କଟକ/ଭୁବନେଶ୍ବର: ମାଟ୍ରିମନି ସାଇଟରେ ମିଛ ପରିଚୟ ସହ ଆକାଉଣ୍ଟ ଖୋଲି ସମ୍ବେଦନଶୀଳ ମହିଳା ବର୍ଗକୁ କରୁଥିଲା ଟାର୍ଗେଟ । କେତେବେଳେ ଜିଏସଟି, ତ କେତେବେଳେ କଷ୍ଟମ ପୁଣି କେତେବେଳେ ରେଳବାଇ ଅଧିକାରୀ । ଭିନ୍ନ ଭିନ୍ନ ପରିଚୟ ସହ ପ୍ରୋଫାଇଲ ଖୋଲି ବିବାହ କରିବା ପ୍ରଲୋଭନ ସହ ଜନ୍ମାଉଥିଲା ବିଶ୍ବାସ ଓ ବଢାଉଥିଲା ସମ୍ପର୍କ । ମିଛ ବିବାହ କରି ଶାରୀରିକ ସମ୍ପର୍କ ରଖୁଥିଲା ଓ ଗୋପନରେ ଏହାର ଭିଡିଓ ମଧ୍ୟ ସୁଟ୍ କରୁଥିଲା । ପରେ ଏହି ଭିଡିଓ ମାଧ୍ୟମରେ ମହିଳାଙ୍କୁ ବ୍ଲାକମେଲ କରି ଲକ୍ଷ ଲକ୍ଷ ଟଙ୍କା ଲୁଟ କରୁଥିଲା । ଜଣେ କି ଦୁଇଜଣ ମହିଳା ନୁହନ୍ତି, ଗତ ପ୍ରାୟ 10 ବର୍ଷ ମଧ୍ୟରେ ଓଡିଶା ସମେତ ବିଭିନ୍ନ ରାଜ୍ୟରେ ପ୍ରାୟ 3ଶହରୁ ଅଧିକ ମହିଳାଙ୍କୁ ନିଜ ଜାଲରେ ଫସାଇଥିଲା । ହେଲେ ଜଣେ ପୀଡିତାଙ୍କ ଅଭିଯୋଗ ପରେ କ୍ରାଇମବ୍ରାଞ୍ଚ ଏବେ ଏହି ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି । ଗିରଫ ଅଭିଯୁକ୍ତ ହେଲା ଅନୁଗୋଳ ଛେଣ୍ଡିପଦାର ବିରଞ୍ଚି ନାରାୟଣ ନାଥ । ଗତକାଲି ତାକୁ ଗିରଫ କରିବା ପରେ ଆଜି ପୋଲିସ କୋର୍ଟ ଚାଲାଣ କରିଛି । ପ୍ରାଥମିକ ତଦନ୍ତ ପରେ ଯାହା ତଥ୍ୟ ସାମ୍ନାକୁ ଆସିଛି, ତାହା ପୋଲିସ ସମେତ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି ।
- ଟାର୍ଗେଟରେ ଥିଲେ ଅବିବାହିତା, ଛାଡ଼ପତ୍ର ପ୍ରାପ୍ତ ଓ ବିଧବା ମହିଳା :-
ପ୍ରାଥମିକ ତଦନ୍ତରେ ସାମ୍ନାକୁ ଆସିଥିବା ତଥ୍ୟ ଅନୁସାରେ, ଏକ ମାଟ୍ରିମୋନିଆଲ ଓ୍ବେବସାଇଟରେ "ସେକେଣ୍ଡ ମ୍ୟାରେଜ" ନାମରେ ଏକ ପ୍ରେଫାଇଲ ତିଆରି କରିଥିଲା ଅଭିଯୁକ୍ତ ବିରଞ୍ଚି ନାରାୟଣ । ଏହି ପ୍ରୋଫାଇଲ ଜରିଆରେ ବିଭିନ୍ନ ସମୟରେ ସେ ନିଜକୁ ରେଳବାଇ ଅଧିକାରୀ, ଆୟକର ଅଧିକାରୀ ଏବଂ ଏକ୍ସସାଇଜ ଓ କଷ୍ଟମ ଅଧିକାରୀ ବୋଲି ପରିଚୟ ଦେଉଥିଲା । ଅବିବାହିତ, ଛାଡ଼ପତ୍ର ପ୍ରାପ୍ତ ଓ ବିଧବା ମହିଳାଙ୍କୁ ବିବାହ ଉଦ୍ଦେଶ୍ୟରେ ଟାର୍ଗେଟ କରୁଥିଲା । ସେମାନଙ୍କ ଘରକୁ ନିଜେ ପ୍ରସ୍ତାବ ନେଇ ଯାଉଥିଲା ଏବଂ ପରେ ବିଶ୍ବାସ ଜନ୍ମାଇ ବିବାହ ମଧ୍ୟ କରୁଥିଲା । ତେବେ ବିବାହ କରିବା ପରେ ସେ ମହିଳାମାନଙ୍କୁ ବିଭିନ୍ନ ରାଜ୍ୟର ବିଭିନ୍ନ ସ୍ଥାନରେ ଭଡ଼ାଘରେ ରଖୁଥିଲା । ସେମାନଙ୍କ ସହ ଅନ୍ତରଙ୍ଗ ମୁହୂର୍ତର ଫଟୋ ଓ ଭିଡ଼ିଓ ଉତ୍ତୋଳନ କରୁଥିଲା । ପରେ ସେହି ଭିଡିଓ ଓ ଫଟୋକୁ ମାଧ୍ୟମ କରି କରି ସେ ମହିଳାମାନଙ୍କୁ ବ୍ଲାକମେଲ କରି ଟଙ୍କା ମାଗୁଥିଲା । କିଛି ମହିଳାଙ୍କଠାରୁ ଟଙ୍କା ସଂଗ୍ରହ କରିବାରେ ସଫଳ ମଧ୍ୟ ହୋଇଥିଲା ।
- ବିଭିନ୍ନ ରାଜ୍ୟକୁ ଲମ୍ବିଥିଲା ବିରଞ୍ଚିର ଷଡଯନ୍ତ୍ର ଜାଲ:-ବିବାହ ପ୍ରଲୋଭନ ଦେଖାଇ ୩ଶହରୁ ଊର୍ଦ୍ଧ୍ବ ମହିଳାଙ୍କୁ ଯୌନ ଶୋଷଣ, ନକଲି ଅଫିସରକୁ ବାନ୍ଧିଲା କ୍ରାଇମବ୍ରାଞ୍ଚ (ETV Bharat Odisha)
କଟକର ଜଣେ ପୀଡିତା ପୋଲିସର ଦ୍ବାରସ୍ଥ ହୋଇଥିଲେ । ତାଙ୍କ ଅଭିଯୋଗ କ୍ରମେ କ୍ରାଇମବ୍ରାଞ୍ଚ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରି ମହାଠକ ବିରଞ୍ଚିକୁ ଗିରଫ କରିବାରେ ସଫଳ ହୋଇଛି । ବିରଞ୍ଚି ନାଁରେ ବ୍ରହ୍ମପୁର, ଅନୁଗୁଳ, ବାଲେଶ୍ବର, ରାଉରକେଲା, ଢେଙ୍କାନାଳ ଓ ଭୁବନେଶ୍ବର ବିଭିନ୍ନ ଥାନାରେ ମାମଲା ରହିଛି । କେବଳ ଓଡ଼ିଶା ନୁହେଁ ବରଂ ରାଜ୍ୟ ବାହାରକୁ ଯାଇ ସେଠାକାର ମହିଳାମାନଙ୍କୁ ମଧ୍ୟ ଠକେଇ କରିଛି ବିରଞ୍ଚି । ବିଶେଷ କରି ରାଜସ୍ଥାନ, ପଶ୍ଚିମବଙ୍ଗ, ମଧ୍ୟ୍ୟପ୍ରଦେଶ, ମହାରାଷ୍ଟ୍ର, ହରିଆଣା ଓ ଦିଲ୍ଲୀରେ ମଧ୍ୟ ବିରଞ୍ଚି ମହିଳାମାନଙ୍କୁ ଠକେଇ କରିଥିବା ଜଣା ପଡିଛି । ବିରଞ୍ଚିଠାରୁ ନକଲି ପରିଚୟପତ୍ର ସହିତ ଅନେକ ଆପତ୍ତିଜନକ ଫଟୋକୁ ମଧ୍ୟ ଜବତ କରିଛି କ୍ରାଇମବ୍ରାଞ୍ଚ । ଏହା ସହ ତାର ବ୍ୟାଙ୍କ ଆକାଉଣ୍ଟଗୁଡିକର କାରବାର ସମ୍ପର୍କରେ ମଧ୍ୟ କ୍ରାଇମବ୍ରାଞ୍ଚ ତଥ୍ୟ ଏକାଠି କରିବା ଜାରି ରଖିଛି । ତା’ ବିରୋଧରେ ଭାରତୀୟ ନ୍ୟାୟ ସଂହିତାର ଧାରା-323/ 384/ 385/ 419/ 420/ 465/ 467/ 468/ 469, R/W Sec 66(E), 67, ଆଇଟି ଆକ୍ଟ 67(A) ରେ ତାକୁ ଗିରଫ କରାଯାଇଛି ।
