ବେଙ୍ଗାଲୁରୁ: ମହିଳା ପ୍ରିମିୟର ଲିଗର ନବମ ମୁକାବିଲାରେ ମୁମ୍ବାଇ ଇଣ୍ଡିଆନ୍ସର ଦମଦାର ବିଜୟ । ଆରସିବିକୁ 7 ଓ୍ବିକେଟରେ ପରାଜିତ କରି ଚଳିତ ସିଜିନରେ ତୃତୀୟ ବିଜୟ ହାସଲ କରିଛି MI । ସମସ୍ତଙ୍କୁ ପଛରେ ପକାଇ ପଏଣ୍ଟ ଟେବୁଲର ଶୀର୍ଷରେ ମୁମ୍ବାଇ । ମାତ୍ର 15.1 ଓଭରରେ ବିଜୟ ରନ ଲକ୍ଷ୍ୟ ହାସଲ କରି ଆରସିବିକୁ ପରାସ୍ତ କରିଛି ଦଳ । ଚଳିତ ସିଜିନରେ ଆରସିବିର ଦ୍ବିତୀୟ ପରାଜୟ ହୋଇଛି ।
ଶନିବାର ସନ୍ଧ୍ୟା 7ଟା 30 ମିନିଟରେ ବେଙ୍ଗାଲୁରୁ ସ୍ଥିତ ଏମ୍ ଚିନା ସ୍ବାମୀ ଷ୍ଟାଡିୟମରେ ମୁମ୍ବାଇ ଇଣ୍ଡିଆନ୍ସ ଏବଂ ରୟାଲ ଚ୍ୟାଲେଞ୍ଜର୍ସ ମଧ୍ୟରେ ମ୍ୟାଚ ଖେଳାଯାଇଥିଲା । ଟସ ଜିତି ଫିଲ୍ଡ ନିଷ୍ପତ୍ତି ନେଇଥିଲା ମୁମ୍ବାଇ । ଫଳରେ ବ୍ୟାଟିଂ ପାଇଁ ପ୍ରଥମେ ପଡିଆକୁ ଓହ୍ଲାଇଥିଲା ଆରସିବି । ଆରମ୍ଭ କରି ଓପନିଂ ଯୋଡି ସ୍ମୃତି ମାନ୍ଧନା ଓ ସୋଫି ରନ କରିବାରେ ବିଫଳ ହୋଇଥିଲେ । ଫଳରେ ଦଳ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ଦଳୀୟ ସ୍କୋର 42 ବେଳକୁ 4ଟି ଓ୍ବିକେଟ ହରାଇଥିଲା ଟିମ । ଏମଆଇ ଦଳର ବୋଲରଙ୍କ ବଲଙ୍କୁ ସମ୍ମୁଖୀନ କରିବା ଯେମିତି ଆରସିବି ପାଖରେ କଠିନକର ହୋଇପଡିଥଲା । ଏଲିସା ପେରି ଅପରାଜିତ 44 ରନ କରିଥିବା ବେଳେ ଓ୍ବାରେହାମଙ୍କ 27 ଓ ଶୋଫେ ମୋଲିନକ୍ସଙ୍କ 12 ରନ ବଳରେ 20 ଓଭରରେ ଦଳ 6ଟି ଓ୍ବିକେଟ ହରାଇ 131 ରନ କରିବାକୁ ସକ୍ଷମ ହୋଇଥିଲା ।
