କେନ୍ଦ୍ରାପଡ଼ା: ନିଜ ପାଖରେ ନାହିଁ ଯୋଗାଯୋଗ ପାଇଁ ମାଧ୍ୟମ କିମ୍ବା ସ୍ବର୍ଗତ ମାଆଙ୍କର ଶୁଦ୍ଧିକ୍ରିୟା ପାଇଁ ସମ୍ବଳ । ନିଜର ଫୋନ ନଥିବାରୁ ପଡୋଶୀଙ୍କ ଫୋନ ଯୋଗେ ମୃତ ମାଆର ଶୁଦ୍ଧିକ୍ରିୟା ପାଇଁ ଫେସବୁକ ଓ ହ୍ବାଟସଆପ ମାଧ୍ୟମରେ ଆର୍ଥିକ ସାହାଯ୍ୟ ମାଗୁଛନ୍ତି ଦୁଇ ନାବାଳକ ଭାଇ । ଏବେ କେନ୍ଦ୍ରାପଡା ଜିଲ୍ଲାରେ ମୋବାଇଲରୁ ମୋବାଇଲକୁ ଭାଇରାଲ ହେଉଛି, ଦୁଇ ଅନାଥ ଭାଇଙ୍କ ଫଟୋ ଆଉ ସେଥିରେ ଯୋଡହସ୍ତରେ ସାହାଯ୍ୟ ପାଇଁ ଆକୁଳ ନିବେଦନ । ଏଭଳି ଘଟଣା ସାମ୍ନାକୁ ଆସିଛି ମାର୍ଶାଘାଇ ବ୍ଲକ କୁହୁଡି ପଞ୍ଚାୟତର ନରେନ୍ଦ୍ରପୁର ଗ୍ରାମରୁ ।
ଅସହାୟ ଆଶିଷ ଏବଂ ଦେବାଶିଷ:
ନରେନ୍ଦ୍ରପୁର ଗ୍ରାମର ତ୍ରିଲୋଚନ ସେଠୀଙ୍କର ତିନିବର୍ଷ ପୂର୍ବରୁ ଦୁରାରୋଗ୍ୟରେ ଦେହାନ୍ତ ହୋଇଥିଲା । ସ୍ତ୍ରୀ ନମିତା ଓ ଦୁଇପୁଅ ଆଶିଷ-ଦେବାଶିଷଙ୍କୁ ନେଇ ପରିବାର ବହୁ ଦୁଃଖ କଷ୍ଟରେ କାଟୁଥିଲେ । ବଡ ପୁଅ ଆଶିଷ ନବମ ଶ୍ରେଣୀରେ ପାଠ ପଢୁଥିବାବେଳେ ସାନପୁଅ ଦେବାଶିଷ ଷଷ୍ଠ ଶ୍ରେଣୀରେ ପଢୁଛି । ବାପା ଆରପାରିକୁ ଚାଲିଯିବା ପରେ ଦୁଇ ପୁଅଙ୍କୁ କିପରି ଭଲ ମଣିଷ କରିବେ ଓ ବାଟ ଚାଲିବା ଶିଖାଉଥିବା ମାଆ ନମିତା ମଧ୍ୟ ଚଳିତ ମାସ ୧୮ ତାରିଖ ଦିନ ବ୍ରେନ ଷ୍ଟ୍ରୋକରେ ଆରପାରିକୁ ଚାଲିଗଲେ । ଏବେ ନମିତାଙ୍କ ଦୁଇ ପୁଅ ବାପା-ମାଆ ଛେଉଣ୍ଡ ହୋଇ ଯାଇଛନ୍ତି ।
ମାଆର ଶୁଦ୍ଧିକ୍ରିୟା କରିବା ପାଇଁ ସହାୟତା ଲୋଡ଼ିଛନ୍ତି ଦୁଇ ଭାଇ:
ମାଆର ଶେଷକୃତ୍ୟ ପାଇଁ ହରିଶ୍ଚନ୍ଦ୍ର ଯୋଜନାରୁ ସରପଞ୍ଚ ଟଙ୍କା ପ୍ରଦାନ କରିଥିଲେ ।ଏହାପରେ ନମିତାଙ୍କ ଶେଷକୃତ୍ୟ ସମ୍ପୂର୍ଣ୍ଣ ହୋଇଥିଲା । ସ୍ବାସ୍ଥ୍ୟକର୍ମୀ ମଧ୍ୟ ମୃତ ନମିତାଙ୍କ ଘରେ ପହଞ୍ଚି ତଥ୍ୟ ସଂଗ୍ରହ କରିଛନ୍ତି । ହେଲେ ଆର୍ଥିକ ସମ୍ବଳ ନଥିବା କାରଣରୁ ଶୁଦ୍ଧିକ୍ରିୟା କରିବା ପାଇଁ ଦୁଇ ଭାଇ ଏଇ କଅଁଳ ବୟସରେ ଚିନ୍ତାରେ ପଡ଼ିଛନ୍ତି । ଖେଳିବା ବୁଲିବା ବୟସରେ ବୋଝ ଉପରେ ଲଳିତା ବିଡ଼ା ଲଦି ଦେଇଛି ବିଧାତା । ଆଶିଷ ଓ ଦେବାଶିଷଙ୍କ ନିକଟରେ ଫୋନଟିଏ ମଧ୍ୟ ନଥିବାବେଳେ ପଡୋଶୀଙ୍କ ଫୋନରେ ସୋସିଆଲ୍ ମିଡିଆରେ ଶୁଦ୍ଧିକ୍ରିୟା କରିବା ପାଇଁ ସହାୟତା ଲୋଡ଼ିଛନ୍ତି ।
ରେଡକ୍ରସ ପାଣ୍ଠିରୁ ସହାୟତା ପ୍ରଦାନ ଦାବି:
ଏହା ଦେଖି କିଛି ସାମାଜିକ କର୍ମୀ ଦୁଇ ଭାଇଙ୍କୁ ସହାୟତାର ହାତ ବଢାଇଛନ୍ତି । ସେମାନେ କହିଛନ୍ତି ଯେ , ଶୁଦ୍ଧିକ୍ରିୟା ପାଇଁ ଆମ୍ଭେମାନେ ଯେତିକି ସାହାଯ୍ୟ କରୁଛୁ, ସେତିକି ଯଥେଷ୍ଟ ନୁହେଁ । କେନ୍ଦ୍ରାପଡା ଜିଲ୍ଲାପାଳ ରେଡକ୍ରସ ପାଣ୍ଠିରୁ ଦୁଇ ଅନାଥ ଶିଶୁଙ୍କ ମାଆର ଶୁଦ୍ଧିକ୍ରିୟା ପାଇଁ ଅର୍ଥ ପ୍ରଦାନ କରନ୍ତୁ । ଦୁଇ ନାବାଳକ ଅନାଥ ଶିଶୁ କିପରି ଆଗାମୀ ଦିନରେ ଭଲ ପାଠ ପଢିବେ ସେଥିପୋଇଁ ମଧ୍ୟ ଜିଲ୍ଲାପାଳଙ୍କୁ ଅନୁରୋଧ କରିଛନ୍ତି ।
ଇଟିଭି ଭାରତ ,କେନ୍ଦ୍ରାପଡାର