- ରାଜ୍ୟ ଓ ରାଜ୍ୟ ବାହାରେ ମାଳ ମାଳ ଅଭିଯୋଗ:-ବିବାହ ପ୍ରଲୋଭନ ଦେଖାଇ ୩ଶହରୁ ଊର୍ଦ୍ଧ୍ବ ମହିଳାଙ୍କୁ ଯୌନ ଶୋଷଣ, ନକଲି ଅଫିସରକୁ ବାନ୍ଧିଲା କ୍ରାଇମବ୍ରାଞ୍ଚ (ETV Bharat Odisha)
ତେବେ ଏହି ଘଟଣାର ତଦନ୍ତ ବେଳେ କ୍ରାଇମବ୍ରାଞ୍ଚ ଜାଣିବାକୁ ପାଇଛି ଯେ,ଏ ବ୍ୟକ୍ତିଜଣଙ୍କ ନାଁରେ ରାଜ୍ୟର ଏକାଧିକ ଥାନାରେ ସମାନ ଅଭିଯୋଗ ରହିଛି । ବ୍ରହ୍ମପୁର ବୈଦ୍ୟନାଥପୁର ଥାନାରେ ଅଭିଯୋଗ ରହିଛି । ଅନୁଗୁଳ ଟାଉନ୍ ଥାନା, ବାଲେଶ୍ବର ସଦର ଥାନା ସମେତ ରାଉଲକେଲା ଛେଣ୍ଡ ଥାନା, ଢ଼େଙ୍କାନାଳ ଟାଉନ ଥାନାରେ ମଧ୍ୟ ଅଭିଯୋଗ ରହିଛି । କେବଳ ଏତିକି ନୁହେଁ, ଏପରିକି କମିସନରେଟ ପୋଲିସର ନୟାପଲ୍ଲୀ ଥାନା ସହ ବାଲିପାଟଣା ଥାନାରେ ଅଭିଯୋଗ ରହିଛି । ଏସମସ୍ତ କେସକୁ ଆଧାର କରି ସିଆଇଡି ଟିମ୍ ତାକୁ ଗିରଫ କରିଛି ।
- ଅଭିଯୁକ୍ତର ଫୋନରେ ଅନେକ ମହିଳାଙ୍କ ଅନ୍ତରଙ୍ଗ ମୁହୁର୍ତ୍ତର ଭିଡିଓ:-ବିବାହ ପ୍ରଲୋଭନ ଦେଖାଇ ୩ଶହରୁ ଊର୍ଦ୍ଧ୍ବ ମହିଳାଙ୍କୁ ଯୌନ ଶୋଷଣ, ନକଲି ଅଫିସରକୁ ବାନ୍ଧିଲା କ୍ରାଇମବ୍ରାଞ୍ଚ (ETV Bharat Odisha)
ଅଭିଯୁକ୍ତ ଜଣକ ମହିଳାଙ୍କୁ ପ୍ରଲୋଭିତ କରିବାରେ ସଫଳ ହେବା ପରେ ମନ୍ଦିରରେ ବିବାହ କରୁଥିଲା । ତା’ର ଘରେ ଅବସରପ୍ରାପ୍ତ ବ୍ୟାଙ୍କ କର୍ମଚାରୀ ବାପା ଓ ମା’ ଥିବାରୁ ସେ କେଉଁ ମହିଳାଙ୍କୁ ଘରକୁ ଆଣୁନଥିଲା । ବିବାହ ପରେ ମହିଳାମାନଙ୍କ ସହ ଭଡା ଘରେ କିଛି ମାସ ରହିବା ପରେ ଫେରାର ହୋଇଯାଉଥିଲା । ପରେ ଭିଡିଓ ଅପଲୋଡ କରିଦେବା ଧମକ ସହ ବ୍ଲାକମେଲିଂ ଆରମ୍ଭ କରୁଥିଲା । ଏହିପରି ଭାବେ ସେ ମହିଳାମାନଙ୍କଠୁ ଲକ୍ଷ ଲକ୍ଷ ଟଙ୍କା, ଗହଣା ଓ ଦାମି ଟ୍ୟାବ, ଲାପଟପ୍ ଓ ମୋବାଇଲ ସମେତ ଏକାଧିକ ଦାମି ସାମଗ୍ରୀ ଲୁଟିବାରେ ସଫଳ ହେଉଥିଲା । ଅଭିଯୁକ୍ତର ଫୋନରେ ମହିଳାଙ୍କ ଅନ୍ତରଙ୍ଗ ମୁହୂର୍ତ୍ତର ଫଟୋ ଓ ଭିଡିଓ ମଧ୍ୟ ଥିବା ପୋଲିସ ଜାଣିବାକୁ ପାଇଛି ।
ଇଟିଭି ଭାରତ, କଟକ/ଭୁବନେଶ୍ବର
