ବାଲେଶ୍ଵର: 12 ଘଣ୍ଟାରେ ଉଦ୍ଧାର ହେଲା ଶିଶୁପୁତ୍ର । ଜିଲ୍ଲା ମୁଖ୍ୟ ଚିକିତ୍ସାଳୟରୁ 9 ତାରିଖ ଚୋରି ହୋଇଥିବା ନବଜାତ ଶିଶୁପୁତ୍ରକୁ 12 ଘଣ୍ଟା ମଧ୍ୟରେ ପୋଲିସ ଉଦ୍ଧାର କରି ମା' କୋଳକୁ ଫେରାଇଛି । ଏନେଇ ବାଲେଶ୍ୱର ଏସପି ସାଗରିକା ନାଥ ଏକ ସାମ୍ବାଦିକ ସମ୍ମିଳନୀ ଜରିଆରେ ସୂଚନା ମିଳିଛି । କେମିତି ଶିଶୁପୁତ୍ରକୁ ଉଦ୍ଧାର କରାଗଲା, ଏହା ଭିତରେ କେଉଁମାନଙ୍କ ସମ୍ପୃକ୍ତି ଅଛି ଏବଂ କ'ଣ କ'ଣ ତଦନ୍ତ ପରିସରଭୁକ୍ତ କରାଯିବ ସେନେଇ ସୂଚନା ଦେଇଛନ୍ତି । ଏସପି ସାଗରିକା ନାଥ କହିଛନ୍ତି, "ଶିଶୁପୁତ୍ର ଜନ୍ମ ହେବାପରେ ଚୋରି କରିଥିବା ମହିଳା ଜଣଙ୍କ ଶିଶୁପୁତ୍ରର ପରିବାର ଲୋକଙ୍କ ସହ ଭଲ ଭାବେ ମିଶି ଯାଇଥିଲେ । ପରେ ଶିଶୁପୁତ୍ରକୁ ପୋଲିଓ ଦେବା ବାହାନାରେ ଚୋରି କରି ନେଇ ମୟୂରଭଞ୍ଜ ଅଞ୍ଚଳର ଗାଁ ଅମର୍ଦ୍ଦାରେ ରଖିଥିଲେ ।"
"ଶିଶୁପୁତ୍ରକୁ ଚୋରି କରିବା ପଛରେ ଆଶାକର୍ମୀଙ୍କ ହାତ ଥିବା ନେଇ ସନ୍ଦେହ କରିଥିଲେ ଶିଶୁପୁତ୍ରର ମା' । ଏନେଇ ସେ ଥାନାରେ ଅଭିଯୋଗ କରିଥିଲେ । ଅଭିଯୋଗ କ୍ରମେ ପୋଲିସ ଆଶାକର୍ମୀଙ୍କୁ ଅଟକ ରଖି ତଦନ୍ତ ଆରମ୍ଭ କରିଥିଲା । ଏଥିପାଇଁ 3ଟି ଟିମ ଗଠନ କରି ବିଭିନ୍ନ ସ୍ଥାନରେ ଖୋଜା ଚାଲିଥିଲା । ସଦର ଏସଡିପିଓଙ୍କ ନେତୃତ୍ୱରେ ଟିମ ଗଠନ କରାଯାଇଥିଲା । ଜଳେଶ୍ବର ଅଞ୍ଚଳରେ ତଦନ୍ତ ସହ ଖନ୍ତାପଡ଼ା ଥାନା ଅଧିକାରୀଙ୍କ ନେତୃତ୍ୱରେ ଗଠନ କରାଯାଇଥିବା ଟିମ, ଟ୍ରାଫିକ କନେଷ୍ଟବଳ ଟିମ, ଅଟୋ ଡ୍ରାଇଭର ଆସୋସିଏସନର ସହଯୋଗରେ ଶିଶୁପୁତ୍ରକୁ ଖୋଜାଖୋଜି କରାଯାଇଥଲା । ଏହାସହ ସିସିଟିଭିରେ କଏଦ ହୋଇଥିବା ଭିଡିଓ ଫୁଟେଜ ଅନୁସାରେ ପୋଲିସ ତଦନ୍ତ ଜାରି ରଖିଥିଲା । ଶେଷରେ ପୋଲିସ ଅମର୍ଦ୍ଦାରୁ ଶିଶୁପୁତ୍ରକୁ ଉଦ୍ଧାର କରିବା ସହ ଚୋରିରେ ସମ୍ପୃକ୍ତି ଥିବା ମହିଳାଙ୍କୁ ଅଟକ ରଖିଛି" ବୋଲି କହିଛନ୍ତି ଏସପି ।
ଏହି ଘଟଣାରେ ପୋଲିସ, ହସ୍ପିଟାଲ ଷ୍ଟାଫ ଓ ସିକ୍ୟୁରିଟି ଗାର୍ଡଙ୍କୁ ତଦନ୍ତ ପରିସରକୁ ଅଣାଯିବା ନେଇ ଏସପି ସୂଚନା ଦେଇଛନ୍ତି । ତେବେ ବାଲେଶ୍ୱର ମୁଖ୍ୟ ଚିକିତ୍ସାଳୟରୁ ଗତ ଏପ୍ରିଲ ମାସ 4 ତାରିଖ ଏବଂ ଜୁନ ମାସ 9 ତାରିଖ ଦୁଇ ଥର କେବଳ ଶିଶୁପୁତ୍ରଙ୍କୁ ଚୋରି ହେବା ନେଇ ଚିନ୍ତା ବଢିଛି । ହସ୍ପିଟାଲରେ କେଉଁଠି ନା କେଉଁଠି ସୁରକ୍ଷା ବ୍ୟବସ୍ଥା ଏବଂ ଏଥିରେ ହସ୍ପିଟାଲ କର୍ମଚାରୀ ସମ୍ପୃକ୍ତ ଅଛନ୍ତି କି ନାହିଁ ସେ ବିଷୟରେ ପୋଲିସ ଅଧିକ ତଦନ୍ତ କରିବ ବୋଲି ଜଣାପଡ଼ିଛି । ପ୍ରକାଶ ଥାଉକି, ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ କୁଲାଚଡ ଗାଁର ଅନିତା ଦଣ୍ଡପାଟଙ୍କ ଗୋଟିଏ ଦିନର ଶିଶୁପୁତ୍ର ଚୋରି ହୋଇଥିବା ନେଇ ଅଭିଯୋଗ ହୋଇଥିଲା । ଅଭିଯୋଗ ଆଧାରରେ ପୋଲିସ ତଦନ୍ତ କରି ଶିଶୁପୁତ୍ରକୁ ଉଦ୍ଧାର କରିବା ସହ ଏହାଭିତରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି ସେନେଇ ଅଧିକ ତଦନ୍ତ ଜାରି ରଖିଛି ।
ଇଟିଭି ଭାରତ, ବାଲେଶ୍ବର
