ଫୁଲବାଣୀ: ସୁରକ୍ଷା ଦେବା ବଦଳରେ ମାରପିଟ କଲା ପୋଲିସ । ପୋଲିସ ମାଡରେ ଲହୁଲୁହାଣ ହେଲେ ହୋଟେଲ କର୍ମଚାରୀ ।ଏଭଳି ଏକ ଅଭାବନୀୟ ଘଟଣା ସାମ୍ନାକୁ ଆସିଛି କନ୍ଧମାଳ ଜିଲ୍ଲା ଖଜୁରୀପଡ଼ା ଅଞ୍ଚଳରୁ । ଗତକାଲି ଖଜୁରୀପଡ଼ା ଅଞ୍ଚଳରେ ଗୋଟିଏ ହୋଟେଲ ବିଳମ୍ବିତ ରାତି ଯାଏ ଖୋଲାଥିବାରୁ ଖଜୁରୀପଡ଼ା ଥାନା ଅଧିକାରୀ ଉକ୍ତ ହୋଟେଲରେ ଚଢାଉ କରିଥିଲେ ।
ଏହି ସମୟରେ ହୋଟେଲରୁ କିଛି ନ ମିିଳିବାରୁ ବଟି ମାଗିିଥିବା ଅଭିଯୋଗ ହୋଇଛି । ତେବେ ହୋଟେଲ ମାଲିକ ବଟି ଦେବାକୁ ବାରଣ କରିବାରୁ ତାଙ୍କୁ ଏବଂ ହୋଟେଲରେ କାର୍ଯ୍ୟରତ କର୍ମଚାରୀଙ୍କୁ ପୋଲିସ ମାରପିଟ କରିଥିବା ଅଭିଯୋଗ ହୋଇଛି । ତେବେ ଆଜି(ରବିବାର)ଦିନ ଉକ୍ତ ହୋଟେଲ ମାଲିକ ଖଜୁରୀପଡ଼ା ଥାନା ଅଧିକାରୀଙ୍କ ବିରୋଧରେ ଏସପିଙ୍କ ନିକଟରେ ଫେରାଦ ହୋଇଛନ୍ତି ।
ସୂଚନାଯୋଗ୍ୟ, ଖଜୁରୀପଡ଼ା ଥାନା ନିକଟସ୍ଥ ମୁଖ୍ୟ ରାସ୍ତାରେ ଥିବା ଏକ ହୋଟେଲରେ କିଛି ପୋଲିସ କର୍ମଚାରୀ ପହଞ୍ଚି ହୋଟେଲ କର୍ମଚାରୀ ଓ ମାଲିକ ସୁବ୍ରତ ସାହୁଙ୍କୁ ନିସ୍ତୁକ ମାଡ ମାରିଥିବା ନେଇ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ନିକଟରେ ଅଭିଯୋଗ ହୋଇଛି । ବିଳମ୍ବିତ ରାତି ପର୍ଯ୍ୟନ୍ତ ହୋଟେଲ ଖୋଲାଥିବାରୁ ପୋଲିସ ହୋଟେଲରେ ପହଞ୍ଚିଥିଲା । ତେବେ ହୋଟେଲ କର୍ମଚାରୀମାନେ ଖାଉଥିବାରୁ ହୋଟେଲ ବନ୍ଦ ହେବାରେ ବିଳମ୍ବ ହେବା ନେଇ ମାଲିକ ସୁବ୍ରତ ପୋଲିସକୁ କହିଥିଲେ । ହେଲେ ପୋଲିସ କିନ୍ତୁ ସୁବ୍ରତଙ୍କ କଥା ଶୁଣି ନଥିଲା ।
ଉଭୟଙ୍କ ମଧ୍ୟରେ ତର୍କ ବିତର୍କ ହେବାରୁ ପୋଲିସ ଉତ୍ୟକ୍ତ ହୋଇ ସେମାନଙ୍କୁ ମାଡ଼ ମରାଯାଇଥିବା ନେଇ ହୋଟେଲ ମାଲିକ ସୁବ୍ରତ କନ୍ଧମାଳ ଏସପିଙ୍କ ନିକଟରେ ଅଭିଯୋଗ କରିବା ସହ ଥାନା ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି । ତେବେ ଏନେଇ ଥାନା ଅଧିକାରୀଙ୍କୁ ପଚାରିବାରୁ ସେ କହିଥିଲେ ଯେ, ବର୍ତ୍ତମାନ ନିର୍ବାଚନ ସମୟ ଏ ସମୟରେ ବିଳମ୍ବିତ ରାତି ପର୍ଯ୍ୟନ୍ତ ହୋଟେଲ ଖୋଲା ଥିବାରୁ ହୋଟେଲ ବନ୍ଦ କରିବା ପାଇଁ କୁହାଯାଇଥିଲା । ହେଲେ ଏହାକୁ ହୋଟେଲ ମାଲିକ ଶୁଣି ନଥିଲେ । ଓଲଟି ହୋଟେଲ ମାଲିକ ପୋଲିସ କର୍ମଚାରୀକୁ ଦୁର୍ବ୍ୟବବହାର କରିବା ସହ ଜଣେ କର୍ମଚାରୀକୁ ଧକ୍କା ମଧ୍ୟ ମାରିଥିଲେ ।
ଇଟିଭି ଭାରତ, କନ୍ଧମାଳ
