମ୍ମୁଖରେ ବିହାର ଯୁବତୀଙ୍କ ଧାରଣା
ଫେସବୁକରୁ ଆରମ୍ଭ ହୋଇଥିଲା ପ୍ରେମ:
ଯୁବତୀ ଜଣଙ୍କ ଏକ ପାଥୋଲ୍ୟାବରେ କାମ କରୁଥିବା ବେଳେ ଗୁଡ଼ିଆ ପୋଖରୀ ନିକଟରେ ଘର ଭଡା କରି ରହୁଥିଲେ । ସେହି ସମୟରେ ପ୍ରେମିକ ପବିତ୍ର ମହାପାତ୍ରଙ୍କ ଫେସବୁକରେ ପରିଚିତ ହୋଇଥିଲେ । ସେଇଠୁ ଆରମ୍ଭ ହୋଇଥିଲା ପ୍ରେମ ସମ୍ପର୍କ । ଏମିତି ଯୁବତୀଙ୍କୁ ବିବାହର ପ୍ରତିଶୃତି ଦେଇ ଶାରୀରିକ ସମ୍ପର୍କ ମଧ୍ୟ ରଖିଥିଲା ପବିତ୍ର । ଯେତେବେଳେ ପ୍ରେମିକା ଗର୍ଭବତୀ ଥିବା କହିଥିଲା ସେତେବେଳେ ଏହାକୁ ନଷ୍ଟ କରିବାକୁ କହିଥିଲା ପବିତ୍ର । କିନ୍ତୁ ଯୁବତୀ ଜଣଙ୍କ ବାରଣ କରିଥିଲେ । ଶେଷର ପ୍ରେମିକାର ହାତ ଛାଡି ଅନ୍ୟ ଝିଅଙ୍କ ସହ ସମ୍ପର୍କ ରଖୁଥିଲା ରୋମିଓ ପବିତ୍ର । ଯୁବତୀ ଜଣଙ୍କ ଶିଶୁକନ୍ୟାକୁ ଜନ୍ମ ଦେବା ପରେ ଏବେ ପତ୍ନୀର ମାନ୍ୟତା ପାଇଁ ପବିତ୍ର ମହାପାତ୍ର ଘର ସମ୍ମୁଖରେ ଦୁଇ ଦିନ ହେବ ଧାରଣାରେ ବସିଛନ୍ତି । ଯୁବତୀଙ୍କ ପରିବାରର କେହି ନଥିବା ବେଳେ ବିଭିନ୍ନ ସଂଗଠନ ସହାୟତାର ହାତ ବଢ଼ାଇଛନ୍ତି ।
ନ୍ୟାୟ ଦାବିରେ ଯୁବତୀଙ୍କ ଧାରାଣା:
ପୀଡିତା ଯୁବତୀ କହିଛନ୍ତି, ''ଭୁବନେଶ୍ବରରେ କାମ କରୁଥିବା ସମୟରେ ପବିତ୍ରଙ୍କ ସହ ଫେସବୁକରେ ପରିଚିତ ହେବା ପରେ ପ୍ରେମ ସମ୍ପର୍କ ଗଢି ଉଠିଥିଲା । ବିବାହର କଥା ଦେଇ ଶାରୀରିକ ସମ୍ପର୍କ ମଧ୍ୟ ରଖିଥିଲା । ପେଟରେ ପିଲା ଥିବା ବେଳେ ନଷ୍ଟ କରିଦେବାକୁ କହୁଥିଲା । ମୋତେ ଛାଡି ଆଉ ଏକ ଝିଅକୁ ଭଲ ପାଉଥିଲେ, ସେ ମଧ୍ୟ ଆତ୍ମହତ୍ୟା କରି ଦେଇଛି । ମୁଁ ଏବେ ନ୍ୟାୟ ପାଇବାକୁ ଆସିଛି । ''
ଇଟିଭି ଭାରତ, ନିମାପଡା
